«مول قارجى، سۋبسيديا بولىنۋدە، ءبىراق ءىلىپ الار جوبا جوق». اكىم شەندىلەردەن جۇمىستى شيراتۋدى تالاپ ەتتى

Dalanews 12 قاڭ. 2023 04:18 487

تۇركىستان وبلىسىندا ينفراقۇرىلىم تارتۋ، اۋىل شارۋاشىلىعى، ينۆەستيسيا، تۋريزم، جۇمىسپەن قامتۋ جانە وزگە دە سالالار بويىنشا جول كارتاسى جاسالىپ، جۇيەلى جۇمىس اتقارىلۋى ءتيىس. حالىقتىڭ مۇڭ-مۇقتاجى مەن وتىنىشتەرىن ورىنداۋ باعىتىندا سالعىرتتىققا جول بەرىلمەيدى. وسى باعىتتاعى كەمشىلىكتەردى ايتقان وبلىس اكىمى دارحان ساتىبالدى جاۋاپتى ورىنباسارلارى مەن بارلىق اۋدان، قالا اكىمدەرىنە جانە باسقارما باسشىلارىنا ەسكەرتۋ جاسادى، – دەپ حابارلايدى Dalanews.kz.

– اۋداندار مەن اۋىلداردى ارالاۋ بارىسىندا تۇرعىنداردىڭ وتىنىشتەرى مەن شاعىمدارىنىڭ 50 پايىزى ينفراقۇرىلىم ماسەلەسىنە قاتىستى ەكەنىن كوردىم.

سوندىقتان وسى باعىتتا جۇمىستى جۇيەلەپ، ناقتى جوسپارمەن ءىس اتقارۋ كەرەك. ينفرۇرىلىم، گاز، كارىز جۇيەسى، ەلەكتر ماسەلەلەرى بويىنشا تۇراقتى تۇردە ءماجىلىس وتكىزىپ تۇرامىز. بارلىق جۇمىس باقىلاۋدا بولادى.

ەكىنشىدەن، ينۆەستيسيالىق شتاب قۇرۋ جونىندە تاپسىرما بەردىم. بۇل شتابتىڭ دا وتىرىسى تۇراقتى ءوتىپ، جاڭا جوبالارعا قولداۋ كورسەتۋ، ينۆەستيسيا تارتۋ جۇمىستارى كۇشەيتىلسىن. دۇرىس جاعداي جاسالىپ، جۇمىس جۇرگىزىلمەسە، ەشقانداي ينۆەستور كەلمەيدى.

اۋدانداردى اۋىل شارۋاشىلىعى سالاسى بويىنشا مامانداندىرۋ، ءار ايماقتا جەتەكشى باعىتتاردى ايقىنداۋ جونىندە دە تاپسىرما بەرىلدى. ۇكىمەتتەن اۋىل شارۋاشىلىعى بويىنشا وڭىرگە مول قارجى، سۋبسيديا بولىنەدى. ورتالىقتان تۇركىستان وبلىسىنا ەلىمىزدى اۋىل شارۋاشىلىعى ونىمدەرىمەن قامتاماسىز ەتۋ مىندەتى جۇكتەلىپ وتىر. وسى باعىتتا جۇمىستى كۇشەيتىپ، جوبالار تابۋدى تاپسىردىم.


ءبىراق ءالى كۇنگە دەيىن بىردە-بىر ءىلىپ الارلىق جوبا جوق. جۇمىستى كۇشەيتىڭىزدەر، – دەدى دارحان ساتىبالدى.

ماجىلىستە تۋريزم سالاسىن جانداندىرۋ، مادەنيەت سالاسى بويىنشا اۋقىمدى جوبالاردى قولعا الۋ، مادەني عيماراتتارعا «جان ءبىتىرىپ»، تۋريستەر شوعىرىن ارتتىرۋ ماسەلەلەرى دە تالقىلاندى.

سونىمەن قاتار جۇمىسپەن قامتۋ سالاسىنا جاۋاپتى باسشىلارعا مەملەكەتتىك گرانتتاردى جۇيەلەپ، ناقتى ءوندىرىس كولەمىن ارتتىراتىن جوبالارعا باعىتتاۋ جونىندە تاپسىرما بەرىلدى. اۋىل شارۋاشىلىعىنا مەملەكەت تاراپىنان بەرىلەتىن سۋبسيديالار مەن جەڭىلدەتىلگەن نەسيەلەردى ءتيىمدى پايدالانىپ، جۇمىس ورىندارىن كوبەيتۋ، ەلىمىزدىڭ ازىق-تۇلىك قاۋىپسىزدىگىن نىعايتۋ، جوبالاردى تياناقتى جوسپارلاۋ بويىنشا دا تاپسىرمالار حاتتاماعا ەنگىزىلدى.

وبلىستا جىلىجايلار سانىن ارتتىرۋ ءۇشىن بىرنەشە اۋداننان جەر تەلىمدەرى بولىنەدى. كومىر ماسەلەسى دە جولعا قويىلىپ، جۇيەلەنەدى.

وسى جانە وزگە دە تۇيتكىلدەرگە توقتالعان ءوڭىر باسشىسى جۇمىستى تياناقتى جوسپارلاۋ، كۇردەلى ماسەلەلەردىڭ الدىن الۋ شارالارىن كۇشەيتۋ جونىندە دە تاپسىرما بەردى.

ۇسىنىلعان
سوڭعى جاڭالىقتار