Batys Qazaqstan oblysynyń Jánibek aýdanynda dala órtin sóndirý kezinde tótenshe jaǵdailar departamentiniń qyzmetkeri qaza tapty, dep habarlaidy dalanews.kz.
Qaiǵyly oqiǵa 3 qyrkúiekte qystaq aýmaǵynda bolǵan. Áleýmettik jelide taraǵan málimetke qaraǵanda, qutqarýshy órt sóndirý kóliginiń astynda qalǵan. Kólik tizgininde onyń áriptesi bolǵan. Aldyn ala aqparat boiynsha, júrgizýshi qoiý tútinnen qyzmetkerdi baiqamai qalǵan.
Oblystyq tótenshe jaǵdailar departamenti qyzmetkerdiń qaza tapqanyn rastady. Alaida oqiǵanyń naqty mán-jaiyn jariialamady.
«Órtti sóndirý kezinde qyzmettik mindetin atqaryp júrgen TJD qyzmetkeri jaraqat aldy. Ol aýrýhanaǵa jetkizilgenimen, dárigerlerdiń kómegine qaramastan kóz jumdy», – delingen vedomstvo habarlamasynda.
Qazir atalǵan derek boiynsha tekserý júrgizilip, oqiǵanyń barlyq mán-jaiy anyqtalyp jatyr.
Departament marqumnyń otbasyna qajetti kómek kórsetilgenin, sonyń ishinde jerleý rásimin uiymdastyrýǵa qoldaý bildirilgenin habarlady.
