شەرزات بولاتتىڭ اكەسى قارجاۋباي نۇرىموۆ سوت بىتكەننەن كەيىن ەل الدىنا شىعىپ، اشىق سۇحبات بەردى، دەپ حابارلايدى Dalanews.kz.
قارجاۋباي نۇرىموۆ بۇل ىسكە ايتبەك امانگەلدى قالاي ارالاسقانىن ايتتى.
"بىرنەشە ادۆوكات ىزدەدىك، حابارلاستىق. تالعاردان ەشقانداي ادۆوكات المايمىن دەپ شەشتىم. ءسويتىپ جۇرگەندە ايتىمدى ءبىر تۋىسىمىز شاقىرعان ەكەن. باسىندا بىلگەن جوقپىن. ءوزىنىڭ باسىندا دا قايعىسى بار ازامات تۇسىنەدى دەپ ويلادىم. ايتىم جايلى، ونىڭ ادۆوكاتتارى جايلى ەشقانداي جامان سۇحبات بەرە المايمىن. جاقسى ادام جاقسىلىعىن، جامان ادام جاماندىعىن ىستەيدى. ...جاقسى ادام قاي جەردە بولسا دا جارتى جولدا لاقتىرمايدى دەپ ويلايمىن. ولار ادۆوكات تابا الماي قينالادى دەپ ويلاعان شىعار... سوت وتكەننەن كەيىن ايتبەك جاقسى، جامان دەپ ايتۋدىڭ پايداسى جوق. ول مەنى قارالاعانىمەن قۇداي كورىپ تۇر"، - دەدى ول جۋرناليست رۋسلان وتەپبايعا بەرگەن سۇحباتىندا.
مارقۇمنىڭ اكەسىنەن ايتبەك پەن ونىڭ ادۆوكاتتارى ءبىر ادام عانا كىسى ءولتىرۋ بابى بويىنشا، قالعاندارى بۇزاقىلىق بويىنشا ايىپتالىپ وتىرعانىن حابارلاعان-حابارلاماعانى سۇرالدى.
"مەيىرمان اعادان ەستىدىم. باسىندا سوتقا دا قاتىسپايمىن دەگەنمىن. بىرەۋ سوتتالىپ، بىرەۋ اۋىر جاعدايعا ءتۇسسىن دەمەدىم، قولىمنان كەلگەنشە سوتتالۋشىلاردىڭ اقتالۋىنا مۇمكىندىك بەردىم. سوتتان قاشقانىم جوق. ولار "قارجاۋباي ءبارىن ارانداتتى" دەگەن ويمەن ىستەدى عوي. قازاقستاننان كەتۋىمە كوپتەگەن سەبەپ بولدى. ءبىر ەمەس، بىرنەشە جاعداي بولدى. اشىپ ايتۋدىڭ قاجەتى جوق. ءۇي ماسەلەسى، باۋىرىمنىڭ ماسەلەسى، تەرگەۋ يزولياتورىندا وتىرعان كەزدە دە. سول جەردە دە كوپ دۇرىس ەمەس شەشىم بولدى. سودان كەيىن بوي تاسالاپ، باسقا مەملەكەتتە بولۋىمدى قالادىم. اقشا جيناۋ باستالىپ كەتتى. وعان مەنىڭ قاتىسىم جوق. حالىقتى ارانداتپاۋ كەرەك بولدى. "ميتينگىگە شىعىپ كەتۋ" دەگەن سياقتى ويمەن جان-جاقتان جىگىتتەر حابارلاسىپ كەتتى. باسىنان باستاپ ايتىپ كەلە جاتىرمىن: ەشكىمنەن قورىقپايمىن، ءوز سوزىمە جاۋاپ بەرەمىن، مەن ەل بۇلىنگەنىن قالامادىم. ۇكىمەتكە قارسى پىكىر تۋىنداسىن دەگەن وي بولعان جوق. مەن تەك ادىلدىك سۇرادىم.
