Sherzat Bolattyń ákesi Qarjaýbai Nurymov sot bitkennen keiin el aldyna shyǵyp, ashyq suhbat berdi, dep habarlaidy Dalanews.kz.
Qarjaýbai Nurymov bul iske Aitbek Amangeldi qalai aralasqanyn aitty.
"Birneshe advokat izdedik, habarlastyq. Talǵardan eshqandai advokat almaimyn dep sheshtim. Sóitip júrgende Aitymdy bir týysymyz shaqyrǵan eken. Basynda bilgen joqpyn. Óziniń basynda da qaiǵysy bar azamat túsinedi dep oiladym. Aitym jaily, onyń advokattary jaily eshqandai jaman suhbat bere almaimyn. Jaqsy adam jaqsylyǵyn, jaman adam jamandyǵyn isteidi. ...Jaqsy adam qai jerde bolsa da jarty jolda laqtyrmaidy dep oilaimyn. Olar advokat taba almai qinalady dep oilaǵan shyǵar... Sot ótkennen keiin Aitbek jaqsy, jaman dep aitýdyń paidasy joq. Ol meni qaralaǵanymen Qudai kórip tur", - dedi ol jýrnalist Rýslan Ótepbaiǵa bergen suhbatynda.
Marqumnyń ákesinen Aitbek pen onyń advokattary bir adam ǵana kisi óltirý baby boiynsha, qalǵandary buzaqylyq boiynsha aiyptalyp otyrǵanyn habarlaǵan-habarlamaǵany suraldy.
"Meiirman aǵadan estidim. Basynda sotqa da qatyspaimyn degenmin. Bireý sottalyp, bireý aýyr jaǵdaiǵa tússin demedim, qolymnan kelgenshe sottalýshylardyń aqtalýyna múmkindik berdim. Sottan qashqanym joq. Olar "Qarjaýbai bárin arandatty" degen oimen istedi ǵoi. Qazaqstannan ketýime kóptegen sebep boldy. Bir emes, birneshe jaǵdai boldy. Ashyp aitýdyń qajeti joq. Úi máselesi, baýyrymnyń máselesi, tergeý izoliatorynda otyrǵan kezde de. Sol jerde de kóp durys emes sheshim boldy. Sodan keiin boi tasalap, basqa memlekette bolýymdy qaladym. Aqsha jinaý bastalyp ketti. Oǵan meniń qatysym joq. Halyqty arandatpaý kerek boldy. "Mitingige shyǵyp ketý" degen siiaqty oimen jan-jaqtan jigitter habarlasyp ketti. Basynan bastap aityp kele jatyrmyn: eshkimnen qoryqpaimyn, óz sózime jaýap beremin, men el búlingenin qalamadym. Úkimetke qarsy pikir týyndasyn degen oi bolǵan joq. Men tek ádildik suradym.
Biz sol túndi oilasaq jyndy bolyp kete jazdaimyz. Ony halyq kórdi. Isti kórip-bilip turyp quzyrly organdar bir ǵana brifing júrgizdi. Meniń pyshaq alyp shyqqanymdy (kórsetip - esk.). Ol pyshaqpen eshkimdi jaraqattaǵan joqpyn, eshkimge siltegenim joq. Sol jerde balamnyń aiaýsyz óltirilip jatqanyn nege taldap aitpaidy?! Sýretpen nege kórsetpeidi?! Meniń shyqqanymdy ǵana kórsetedi", - dedi Qarjaýbai Nurymov suhbat barysynda.
Ol Aitbekpen jumys isteýden nelikten bas tartqanyn da túsindirdi.
"Baýyrym Nurǵanat qaitys bolǵan kezde "Nurǵanat asylyp ólip qaldy" dep aitty. Búkil halyqqa. Keiin týystarym "ol tergeýshi, zańger emes, nege halyqqa ondai suhbat beredi?" deýinen bastaldy. Halyqty dúrliktirmeý úshin solai aitý kerek bolǵan shyǵar dep ol kezde de týystarymdy toqtatqanmyn. Bolmasa basynda sondai suhbat bergennen bastap Aitbekten bas tartqysy keldi. Keiin Aitymmen jolyqqanda ol kisige túsindirgenmin. "Qandai da bir týysym, baýyrym nemese anam habarlasyp nemese óziń habarlasyp, bir sheshimge kelýdiń qajeti joq. Bul meniń balam, men jaýap beremin, menimen sóiles, eshkimdi aralastyrma" degenmin. Birneshe jaǵdai boldy ǵoi. Ózi qalai aqtalsyn, meni qalai jamandasyn, meniń oǵan eshqandai renishim joq. Halyq ózi baǵasyn beredi. Bireýdiń syrtynan ǵaibat aitýdan aýlaqpyn", - dedi ol.
