الماتى وبلىسىندا دەنساۋلىق ساقتاۋ ءمينيسترى اقمارال ءالنازاروۆانىڭ حالىقپەن كەزدەسۋىندە وبلىس اكىمىنىڭ ءبىرىنشى ورىنباسارىنىڭ مۇمكىندىگى شەكتەۋلى جاندار تۋرالى ايتقان ءسوزى جۇرتتىڭ اشۋىنا ءتيدى، دەپ حابارلايدى Dalanews.kz.
ۆيدەو تالعارلىق پابليكتەردىڭ بىرىندە پايدا بولدى. بەينەروليكتە وبلىس اكىمىنىڭ ءبىرىنشى ورىنباسارى حالىقتى سابىرعا شاقىرىپ، ارتىنشا مۇمكىندىگى شەكتەۋلى جاندار تۋرالى ايتقان.
"مۇگەدەكتەردىڭ ەڭسەسىن تۇسىرمەيىك. ونسىز دا اللا تاعالا بۇل كىسىلەردى، ورىسشا ايتقاندا، "يح ناكازالي". سىيلايىق. سول ءۇشىن قۇداي باستارىڭىزعا سالماسىن. قول-اياقتارىڭىز تۇگەل، اۋرۋ ەمەسسىزدەر، وسى كىسىلەردى قابىلداسىن"، - دەيدى شەنەۋنىك.
ۆيدەودان بۇل ءسوزدى ايتقان وبلىس اكىمىنىڭ ءبىرىنشى ورىنباسارى قانات ەسبولاتوۆ ەكەنىن اڭعارۋعا بولادى.
شەنەۋنىكتىڭ بۇل ءسوزى قازاقستاندىقتاردىڭ اشۋىنا تيگەن.
"ءبىلىمى وتە تومەن ەكەنىن كورسەتىپ ايتىپ نە ايتىپ تۇرعانىن ءوزى بىلمەيدى".
"اللا جازالاعان دەگەن ءسوزىن قالاي تۇسىنۋگە بولادى؟ وسى ءسوز ءۇشىن جازالانۋى كەرەك!".
"مەن، قازاقستان رەسپۋبليكاسىنىڭ ازاماتشاسى رەتىندە، الماتى وبلىسى اكىمىنىڭ ورىنباسارى مۇگەدەكتىگى بار ادامدارعا قاتىستى ايتىپ وتكەن سوزدەرىنىڭ مۇلدە ورىنسىز ءارى قابىلداۋعا بولمايتىنىن اشىق ايتامىن. مۇنداي مالىمدەمە ازاماتتاردىڭ قادىر-قاسيەتىن تاپتاپ، كونستيتۋسيا نورمالارى مەن مەملەكەتتىك قىزمەتشى ەتيكاسىن ورەسكەل بۇزادى. وسىعان بايلانىستى تەكسەرىس جۇرگىزىلىپ، ونىڭ وتستاۆكاعا جىبەرىلۋى ماسەلەسى قارالۋى ءتيىس دەپ ەسەپتەيمىن. سونداي-اق ايتىلعان سوزدەردەن زارداپ شەككەن بارلىق جانداردان كوپشىلىك الدىندا كەشىرىم سۇرالۋى قاجەت. ءار ادامعا قۇرمەت - ءادىل مەملەكەتتىڭ ىرگەتاسى. مۇنداي ارەكەتتەر جاۋاپسىز قالماۋى كەرەك".