ءبىز سول ءتۇندى ويلاساق جىندى بولىپ كەتە جازدايمىز. ونى حالىق كوردى. ءىستى كورىپ-بىلىپ تۇرىپ قۇزىرلى ورگاندار ءبىر عانا بريفينگ جۇرگىزدى. مەنىڭ پىشاق الىپ شىققانىمدى (كورسەتىپ - ەسك.). ول پىشاقپەن ەشكىمدى جاراقاتتاعان جوقپىن، ەشكىمگە سىلتەگەنىم جوق. سول جەردە بالامنىڭ اياۋسىز ءولتىرىلىپ جاتقانىن نەگە تالداپ ايتپايدى؟! سۋرەتپەن نەگە كورسەتپەيدى؟! مەنىڭ شىققانىمدى عانا كورسەتەدى"، - دەدى قارجاۋباي نۇرىموۆ سۇحبات بارىسىندا.
ول ايتبەكپەن جۇمىس ىستەۋدەن نەلىكتەن باس تارتقانىن دا ءتۇسىندىردى.
"باۋىرىم نۇرعانات قايتىس بولعان كەزدە "نۇرعانات اسىلىپ ءولىپ قالدى" دەپ ايتتى. بۇكىل حالىققا. كەيىن تۋىستارىم "ول تەرگەۋشى، زاڭگەر ەمەس، نەگە حالىققا ونداي سۇحبات بەرەدى؟" دەۋىنەن باستالدى. حالىقتى دۇرلىكتىرمەۋ ءۇشىن سولاي ايتۋ كەرەك بولعان شىعار دەپ ول كەزدە دە تۋىستارىمدى توقتاتقانمىن. بولماسا باسىندا سونداي سۇحبات بەرگەننەن باستاپ ايتبەكتەن باس تارتقىسى كەلدى. كەيىن ايتىممەن جولىققاندا ول كىسىگە تۇسىندىرگەنمىن. "قانداي دا ءبىر تۋىسىم، باۋىرىم نەمەسە انام حابارلاسىپ نەمەسە ءوزىڭ حابارلاسىپ، ءبىر شەشىمگە كەلۋدىڭ قاجەتى جوق. بۇل مەنىڭ بالام، مەن جاۋاپ بەرەمىن، مەنىمەن سويلەس، ەشكىمدى ارالاستىرما" دەگەنمىن. بىرنەشە جاعداي بولدى عوي. ءوزى قالاي اقتالسىن، مەنى قالاي جامانداسىن، مەنىڭ وعان ەشقانداي رەنىشىم جوق. حالىق ءوزى باعاسىن بەرەدى. بىرەۋدىڭ سىرتىنان عايبات ايتۋدان اۋلاقپىن"، - دەدى ول.
ال ادۆوكات مەيىرمان شەكەيەۆتىڭ سوزىنشە، العاشىندا بۇرىنعى ادۆوكاتتارمەن بىرگە جۇمىس ىستەۋگە دايىن بولعان.
"ايتبەك بايلانىسقا شىقپاي قويعاننان كەيىن باسىممەن كىردىم وسى ىسكە. قارجاۋبايدىڭ "سىزگە امانات" دەگەن ءبىر ءسوزى مۇزداي سۋ قۇيعانداي بولدى"، - دەدى ول.
ادۆوكات ءىس بارىسىندا قانداي قيىندىقتارعا تاپ بولعانىن مالىمدەدى.
"ءبىزدىڭ قۇقىق قورعاۋ ورگاندارىنا تۇبەگەيلى رەفورما كەرەك. بارلىق جەردە رەفورما كەرەك. ءدال تالعاردا عانا قاتەلەر بولدى دەپ، باسقا جەردە قاتەلەر بولماس ەدى دەگەن وي جوق"، - دەدى ول.
مەيىرمان شەكەيەۆ قارجاۋباي نۇرىموۆ ايىپتالۋشىلاردىڭ ىشىندە ءبىر ادامعا عانا ادام ءولتىرۋ بابىمەن ايىپ تاعىلعانىن ەستىگەندە قانداي كۇيدە بولعانىن ايتتى.
"شوك بولدى. اشۋلاندى. "مەن بىلمەيمىن. ءىس ماتەريالدارىن ماعان كورسەتكەن ەمەس" دەدى. مەن "ساعان قالايشا كورسەتپەي، سوتقا جولداندى؟" دەپ تاڭعالدىم"، - دەدى ول.
