بۇگىن سول جاعالاۋداعى «قايسار ارەنا» ستاديونىندا قىزىلوردا قالاسىنىڭ استانا بولعانىنا 100 جىل تولۋىنا جانە قالا كۇنىنە ارنالعان «مەرەيلى مەرەكەڭمەن،قىزىلوردا» اتتى گالا-كونسەرت ءوتتى، دەپ حابارلايدى Dalanews.kz.
وعان اباي وبلىسىنىڭ اكىمى بەرىك ءۋالي، پارلامەنت سەناتى مەن ءماجىلىسىنىڭ دەپۋتاتتارى، مەملەكەت جانە قوعام قايراتكەرلەرى، قازاقستاننىڭ ەڭبەك ەرلەرى، عالىمدار، ونەر مايتالماندارى، رەسپۋبليكانىڭ بارلىق وڭىرىنەن كەلگەن وبلىستىق ءماسليحات ءتوراعالارى ارنايى قاتىستى.
مەرەكە باستاۋىنداعى استانانى ورىنبوردان اقمەشىتكە كوشىرۋ جانە كيرگيز اكسر-نىڭ قازاق اكسر دەپ وزگەرتىلۋى، قالاعا قىزىلوردا اتاۋىنىڭ بەرىلۋى، اقمەشىتكە قاراي باعىت العان «قىزىل پاراۆوز»، الاش ارىستارىنىڭ بەينەلەرى، تاريح جەلىسىنەن ساباقتالعان كورىنىستەر سول ءداۋىردى كوپشىلىكتىڭ كوز الدىنا اكەلگەندەي اسەر قالدىردى. ودان كەيىن ەكرانداعى كورىنىستەر جاڭارعان، جاڭعىرعان قىزىلوردانىڭ بۇگىنگى جاسامپاز كەلبەتىنە اۋىستى.
ايماق باسشىسى نۇرلىبەك نالىبايەۆ جۇرتشىلىقتى مەرەيلى مەرەكەمەن قۇتتىقتادى.
«ءبىر عاسىر بۇرىن قازاق رەسپۋبليكاسىنىڭ العاشقى استاناسى بولعان قىزىلوردادا مەملەكەتتىگىمىزدىڭ نەگىزى قالاندى. سول كەزەڭدە قالامىز ەلىمىزدىڭ ساياسي، مادەني-رۋحاني ورتالىعىنا اينالدى. ۇلتتىق ونەر مەن عىلىمنىڭ، ءبىلىم مەن ءباسپاسوزدىڭ التىن قازىعى وسىندا قاعىلدى. شەجىرەلى شاھارىمىزدىڭ ەلدىك اسىل مۇراتى، جاسامپاز جولى قالىپتاستى. ۇلتىمىزعا «قازاق» اتاۋىن قايتارىپ، ازات ەل بولۋدى اڭساعان اسقاق ارمان ورىندالدى. تىلەگى مەن ماقساتى ورتاق الاش ارىستارى ۇلت مۇددەسى ءۇشىن تاۋەلسىز ەل بولۋعا بىرىكتى. «وتان – ەلدىڭ اناسى، ەل – ەردىڭ اناسى! سىر – الاشتىڭ اناسى!».
ءجۇز جىلدا بىرنەشە كەزەڭدى باسىنان وتكەرگەن قىزىلوردا بۇگىنگى كۇنى پرەزيدەنتىمىزدىڭ ەرەكشە قولداۋىمەن ساۋلەتتى دە اسەم قالاعا اينالىپ كەلەدى. سىر ءوڭىرى جاسارىپ-جاڭارىپ، وسىپ-وركەندەۋدە. سوڭعى ءۇش جىلدا ايماق ەكونوميكاسىنا 1 تريلليون 600 ملرد. تەڭگەگە جۋىق ينۆەستيسيا تارتىلدى. وبلىس بيۋدجەتى 851 ملرد. 300 ملن. تەڭگەگە جەتىپ، 2022 جىلدان بەرى 233 پايىزعا ءوستى. بۇل قاراجات ايماعىمىزدىڭ ەڭ وزەكتى دەگەن ماسەلەلەرىن شەشۋگە، تۇرعىندارىمىزدىڭ تۇرمىس ساپاسىن جاقسارتۋعا باعىتتالدى. ەڭ عاجاپ قالا – ول ادامنىڭ باقىتتى بولعان جەرى. بارشامىزدى باقىت قۇشاعىنا العان قىزىلوردا – ءبىزدىڭ ماقتانىشىمىز.
مەرەيلى مەرەكەدە دەندەرىڭىزگە ساۋلىق، وتباسىلارىڭىزعا باق-بەرەكە تىلەيمىن! ەگەمەن ەلىمىزدىڭ ەڭسەسى بيىك، تاۋەلسىزدىگى تۇعىرلى بولعاي! مەرەكە قۇتتى بولسىن، ءقادىرلى جەرلەستەر!»، – دەدى نۇرلىبەك ماشبەك ۇلى.
گالا كونسەرتتە ەسترادا انشىلەرى ج.ىسقاقوۆا، گ.ورازىمبەتوۆا، م.ءسادۋاقاسوۆا، ج.تولەباي «ءبىزدىڭ قىزىلوردا» ءانىن شىرقادى. سونداي-اق، ك.ءالىمجان، ت.ءتورالى، و.نۇرالييەۆ، تاعى باسقا ونەرپازدار كورەرمەنگە كوتەرىڭكى كوڭىل-كۇي سىيلادى.
ساحنا ءسانى، بي قويىلىمدارى مەن بەينەروليكتەر، ارنايى دايىندالعان تاقىرىپتىق درون شوۋ قالا كۇنىنىڭ مازمۇنىن بايىتا ءتۇستى. سالتاناتتى شارانىڭ شارىقتاۋ شەگىندە مەرەكە اسپانىن مىڭ بوياۋلى وتشاشۋلار جارقىراتتى.
