وسى ۋاقىتقا دەيىن 40 مىڭعا جۋىق تۇرعىنى بار شۋ قالاسى مەن قونايەۆ، اقسۋ، دۋلات جانە تولە بي سىندى اۋىلدىق وكرۋگتەردە ۇيىمداستىرىلعان جارمەڭكە كەلەسى كەزەكتە العا اۋىلدىق وكرۋگىنە قاراستى ساۋىتبەك اۋىلىنىڭ تۇرعىندارى ءۇشىن دە وتكىزىلدى. جارمەڭكەنىڭ اشىلۋ سالتاناتىندا اۋدان اكىمدىگىنىڭ مەملەكەتتىك قۇقىقتىق بولىمشەسىنىڭ باسشىسى رايحان امانعازييەۆا العا ورتا مەكتەبىنىڭ ءماجىلىس زالىنا جينالعان اۋىل تۇرعىندارىنا شارانىڭ ماقساتى مەن مىندەتىن اتاپ ءوتىپ، ونىڭ تۇرعىندار ءۇشىن تيىمدىلىگىن ءتۇسىندىردى.
تۇرعىندار اۋىل شارۋاشىلىعى، ءبىلىم، ۆەتەريناريا، جەر قاتىناستارى، جۇمىسپەن قامتۋ جانە الەۋمەتتىك باعدارلامار بولىمدەرى، احات، جانە اۋداندىق ادىلەت باسقارماسى، اۋدان بويىنشا مەملەكەتتىك كىرىستەر باسقارماسى، اۋداندىق ىشكى ىستەر ءبولىمىنىڭ كوشى-قون قىزمەتى، اۋداندىق حالىققا قىزمەت كورسەتۋ ورتالىعى، جۇمىسپەن قامتۋ ورتالىعى ماماندارىنا كوكەيدەگى ساۋالدارىن قويىپ، تيىسىنشە جاۋاپتار الا الدى. جارمەڭكە بارىسىندا تۇرعىنداردىڭ باسىم كوپشىلىگىن مازالايتىن جەر، ءتۇرعىن-ۇي كەزەگىنە ورنالاسۋ، زەينەتاقى اۋدارىمدارى تۋرالى انىقتاما الۋ، كوممۋنالدىق قىزمەتتەردى تولەۋ، بالا-باقشاعا بالالاردى كەزەككە قويۋ، جەكە ەلەكتروندى كىلت الۋ سىندى ساۋالدار قويىلدى. باسقوسۋ سوڭىندا تۇرعىندارعا «Digital agent»، «Egovbot» تۋرالى بروشيۋرالار جانە «E-gov» ەمبلەماسى بار كرۋجكالار تاراتىلدى. بۇل باعىتتاعى جۇمىستار الداعى ۋاقىتتا دا جالعاسا بەرمەك. دالىرەك ايتقاندا، اتالمىش جارمەڭكە شۋ اۋدانىنا قاراستى كوكقاينار، شوقپار، اقتوبە جانە ت.ب. ەلدى-مەكەندەردە ءوز جالعاسىن تاپپاق. بۇل ءوز كەزەگىندە تۇرعىندار ءۇشىن قولايلى بولىپ تۇر. سەبەبى، كوكەيدەگى ساۋالدارعا اۋىلدان قارىس قادام اتتاماي-اق، تۇشىمدى جاۋاپ الۋعا بولادى.
جامبىل وبلىسى
شۋ اۋدانى
