2025 جىلى قازاقستاندىق فۋتبولدا بٸرقاتار وڭ ٶزگەرٸس بايقالدى. اتاپ ايتقاندا, "قايرات" كلۋبىنىڭ چەمپيوندار ليگاسىنىڭ جالپى كەزەڭٸنە شىعۋى, ەلگە "رەالدىڭ" كەلۋٸ جەنە كلۋبتاردى جەكەشەلەندٸرۋ سالاداعى جاڭا كەزەڭنٸڭ باستالعانىن كٶرسەتتٸ. قازٸردٸڭ ٶزٸندە بەس كلۋب جەكە ينۆەستورلاردىڭ يەلٸگٸنە ٶتٸپ, سالىنعان ينۆەستيتسييا كٶلەمٸ 45 ملرد تەڭگەدەن استى, دەپ حابارلايدى Dalanews.kz.
Qazaq Expert Club ساراپشىسى, فۋتبول فۋنكتسيونەرٸ التاي داۋموۆتىڭ ايتۋىنشا, نارىقتىق مودەلگە كٶشۋ وتاندىق فۋتبولدىڭ دامۋىنا تىڭ سەرپٸن بەرۋٸ مٷمكٸن.
"ۋەفا دەرەكتەرٸنە سٷيەنسەك, قازاقستان پرەمەر-ليگاسى جىل سايىن شامامەن 100 ملن دوللار تابىس ەكەلەدٸ. الايدا سونىڭ نەبەرٸ 5–6 پايىزى عانا كوممەرتسييالىق قىزمەت ەسەبٸنەن قالىپتاسادى. قالعان نەگٸزگٸ قارجى مەملەكەتتٸك دوتاتسييا ارقىلى قامتاماسىز ەتٸلەدٸ", – دەيدٸ ساراپشى.
ونىڭ مەلٸمەتٸنشە, قازاقستاندا فۋتبول سالاسىنا جىل سايىن بيۋدجەتتەن 30 ملرد تەڭگەدەن استام قاراجات بٶلٸنەدٸ. مۇنداي جاعدايدا كلۋبتاردىڭ ٶز بەتٸنشە تابىس كٶزدەرٸن دامىتۋعا ىنتاسى تٶمەندەيدٸ, ٶيتكەنٸ نەگٸزگٸ قارجىلاندىرۋ مەملەكەت ەسەبٸنەن جابىلادى.
ساراپشىنىڭ سٶزٸنشە, ەلەمدٸك تەجٸريبەدە فۋتبول كلۋبتارى تٶرت نەگٸزگٸ باعىت ارقىلى تابىس تابادى. ياعني, تەلەۆيزييالىق قۇقىقتار, بيلەت ساتىلىمى, دەمەۋشٸلٸك جەنە ترانسفەرلەر.
"قازاقستاندا بۇل مودەل ەلٸ تولىق قالىپتاسپاعان. تەلەۆيزييالىق قۇقىقتار ليگا دەڭگەيٸندە تيٸمدٸ مونەتيزاتسييالانباي وتىر, بيلەت ساتۋدان تٷسەتٸن تابىس از – ورتاشا بيلەت باعاسى 2–4 دوللار شاماسىندا. ال ترانسفەر نارىعى ەندٸ عانا دامىپ كەلەدٸ. دەمەۋشٸلٸك ينستيتۋتى بولعانىمەن, كٶپ جاعدايدا ول ەكٸمشٸلٸك جەنە سەرٸكتەستٸك فاكتورلارعا تەۋەلدٸ", – دەدٸ التاي داۋموۆ.
ساراپشى قازاقستانعا ۇقساس جاعدايداعى ەلدەردٸڭ تەجٸريبەسٸنە نازار اۋدارۋدى ۇسىندى.
مەسەلەن, پولشادا ورتالىقتاندىرىلعان كوممەرتسييالىق جٷيە قالىپتاسقان. بۇل ەلدٸڭ فۋتبول ليگاسى جىلىنا شامامەن 300 ملن ەۋرو تابىس تابادى. كلۋبتار تەلەۆيزييالىق قۇقىقتاردان باستاپ ٸشكٸ نارىقتاعى كوممەرتسييالىق باعىتتاردىڭ بەرٸنەن پايدا كٶرەدٸ.
ال سەربييادا ترانسفەرلٸك ەكونوميكاعا باسىمدىق بەرٸلگەن.
"تسرۆەنا زۆەزدا" مەن "پارتيزان" سەكٸلدٸ كلۋبتار جىلىنا 80–90 ملن ەۋروعا دەيٸن تابىس تابادى. ونىڭ 70 پايىزى ترانسفەرلەر مەن ۋەفا تٶلەمدەرٸنەن تٷسەدٸ. بۇل مودەل ويىنشىلاردى دايارلاۋ, ەۋروكۋبوكتارعا قاتىستىرۋ جەنە كەيٸن حالىقارالىق نارىققا ساتۋعا نەگٸزدەلگەن", – دەپ تٷسٸندٸردٸ ساراپشى.
قازٸرگٸ تاڭدا قازاقستاندا فۋتبول ەلٸ دە مەملەكەتتٸك قارجىعا تەۋەلدٸ جەنە ٸشكٸ نارىقتان تابىس تابۋ دەڭگەيٸ شەكتەۋلٸ كٷيٸندە قالىپ وتىر.
التاي داۋموۆتىڭ پٸكٸرٸنشە, تۇراقتى جٷيەگە كٶشۋ ٷشٸن ەكٸ باعىتقا باسىمدىق بەرۋ قاجەت. بٸرٸنشٸسٸ – ٸشكٸ نارىقتى كوممەرتسييالاندىرۋ, ياعني تەلەۆيزييالىق قۇقىقتاردى دامىتۋ, ماتچ كٷنگٸ تابىستى ارتتىرۋ جەنە دەمەۋشٸلەرمەن جٷيەلٸ جۇمىس جٷرگٸزۋ. ەكٸنشٸسٸ – اكادەمييالارعا ينۆەستيتسييا سالىپ, ويىنشىلار دايارلاۋ ارقىلى ترانسفەرلٸك ەكونوميكانى دامىتۋ.
"مەملەكەتتٸڭ قارجىلاندىرۋدى بٸرتٸندەپ قىسقارتا باستاۋى ماڭىزدى قادام. بۇل كلۋبتاردى قارجىلىق دەربەستٸككە يتەرمەلەيدٸ. بٸراق سالانىڭ دامۋىنا كەسٸبي مەنەدجمەنت تە قاجەت. ەگەر فۋتبول مەنەدجمەنتٸ دامىماسا, جٷيە نارىقتىق ەمەس, دوتاتسييالىق كٷيٸندە قالا بەرەدٸ", – دەپ تٷيٸندەدٸ التاي داۋموۆ.
