ونلاين اقشا قابىلدامايمىز! سوڭعى كۇندەرى ەل دۇكەندەرىندە وسىنداي حابارلامالار كوبەيىپ كەتتى. ساۋداگەرلەر «قۇزىرلى ورگانداعىلار قوسىمشا سالىق سالادى» دەپ، ەسەپ ايىرىسۋدان موبيلدىك قوسىمشانى ىسىرىپ قويىپ جاتىر، دەپ حابارلايدى Dalanews.kz.
مۇنى ەستىپ العان قاراپايىم ازاماتتار دا «وزگەگە اۋدارعان اقشامىزعا سالىق سالىنادى ما» دەگەن ۇرەيگە بوي الدىرۋدا. سەنات ماقۇلداپ، پرەزيدەنتتىڭ قول قويۋى عانا قالعان ونلاين اقشا اۋدارىمدارى تۋرالى «ەۋرازيا» ءبىرىنشى ارناسى ارنايى سيۋجەت ازىرلەدى.
استاناداعى ازىق-تۇلىك ساۋدالايتىن بازارداعى ساتۋشىلار دا تۇتىنۋشىلارىنا قولما-قول اقشامەن ەسەپ ايىرىسۋدى ەسكەرتىپ باعۋدا.
كۇلاش، ساۋداگەر:
"بىزدەر ەندى قولما-قول دا، ءموبيلدى اۋدارىمدار دا قاتار جۇرە بەرەدى. ءبىزدىڭ بارىمىزدە - جك. سالىق تولەپ ءجۇرمىز. ال انانداي اۋدارىم بولعان سوڭ، ول ءبىزدىڭ جاعدايدى قيىنداتادى".
ديناگۇل، ساۋداگەر:
"بارلىق ساۋدا ورىندارىندا ساۋداگەرلەر زاڭ تۇرىندە ىستەگەن جاقسى. مىسالى، ءبىز ۇكىمەتكە سالىق تولەپ وتىرامىز. قازىردە ءبىز قۇجات تىركەتتىك. ج ش س، جك ارقىلى تولەيمىز. ءبىراق سودان العان سوڭ، ءبىزدى مازالاماسا دەپ ويلايمىز. قوسىمشا بىزدەن تاعى ۇستاپ جۇرمەسە بولدى".
ساۋداسى جۇرمەي قالعان بازارداعىلار ۇرەيلى.
جالپى، ەلىمىزدە وسىنداي 1 ميلليون 200 مىڭ كاسىپكەر تىركەلگەن بولسا، سونىڭ 300 مىڭى ونلاين باقىلاۋ قۇرىلعىسىن مۇلدەم قولدانبايدى ەكەن. دەمەك، سالىقتان جالتارىپ ءجۇر. وسىنىڭ جولىن كەسۋ ءۇشىن دە زاڭ پرەزيدەنتكە جول تارتتى.
ولجاس وتار، ق ر قارجى مينيسترلىگى مەملەكەتتىك كىرىستەر كوميتەتى باسقارما باسشىسىنىڭ ورىنباسارى:
"جالپى اۋدارىمدار بولعان. بۇنىڭ ىشىندە كاسىپكەر دە بار، جەكە تۇلعالار دا بار. 35 تريلليون تەڭگە اۋدارعان. بۇل - ۇلتتىق بانكتىڭ بەرگەن مالىمەتى. بيىلعى جىلى 43 تريلليون اقشا اۋدارىلعان. كاسىپكەرلىك ماقساتتا دا، جەكە ماسەلەدە دە".
دەمەك، قىرۋار قارجى «كولەڭكەلى بيزنەسكە» كەتتى. سوندىقتان ەندى ونلاين اقشا بەرۋدىڭ اراجىگى انىقتالادى.
ءسىز ەگەر كاسىپكەرگە قىزمەتى ءۇشىن قارجى اۋدارساڭىز، ول - «تولەم» دەپ اتالاتىن بولادى. ال ەگەر تۋىسىڭىزعا كارتوچكاڭىزدان قارجى بولسەڭىز، «اۋدارىم» دەگەن تەتىكتى تاڭداۋىڭىز كەرەك. ءبىرىنشى ءۇشىن سالىق بار، ەكىنشىسىنە ول قاراستىرىلمايدى.
ولجاس وتار، ق ر قارجى مينيسترلىگى مەملەكەتتىك كىرىستەر كوميتەتى باسقارما باسشىسىنىڭ ورىنباسارى:
"اعايىن-تۋىستاردىڭ اراسىنداعى اقشا اۋدارىمدارىنا ەشقانداي سالىق سالىنبايدى. سونىمەن قاتار، ءسىزدىڭ تويىڭىزعا 200 ادام كەلىپ، ءبىر كۇندە توي اقىسىن موبيلدىك قوسىمشا ارقىلى جىبەرسە دە بۇدان سالىق الىنبايدى. سەبەبى، بۇل سىزگە توي اقىسى دەپ بەرىپ جاتقان اقشا. سونى ءتۇسىنۋىمىز كەرەك".
سونداي-اق، وسى كۇنى بۇل جاڭاشىلدىققا تاكسي قىزمەتىندەگىلەر دە نارازى. ادام تاسىمالدايتىندار ونسىز دا «تاپقانىمىزدى مەملەكەتكە بەرگىمىز كەلمەيدى» دەگەندى العا تارتادى. الايدا جەكە كاسىپ ەتۋشىلەردىڭ بارلىعى دا سالىق تولەۋى مىندەتتى.
الىبەك ءابدىلوۆ، ق ر قارجى مينيسترلىگىنىڭ باسپا ءسوز حاتشىسى:
تاكسي جۇرگىزۋشىلەر پاتەنت نەگىزىندەگى ارنايى رەجيمدى قولدانا الادى. ونىڭ مولشەرلەمەسى جالپى كىرىستىنىڭ نەبارى 1 پايىزىن قۇراپ وتىر. مىسالى، تاپقان تابىسى 300 مىڭ تەڭگە بولسا، سالىق نەبارى 3 مىڭ تەڭگە عانا بولادى. بۇل رەتتە كاسسالىق اپپاراتتاردى دا ساتىپ الۋدىڭ قاجەتى جوق. ويتكەنى ونلاين ءموبيلدى قوسىمشالاردىڭ تەگىن نۇسقالارى بار.
«ارالىق سالىق جۇيەسى» دەگەن دە بار ەكەن. وعان ەش قۇجاتسىز جالدامالى جۇمىس ىستەيتىندەر كىرەدى. مىسالى، كۇنىنە بىرنەشە ساعات بالا باعۋشى، جەكە كۋرستارىن ساتۋشى دەگەندەي. وسىندايلار تاپقان تابىسىنان 2917 تەڭگە نەمەسە ءبىر ايلىق ەسەپتىك كورسەتكىشىن بولسە، مەملەكەت ونى سول ادامنىڭ تابىس سالىعى، زەينەتاقى قورى، مەديسينالىق ساقتاندىرۋ قورىنا بولەدى.
ياعني، مۇنداي ادامدار كەيىن ۇكىمەتتەن بولىنەتىن جان-جاقتى كومەككە ءۇمىتتى بولا الادى.
https://www.youtube.com/watch؟v=YSE7RMW9stU
