Memlekettik qyzmet jármeńkesiniń bereri kóp
Osy ýaqytqa deiin 40 myńǵa jýyq turǵyny bar Shý qalasy men Qonaev, Aqsý, Dýlat jáne Tóle bi syndy aýyldyq okrýgterde uiymdastyrylǵan jármeńke kelesi kezekte Alǵa aýyldyq okrýgine qarasty Saýytbek aýylynyń turǵyndary úshin de ótkizildi. Jármeńkeniń ashylý saltanatynda aýdan ákimdiginiń memlekettik quqyqtyq bólimshesiniń basshysy Raihan Amanǵazieva Alǵa orta mektebiniń májilis zalyna jinalǵan aýyl turǵyndaryna sharanyń maqsaty men mindetin atap ótip, onyń turǵyndar úshin tiimdiligin túsindirdi.
Turǵyndar aýyl sharýashylyǵy, bilim, veterinariia, jer qatynastary, jumyspen qamtý jáne áleýmettik baǵdarlamar bólimderi, AHAT, jáne aýdandyq ádilet basqarmasy, aýdan boiynsha memlekettik kirister basqarmasy, aýdandyq ishki ister bóliminiń kóshi-qon qyzmeti, aýdandyq halyqqa qyzmet kórsetý ortalyǵy, jumyspen qamtý ortalyǵy mamandaryna kókeidegi saýaldaryn qoiyp, tiisinshe jaýaptar ala aldy. Jármeńke barysynda turǵyndardyń basym kópshiligin mazalaityn jer, turǵyn-úi kezegine ornalasý, zeinetaqy aýdarymdary týraly anyqtama alý, kommýnaldyq qyzmetterdi tóleý, bala-baqshaǵa balalardy kezekke qoiý, jeke elektrondy kilt alý syndy saýaldar qoiyldy. Basqosý sońynda turǵyndarǵa «Digital agent», «Egovbot» týraly broshiýralar jáne «E-gov» emblemasy bar krýjkalar taratyldy. Bul baǵyttaǵy jumystar aldaǵy ýaqytta da jalǵasa bermek. Dálirek aitqanda, atalmysh jármeńke Shý aýdanyna qarasty Kókqainar, Shoqpar, Aqtóbe jáne t.b. eldi-mekenderde óz jalǵasyn tappaq. Bul óz kezeginde turǵyndar úshin qolaily bolyp tur. Sebebi, kókeidegi saýaldarǵa aýyldan qarys qadam attamai-aq, tushymdy jaýap alýǵa bolady.
Jambyl oblysy
Shý aýdany
