مەملەكەت باسشىسى قاسىم-جومارت توقايەۆ الماتى وبلىسىنىڭ اكىمى مارات سۇلتانعازييەۆتى قابىلداپ، ءوڭىردىڭ الەۋمەتتىك-ەكونوميكالىق دامۋى جانە الماتى اگلومەراسياسىن دامىتۋ جوسپارى تۋرالى ەسەبىن تىڭدادى، دەپ حابارلايدى Dalanews.kz
كەزدەسۋدە ەل پرەزيدەنتىنە ءوڭىر ەكونوميكاسىنىڭ سوڭعى جىلدارداعى نەگىزگى كورسەتكىشتەرى باياندالدى. اكىمنىڭ ايتۋىنشا، سوڭعى ءۇش جىلدا الماتى وبلىسىنىڭ جالپى وڭىرلىك ءونىمى 1،8 ەسە ءوسىپ، 3،4 ترلن تەڭگەدەن 6 ترلن تەڭگەگە دەيىن ۇلعايعان. بيىلعى قاڭتار–قازان ايلارىنداعى قىسقا مەرزىمدى ەكونوميكالىق يندەكس 109،7 پايىزدى قۇرادى.
وبلىستا حالىقارالىق كومپانيالاردىڭ قاتىسۋىمەن تاعام ونەركاسىبى، لوگيستيكا جانە مەتاللۋرگيا باعىتتارىندا جالپى قۇنى 470 ملرد تەڭگەدەن اساتىن 13 ءىرى ينۆەستيسيالىق جوبا جۇزەگە اسىرىلىپ جاتىر.
سۇلتانعازييەۆ وڭدەۋ ونەركاسىبىنىڭ ەكسپورتى بيىلعى توعىز ايدا 28،5 پايىزعا ارتىپ، 618،5 ملن دوللارعا جەتكەنىن اتاپ ءوتتى. ەكسپورتتىڭ 90 پايىزى جوعارى دەڭگەيدە قايتا وڭدەلگەن ونىمدەردەن تۇرادى.
الماتى وبلىسى اۋىل شارۋاشىلىعىنا ارنالعان مەملەكەتتىك سۋبسيديالاردى ءتيىمدى پايدالانۋدا كوش باستاپ تۇرعان وڭىرلەردىڭ ءبىرى. ءبىر تەڭگە سۋبسيدياعا 17 تەڭگەگە دەيىن اۋىل شارۋاشىلىعى ونىمدەرى وندىرىلۋدە. تاۋارلى ءسۇت فەرمالارىنىڭ سانى 11-گە كوبەيگەن.
الەۋمەتتىك دامۋ باعىتىندا بيىل ون ايدا شامامەن 950 مىڭ شارشى مەتر تۇرعىن ءۇي سالىندى. ءۇش اۋىسىمدى مەكتەپتەردىڭ سانى 52-دەن 28-گە دەيىن قىسقاردى.
كەزدەسۋ بارىسىندا وبلىستاعى تۋريزم سالاسىنىڭ دامۋى دا تالقىلاندى. قاپشاعاي سۋ قويماسى مەن ۇلتتىق پاركتەر اۋماعىنداعى تۋريزم كلاستەرىن دامىتۋ جۇمىستارى جۇرگىزىلۋدە. وڭىرگە كەلگەن تۋريستەر سانى 2،2 ملن ادامعا جەتىپ، بىلتىرعى كورسەتكىشپەن سالىستىرعاندا 36 پايىزعا ارتقان.
مەملەكەت باسشىسى مارات سۇلتانعازييەۆكە ءوڭىردىڭ ونەركاسىپ جانە اگرارلىق الەۋەتىن نىعايتۋ، لوگيستيكا، تۋريزم سالالارىن دامىتۋ، سونداي-اق تۇرعىنداردى تولعاندىراتىن وزەكتى ماسەلەلەردى كەشەندى تۇردە شەشۋ جونىندە ءبىرقاتار ناقتى تاپسىرما بەردى.