ادۆوكات بۇل ءىستىڭ بۇلاي سارالانۋىنا قاتىستى پىكىر ءبىلدىردى.
"مەن ءۇشىن جوق (دۇرىس سارالاۋ ەمەس - ەسك.). ءوز تاراپىمنان كەلىسپەيمىن. ...باستاپقىدا نەگىزى بۇلاردىڭ بارىنە 99-باپپەن (ادام ءولتىرۋ) ءىس قوزعالعان. تەرگەۋشىلەرىڭ سونداي قورىتىندىسى بولعان. اينالىپ كەلىپ ءوزىمىزدىڭ ارىپتەسىمىزگە تيەدى. وسىعان شاعىمدانۋعا ارىپتەستەر نيەت بىلدىرمەگەن. قاراشادا ساراپتاما قورىتىندىسى شىعادى. سول كەزدە ءبىر رەت پىشاق سۇققاننان دەپ كورسەتىلەدى. قالعاندارىنىڭ ۇرىپ-سوققانى جەڭىل دارەجەدە سارالانادى. سول كەزدە تەرگەۋشىلەر اۋىستىرعان. ساراپتامنىڭ قورىتىندىسىنان كەيىن دە شاعىم جازۋعا بولار ەدى. ەڭ بولماعاندا كىسى ولتىرۋگە وقتالۋ بابىن (قوسۋ كەرەك ەدى - ەسك.). مىسالى نۇرقياستى سولاي سارالايمىن. ول ادام ولتىرۋگە باعىتتالعان ارەكەت جاسادى، مىلتىقپەن ۇرىپ-سوعىپ جاتىر"، - دەدى ادۆوكات.
شەرزات بولاتتىڭ ءولىمى تۋرالى نە بەلگىلى؟
ەسكە سالايىق، بىلتىر تالعاردا جاپپاي توبەلەس بولىپ، سالدارىنان 16 جاستاعى ءجاسوسپىرىم شەرزات بولات كوز جۇمدى.
كامەلەتكە تولماعان بالانى ءولتىرۋ دەرەگى بويىنشا الماتى وبلىسىنىڭ پوليسيا دەپارتامەنتى قىلمىستىق ءىس قوزعادى. سونداي-اق، ولاردىڭ ءۇيى ورتەنىپ كەتتى.
كوپ ۇزاماي، ياعني 9 جەلتوقساندا مارقۇم شەرزات بولاتتىڭ اعاسى نۇرعانات عايىپبايەۆ اجال قۇشتى. پوليسيا دەپارتامەنتى الدىن الا دەرەكتەر بويىنشا ول سۋيسيد جاساعانىن مالىمدەدى. وعان دالەل رەتىندە پوليسەيلەر نۇرعاناتتىڭ تۋىسىنا مەسسەندجەر ارقىلى جازعان حاتىن جاريا ەتتى.
ال مارقۇم شەرزاتتىڭ اكەسى باۋىرى نۇرعانات عايىپبايەۆتى جەر قوينىنا تاپسىرعاننان كەيىن بۇقارالىق اقپارات قۇرالدارىمەن كەزدەسۋدى تالاپ ەتىپ، كوشەگە شىقتى. الايدا اراعا ۇزاق ۋاقىت سالماي قارجاۋباي نۇرىموۆتى پوليسيا قىزمەتكەرلەرى ۇستاپ اكەتتى. ارتىنشا شەرزات بولاتتىڭ اپكەسى قاماۋعا الىندى. كەيىن قارجاۋباي نۇرىموۆ 15 تاۋلىككە اكىمشىلىك قاماۋعا الىندى.
جۋىردا وسى ءىس بويىنشا سوت شەشىمى شىقتى. تەرگەۋ مالىمەتىنشە، شەرزاتقا پىشاق جاراقاتىن سالعان باستى ايىپتالۋشى ابزال شىناسىل 23 جىلعا باس بوستاندىعىنان ايىرىلدى. راۆيل ساكييەۆ 20 جىلعا سوتتالدى.
قالعان ايىپتالۋشىلار 7 جىلدان 15 جىلعا دەيىن باس بوستاندىعىنان ايىرىلدى. كامەلەتكە تولماعان ى.د. 1،5 جىلعا باس بوستاندىعىنان ايىرىلدى.
