قازىبەكوۆانىڭ ۋەجٸ
مەجٸلٸس دەپۋتاتىنىڭ ايتۋىنشا جاڭا تالاپ شاعىن كەسٸپكەرلەردٸڭ جولىن كەسٸپ, ۆاليۋتا ساتۋ ٸسٸندە «كٶلەڭكەلٸ بيزنەستٸڭ» ٶركەندەۋٸنە ەسەر ەتۋٸ مٷمكٸن. سونىمەن قاتار, دەپۋتات جاڭا تالاپ ٸرٸ قارجى ۇيىمدارى مەن بانكتەردٸڭ مٷددەسٸن كٶزدەيتٸنٸن دە جاسىرماپتى.
– شاعىن كەسٸپكەرلٸك سالاسىن ادامداردى جۇمىسپەن قامتيتىن سالا دەپ قاراماۋ كەرەك, سونىمەن قاتار بۇل سالانى قىزمەت كٶرسەتۋ سالاسىن دامىتۋشى ەكەنٸن دە ۇمىتپاعان جٶن. وسىعان دەيٸن شاعىن ۆاليۋتا ايىرباستاۋ نىساندارى قولايلى كۋرسپەن حالىقتىڭ ۆاليۋتاسىن ايىرباستاپ, قىزمەت كٶرسەتٸپ كەلدٸ. ول كٷندٸز-تٷنٸ جۇمىس ٸستەدٸ. ال بانكتەر تٷندە بٶلٸمشەلەرٸن اشىپ, بٸرلٸ-جارىم كليەنتتٸڭ اقشاسىن ايىرباستاپ بەرمەيدٸ. ٶزبەكستاننىڭ قارجى سالاسىندا دەل وسىعان ۇقساس رەفورما جٷرٸپ, قاراپايىم حالىق تيمٸدٸ باعادا قولىنداعى ۆاليۋتاسىن ايىرباستاي الماي قينالعانى ەسٸمدە. بٸزگە مۇنىڭ قاجەتٸ قانشا? – دەپ مەرۋەرت قازىبەكوۆا كٶكەيدە جٷرگەن ويىن ورتاعا سادى.
ٶز كەزەگٸندە مەجٸلٸس دەپۋتاتى «اق جول» پارتيياسىنىڭ ايماقتاعى فيليالدارىنان ۇلتتىق بانكتىڭ جاڭا تالاپتارىنا قارسى شاعىن كەسٸپكەرلەردەن حاتتار كٶپتەپ كەلٸپ جاتقانىن ايتتى.
100 ملن تەڭگە
جاڭا تالاپ بويىنشا بۇدان بىلاي رەسپۋبليكالىق ماڭىزى بار قالالاردا ورنالاسقان ۆاليۋتا ايىرباستاۋ پۋنكتتەرٸنٸڭ كاسساسىنداعى قارجىسى 100 ملن تەڭگەدەن كەم بولماۋى كەرەك ەكەن (بۇرىنعى تالاپتا 30 ملن تەڭگە). شاعىن ۆاليۋتا ايىرباستاۋ پۋنكتتەرٸندە مۇنشاما قىرۋار قارجى قايدان بولسىن. ەربولات دوساەۆ باستاعان ۇلتتىق بانكتىڭ ماماندارى بۇعان باس اۋىرتپاعان سىڭايلى.
– «كاسساداعى قارجى قورىنىڭ تٶمەنگٸ شەگٸ 100 ملن تەڭگە بولۋى كەرەك» دەگەن تالاپتى اقىلعا سيدىرا المادىم. ۇلتتىق بانك كاسسادا 100 ملن تەڭگە بولسا بۇل ەلٸمٸزدەگٸ كەسٸپكەرلٸكتٸ دامىتاتىنىن ايتۋدا. قازٸر ەشكٸم قولىنداعى 300 مىڭ دوللارىن بٸرٸنشٸ كەزدەسكەن ۆاليۋتا ايىرباستاۋ پۋنكٸتٸنە بارىپ, تەڭگەگە اينالدىرىپ المايدى. مۇنداي جاعداي بولسا دا, ٶتە سيرەك كەزدەسۋٸ مٷمكٸن. سوندىقتان ۇلتتىق بانكتىڭ جاڭا تالابى لوگيكاعا سىيمايدى, – دەدٸ دەپۋتات.
جاڭا تالاپتا ۆاليۋتا ايىرباستاۋ پۋنكتتەرٸنٸڭ ۋاقىتىن قىسقارتۋ ٸسٸ دە نازاردان تىس قالماپتى. ەگەر ۇلتتىق بانكتىڭ تالابىنا ٷكٸمەت توقتاۋ سالماسا, بۇدان بىلاي ۆاليۋتا ايىرباستاۋ پۋنكتتەرٸ قاس قارايعانشا جۇمىس ٸستەمەيدٸ.
كاسسير قىزدى الىستان تانيتىن بولدىق
بۇل تالاپ شاعىن كەسٸپكەرلەردٸ بىلاي قويعاندا قاراپايىم حالىق ٷشٸن دە تيٸمسٸز بولىپ تۇر. جۇمىس اراسىندا 100 دوللاردى تەڭگەگە ايىرباستاۋ ٷشٸن كٶشە كەزٸپ كەتكەن قىزمەتكەرٸن باستىعى باسىنان سيپاي قويماسى انىق.
تاعىدا ايتاساق, ۇلتتىق بانكتىڭ جاڭا تالابى بويىنشا ۆاليۋتا ايىرباستاۋ پۋنكتٸنٸڭ يەلەرٸ كٷزەت جالداپ, كاسسيردٸڭ قاۋٸپسٸزدٸگٸ قامتاماسىز ەتۋ ٷشٸن وققاعار جالداۋى كەرەك ەكەن (ينكاساتوردىڭ كٶمەگٸنە جٷگٸنٸڭدەر دەمەگەنٸنە شٷكٸر). الداعى ۋاقىتتا ەدەمٸ قىزدىڭ قاسىندا بەس قارۋىن اسىنعان بٸرەۋ جٷرسە, ەلگٸ بويجەتكەننٸڭ ۆاليۋتا ايىرباستاۋ پۋنكتٸندە ٸستەيتٸن كاسسير قىز ەكەنٸن الىستان تانيتىن بولدىق.
جاعداي وسىنداي. ەربولات دوساەۆتىڭ تىڭ يدەيالارىنا «اق جول» پارتيياسى قارسى تۇرىپ, قوعامعا ٶزٸنٸڭ ساياسي سالماعىن كٶرسەتۋگە بەكٸنٸپتٸ.
نۇرلان جۇماحان
