بۇل تالاپتى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا قويدى، دەپ جازادى Dalanews.kz.
"ينۆەستورلارعا، مىسالى، 50 ميلليون دوللاردان كوپ قارجى سالۋعا دايىن ءىرى كومپانيالارعا «ءبىر تەرەزە» قاعيداسىمەن جان-جاقتى قولداۋ كورسەتكەن ءجون. سونىمەن قاتار، جوبالاردىڭ ىسكە اسىرىلۋىن قاداعالايتىن ءتيىمدى مونيتورينگ جۇيەسىن ىسكە قوسۋ كەرەك.
مەملەكەتتىك ورگاندار پايداسى جوق پرەزەنتاسيالار مەن ءىس-شارالار وتكىزۋمەن اۋەستەنبەۋگە ءتيىس. مەكەمە باسشىلارىنىڭ شەتەلگە جاساعان ءاربىر ءىسساپارى ناقتى ناتيجە بەرۋگە ءتيىس. ساپار قورىتىندىسى بويىنشا ۇكىمەت باسشىلىعىنا، نەمەسە، قاجەت بولعان جاعدايدا پرەزيدەنتكە ەسەپ بەرىلۋى كەرەك"، - دەدى پرەزيدەنت.
ول ينۆەستيسيالىق جوبالاردى ىسكە اسىرۋعا قاتىستى كەدەرگىلەر، اسىرەسە، ايماقتاردا ءجيى بولىپ تۇراتىنىن جەتكىزدى.
"اكىمدەر ينۆەستيسيا تارتۋدىڭ ورنىنا ەسكى ادەتكە سالىپ، بيۋدجەت قاراجاتىنا سەنىپ وتىرادى. ال، ايماقتارعا بارىپ، جۇمىس ىستەگىسى كەلەتىن ينۆەستور كوپتەگەن توسقاۋىلعا تاپ بولادى. جەرگىلىكتى بيلىك كوپ جاعدايدا ەشقانداي ارەكەت جاسامايدى نە بولماسا ينۆەستوردى اۋرە-سارساڭعا سالادى. سونىڭ كەسىرىنەن كاسىپكەر جوباسىن كەيىنگە شەگەرەدى نەمەسە ءبىرجولا توقتاتۋعا ءماجبۇر بولادى"، - دەدى توقايەۆ.
پرەزيدەنت ايماققا جەكە ينۆەستيسيا تارتۋ اكىمدەردىڭ ەڭ باستى مىندەتىنىڭ ءبىرى بولۋى كەرەك ەكەنىن دە ايتتى. جالپى، بارلىق مەملەكەتتىك ورگان ەل ەكونوميكاسىنا مەيلىنشە كوبىرەك ينۆەستيسيا تارتۋعا باسا ءمان بەرۋگە ءتيىس.