Al advokat Meiirman Shekeevtiń sózinshe, alǵashynda burynǵy advokattarmen birge jumys isteýge daiyn bolǵan.
"Aitbek bailanysqa shyqpai qoiǵannan keiin basymmen kirdim osy iske. Qarjaýbaidyń "sizge amanat" degen bir sózi muzdai sý quiǵandai boldy", - dedi ol.
Advokat is barysynda qandai qiyndyqtarǵa tap bolǵanyn málimdedi.
"Bizdiń quqyq qorǵaý organdaryna túbegeili reforma kerek. Barlyq jerde reforma kerek. Dál Talǵarda ǵana qateler boldy dep, basqa jerde qateler bolmas edi degen oi joq", - dedi ol.
Meiirman Shekeev Qarjaýbai Nurymov aiyptalýshylardyń ishinde bir adamǵa ǵana adam óltirý babymen aiyp taǵylǵanyn estigende qandai kúide bolǵanyn aitty.
"Shok boldy. Ashýlandy. "Men bilmeimin. Is materialdaryn maǵan kórsetken emes" dedi. Men "saǵan qalaisha kórsetpei, sotqa joldandy?" dep tańǵaldym", - dedi ol.
Advokat bul istiń bulai saralanýyna qatysty pikir bildirdi.
"Men úshin joq (durys saralaý emes - esk.). Óz tarapymnan kelispeimin. ...Bastapqyda negizi bulardyń bárine 99-bappen (Adam óltirý) is qozǵalǵan. Tergeýshileriń sondai qorytyndysy bolǵan. Ainalyp kelip ózimizdiń áriptesimizge tiedi. Osyǵan shaǵymdanýǵa áriptester niet bildirmegen. Qarashada saraptama qorytyndysy shyǵady. Sol kezde bir ret pyshaq suqqannan dep kórsetiledi. Qalǵandarynyń uryp-soqqany jeńil dárejede saralanady. Sol kezde tergeýshiler aýystyrǵan. Saraptamnyń qorytyndysynan keiin de shaǵym jazýǵa bolar edi. Eń bolmaǵanda kisi óltirýge oqtalý babyn (qosý kerek edi - esk.). Mysaly Nurqiiasty solai saralaimyn. Ol adam óltirýge baǵyttalǵan áreket jasady, myltyqpen uryp-soǵyp jatyr", - dedi advokat.
Sherzat Bolattyń ólimi týraly ne belgili?
Eske salaiyq, byltyr Talǵarda jappai tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boiynsha Almaty oblysynyń Politsiia departamenti qylmystyq is qozǵady. Sondai-aq, olardyń úii órtenip ketti.
Kóp uzamai, iaǵni 9 jeltoqsanda marqum Sherzat Bolattyń aǵasy Nurǵanat Ǵaiypbaev ajal qushty. Politsiia departamenti aldyn ala derekter boiynsha ol sýitsid jasaǵanyn málimdedi. Oǵan dálel retinde politseiler Nurǵanattyń týysyna messendjer arqyly jazǵan hatyn jariia etti.
Al marqum Sherzattyń ákesi baýyry Nurǵanat Ǵaiypbaevty jer qoinyna tapsyrǵannan keiin buqaralyq aqparat quraldarymen kezdesýdi talap etip, kóshege shyqty. Alaida araǵa uzaq ýaqyt salmai Qarjaýbai Nurymovty politsiia qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keiin Qarjaýbai Nurymov 15 táýlikke ákimshilik qamaýǵa alyndy.
Jýyrda osy is boiynsha sot sheshimi shyqty. Tergeý málimetinshe, Sherzatqa pyshaq jaraqatyn salǵan basty aiyptalýshy Abzal Shynasyl 23 jylǵa bas bostandyǵynan aiyryldy. Ravil Sakiev 20 jylǵa sottaldy.
Qalǵan aiyptalýshylar 7 jyldan 15 jylǵa deiin bas bostandyǵynan aiyryldy. Kámeletke tolmaǵan Y.D. 1,5 jylǵa bas bostandyǵynan aiyryldy.
