ەسكە سالا كەتسەك، بۇگىن قازاقستان اۋماعىندا قۇرىلعان بارلىق سايلاۋ ۋچاسكەسىندە داۋىس بەرۋ ءجۇرىپ جاتىر. دەپۋتاتتاردى سايلاۋ بويىنشا داۋىس بەرۋ قازاقستان رەسپۋبليكاسىنىڭ اۋماعىندا جانە ودان تىسقارى جەردە قۇرىلعان 10 060 سايلاۋ ۋچاسكەسىندە جۇرگىزىلۋدە.
سايلاۋ كوميسسيالارى داۋىس بەرۋ ورنى مەن ۋاقىتى تۋرالى دەر ۋاقىتىندا اقپارات بەردى. ەلوردا ۋاقىتىمەن ساعات 08.00-دە جاعداي بويىنشا ەلىمىزدەگى 9 994 سايلاۋ ۋچاسكەسىندە جانە شەت مەملەكەتتەردەگى قازاقستان وكىلدىكتەرى جانىنداعى 17 سايلاۋ ۋچاسكەسىندە داۋىس بەرۋ باستالدى.
كونستيتۋسيالىق مەرزىمگە ساي ءوتىپ جاتقان ءماجىلىس سايلاۋىنا ەلىمىزدە تىركەلگەن 5 ساياسي پارتيا، اتاپ ايتقاندا، «اۋىل» حالىقتىق-دەموكراتيالىق پاتريوتتىق پارتياسى، «Nur Otan» پارتياسى، «ADAL» ساياسي پارتياسى، قازاقستاننىڭ «اق جول» دەموكراتيالىق پارتياسى، «قازاقستاننىڭ حالىق پارتياسى» دەپۋتاتتىق مانداتتان ءۇمىتتى. بۇل پارتيالار بارلىق دەڭگەيدەگى جەرگىلىكتى ءماسليحاتتارعا دا ءوز كانديداتتارىن ۇسىنعان.
ماجىلىسكە 5 پارتيادان بارلىعى 312 كانديدات، ونىڭ ىشىندە: «اۋىل» حالىقتىق-دەموكراتيالىق پاتريوتتىق پارتياسىنان 19؛ «Nur Otan» پارتياسىنان 126؛ «ADAL» ساياسي پارتياسىنان 16؛ قازاقستاننىڭ «اق جول» دەموكراتيالىق پارتياسىنان 38 جانە «قازاقستاننىڭ حالىق پارتياسىنان» 113 ادام بار.
ال جەرگىلىكتى ءماسليحاتتارعا 832، ونىڭ ىشىندە «اۋىل» حدپپ-نان – 158، «Nur Otan» پارتياسىنان - 216، «ADAL» سپ-نان – 215، «اق جول» قدپ-نان – 174، «قازاقستان حالىق پارتياسىنان» 69 پارتيالىق ءتىزىم تىركەلدى.
