مەملەكەت باسشىسى قاسىم-جومارت توقايەۆ ەۋروپالىق قايتا قۇرۋ جانە دامۋ بانكىنىڭ پرەزيدەنتى وديل رەنو-باسسومەن كەزدەستى. قوس تاراپ قازاقستان مەن ەقدب اراسىنداعى ىنتىماقتاستىقتىڭ پەرسپەكتيۆاسىن تالقىلاپ، الەمدىك ەكونوميكانىڭ وزەكتى ماسەلەلەرى بويىنشا پىكىر الماستى، دەپ حابارلايدى Dalanews.kz.
قارجى ۇيىمىمەن بايلانىس ورناتقاننان بەرى ەلىمىز شاعىن جانە ورتا بيزنەس، ەنەرگەتيكا، اۋىل شارۋاشىلىعى سياقتى ءبىرقاتار ستراتەگيالىق سەكتوردا ايتارلىقتاي ناتيجەگە قول جەتكىزگەن.
مەملەكەت باسشىسى ەۋروپالىق قايتا قۇرۋ جانە دامۋ بانكىنىڭ بىرلەسكەن جوبالارعا، سونىڭ ىشىندە "جاسىل ەكونوميكا" باعدارلامالارىن جۇزەگە اسىرۋعا ينۆەستيسيا قۇيۋ نيەتىن قۇپتادى.
وديل رەنو-باسسو ەلىمىزدىڭ ينۆەستيسيالىق الەۋەتىنە جوعارى باعا بەرىپ، قارجى ينستيتۋتى قازاقستاننىڭ ينفراقۇرىلىمدىق تۇرعىدان دامۋىن ودان ءارى قولداۋعا مۇددەلى ەكەنىن مالىمدەدى.
ونىڭ ايتۋىنشا، جاقىندا ۇزىندىعى 234 شاقىرىم بولاتىن اقتوبە – ۇلعايسىن اۆتوجولىن جاڭعىرتۋدى قارجىلاندىرۋ تۋرالى شەشىم قابىلدانعان. بۇل باعىتتىڭ ىشكى جانە حالىقارالىق تاسىمالدى دامىتۋدا ماڭىزى زور.
وديل رەنو-باسسو ەقدب مەن قازاقستان ىنتىماقتاستىعى تابىستى دامىپ كەلە جاتقانىن ايتتى.
ول 2024 جىلى ينۆەستيسيا كولەمى 2023 جىلمەن سالىستىرعاندا ەكى ەسە ارتقانىن، سونىڭ ناتيجەسىندە 1 ميلليارد ەۋروعا جۋىقتاعانىن اتاپ ءوتتى. بۇدان بولەك، بانك باسشىسى قازاقستاننىڭ كولىك الەۋەتىن جانە ەنەرگەتيكا سەكتورىن دامىتۋعا قولداۋ كورسەتۋگە دايىن ەكەنىن راستادى.
ايتا كەتسەك،ءبىر كۇن بۇرىن پرەمەر-مينيستر ولجاس بەكتەنوۆ شەتەلدىك ينۆەستورلار كەڭەسىنىڭ 37ء-شى پلەنارلىق وتىرىسىنا قاتىسۋ ءۇشىن استاناعا كەلگەن ەۋروپالىق قايتا قۇرۋ جانە دامۋ بانكىنىڭ (ەقدب) پرەزيدەنتى وديل رەنو-باسسومەن كەزدەسۋ وتكىزدى. وندا كولىك ينفراقۇرىلىمىن، "جاسىل" ەنەرگەتيكانى، شوب، اۋىل شارۋاشىلىعىن، اقپاراتتىق تەحنولوگيالاردى جانە باسقا دا سالالاردى دامىتۋ جونىندەگى ىنتىماقتاستىق ماسەلەلەرى تالقىلاندى.
