Алматы облысында денсаулық сақтау министрі Ақмарал Әлназарованың халықпен кездесуінде облыс әкімінің бірінші орынбасарының мүмкіндігі шектеулі жандар туралы айтқан сөзі жұрттың ашуына тиді, деп хабарлайды Dalanews.kz.

Видео талғарлық пабликтердің бірінде пайда болды. Бейнероликте облыс әкімінің бірінші орынбасары халықты сабырға шақырып, артынша мүмкіндігі шектеулі жандар туралы айтқан. 

"Мүгедектердің еңсесін түсірмейік. Онсыз да Алла тағала бұл кісілерді, орысша айтқанда, "их наказали". Сыйлайық. Сол үшін құдай бастарыңызға салмасын. Қол-аяқтарыңыз түгел, ауру емессіздер, осы кісілерді қабылдасын", - дейді шенеунік. 

Видеодан бұл сөзді айтқан облыс әкімінің бірінші орынбасары Қанат Есболатов екенін аңғаруға болады.

Шенеуніктің бұл сөзі қазақстандықтардың ашуына тиген. 

"Білімі өте төмен екенін көрсетіп айтып не айтып тұрғанын өзі білмейді".

"Алла жазалаған деген сөзін қалай түсінуге болады? Осы сөз үшін жазалануы керек!".

"Мен, Қазақстан Республикасының азаматшасы ретінде, Алматы облысы әкімінің орынбасары мүгедектігі бар адамдарға қатысты айтып өткен сөздерінің мүлде орынсыз әрі қабылдауға болмайтынын ашық айтамын. Мұндай мәлімдеме азаматтардың қадір-қасиетін таптап, Конституция нормалары мен мемлекеттік қызметші этикасын өрескел бұзады. Осыған байланысты тексеріс жүргізіліп, оның отставкаға жіберілуі мәселесі қаралуы тиіс деп есептеймін. Сондай-ақ айтылған сөздерден зардап шеккен барлық жандардан көпшілік алдында кешірім сұралуы қажет. Әр адамға құрмет - әділ мемлекеттің іргетасы. Мұндай әрекеттер жауапсыз қалмауы керек".