مەديسينالىق ساقتاندىرۋ جۇيەسى نە ءۇشىن ەنگىزىلەدى؟
مىندەتتى الەۋمەتتىك مەديسينالىق ساقتاندىرۋ قورىنىڭ استانا قالاسى بويىنشا فيليالى مەديسينالىق ساقتاندىرۋ جۇيەسىنە ەنگىزىلەتىن وزگەرىستەر جايىندا حالىققا قىزمەت كورسەتۋ، ەڭبەكپەن قامتۋ ورتالىقتارىندا، جۇمىس ورىندارىندا، ت.ب.بەلگىلەنگەن ۋاقىت ءارالىعىنداتۇسىندىرۋ جۇمىستارىن جۇرگىزەدى. سوندا بايقاعانىمىز، جۇمىس بەرۋشىلەردىڭ، جۇمىسكەرلەردىڭ، ءبىر سوزبەن ايتقاندا تۇرعىن حالىقتىڭ باسىم بولىگى «مەديسينالىق ساقتاندىرۋ جۇيەسى نە ءۇشىن ەنگىزىلەدى؟»، «قانشالىقتى ءتيىمدى؟»، «قازىرگى مەديسينالىق قىزمەت جۇيەسىنەن قانداي ارتىقشىلىعى بار؟»، «قانداي وزگەرىستەر بولادى؟» دەگەن ساۋالداردى ءجيى قويادى. سوندىقتان، وسى جانە باسقا دا ساۋالدارعا تاعى ءبىر نازار اۋدارتۋدى ءجون كوردىك.
«جاڭا ءتيىمدى دەنساۋلىق ساقتاۋ جۇيەسىن قالىپتاستىرۋ قاجەتتىلىگى، كورسەتىلەتىن مەديسينالىق كومەكتىڭ تيىمدىلىگىنىڭ تومەن ەكەندىگى بۇرىننان ايتىلىپ كەلدى.ساقتاندىرۋ مەديسيناسى ازاماتتىڭ تاپقان تابىسىنا، ول ءۇشىن اۋدارىلعان جارنا كولەمىنە قاراماستان مەديسينالىق كومەكتىڭ بارلىق تۇرلەرىن الۋىنا مۇمكىندىك بەرەدى. ونىڭ ىشىندە جوسپارلى ستاسيونارلىق كومەك تە، دارى-دارمەكپەن قامتۋ دا، جوعارى مامانداندىرىلعان مەديسينالىق قىزمەت تۇرلەرى مەن وڭالتۋ دا، دياگنوستيكالىق-كونسۋلتاسيالىق كومەك تە، مەدبيكە كۇتىمى مەن پاللياتيۆتىك كومەك تە بار»، - دەيدى «الەۋمەتتىك مەديسينالىق ساقتاندىرۋ قورى» كەاق استانا قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
بىرىنشىدەن، مىندەتتى الەۋمەتتىك مەديسينالىق ساقتاندىرۋ ارقىلى قازاقستان اۋماعىندا ءسىز ءوزىڭىز تاڭداعان كەز كەلگەن ەمحانادان مەديسينالىق كومەك الا الاسىز. بۇل جاعدايدا، ەمحانانىڭ شىعىندارىن تولىعىمەن قور وتەيدى؛
ەكىنشىدەن، تەگىن مەديسينالىق كومەكتىڭ كەپىلدەندىرىلگەن كولەمى جانە مىندەتتى الەۋمەتتىك مەديسينالىق ساقتاندىرۋ پاكەتتەرى شەڭبەرىندە قاراستىرىلعان مەديسينالىق كومەككە جۇمسالاتىن قوسىمشا تولەمدەردىڭ بارلىق تۇرىنەن بوساتىلاسىز؛
ۇشىنشىدەن، ءسىز ءۇشىن مەديسينالىق ۇيىمداردا كورسەتىلگەن قىزمەتتەرگە، الەۋمەتتىك مەديسينالىق ساقتاندىرۋ قورىنا اۋدارىلعان جارنالار تۋرالى اي سايىن اقپارات الۋعا مۇمكىندىگىڭىز بار؛
تورتىنشىدەن، ساپاسىز قىزمەت كورسەتىلگەن نەمەسە مىندەتتى الەۋمەتتىك مەديسينالىق ساقتاندىرۋعا قاتىسۋشى رەتىندە قۇقىقتارىڭىز بۇزىلعان جاعدايدا قور ساقتاندىرىلعان ازاماتتاردىڭ قۇقىقتارى مەن مۇددەلەرىن قورعايدى.
بەسىنشىدەن، ءمامس جۇيەسىن ەنگىزۋ كورسەتىلەتىن مەديسينالىق كومەكتىڭ ساپاسىن جاقسارتۋعا مۇمكىندىك بەرەدى.
قانداي ارتىقشىلىعى بار؟
مىندەتتى الەۋمەتتىك مەديسينالىق ساقتاندىرۋ جۇيەسىنىڭ ارتىقشىلىعى –جارنانى اركىم مۇمكىندىگىنە قاراي تولەپ، قاجەتىنە قاراي مەديسينالىق قىزمەت كورسەتىلەتىندىگىندە. ياعني، ءمامس اياسىندا قىزمەت كورسەتەتىن مەديسينالىق ۇيىمنان قاجەتتىلىگىڭىزگە قاراي، سىرقاتىڭىزدى قانشا ۋاقىت ەمدەۋ كەرەك بولسا، سونشا مەديسينالىق كومەك الۋعا قۇقىلىسىز، ءبىراق الاتىن مەديسينالىق كومەك كولەمى دارىگەردىڭ تاعايىنداۋىنا بايلانىستى. ءمامس پاكەتىنە كىرەتىن قىزمەتتەر تولىق كورسەتىلەدى جانە قوسىمشا اقى تولەۋدى قاجەت ەتپەيدى.
ساپالى مەديسينالىق كومەك كورسەتۋ، قاجەتتى دارى-دارمەكتەرمەن قامتاماسىز ەتۋ، سونداي-اق، ەلىمىزدەگى ۇزدىك كلينيكالاردا ءتيىمدى ەمدەلۋ جانە قىمبات باعالى وپەراسيالار جاساتۋ مۇمكىندىگى جۇمىس ىستەيتىن ءار ازاماتتىڭ دەنساۋلىعىن ساقتاۋعا، ەڭبەككە جارامسىزدىق قاعازدارىنىڭ مەرزىمىن قىسقارتۋعا جانە جۇمىس بەرۋشىلەردىڭ شىعىندارىن ازايتۋعا ىقپال ەتەدى.
وزگەرىستەردى بىلەسىز بە؟
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» 2018 جىلعى 28 جەلتوقسانداعى № 208-Vءى قازاقستان رەسپۋبليكاسىنىڭ زاڭى نەگىزىندە «مىندەتتى الەۋمەتتىك مەديسينالىق ساقتاندىرۋ تۋرالى» قازاقستان رەسپۋبليكاسىنىڭ زاڭىنا ءبىرقاتار وزگەرىستەر ەنگىزىلدى.
جارنا مولشەرى تۋرالى ايتار بولساق، ەلوردالىق جۇمىس بەرۋشىلەر 2019 جىلى ءوز قاراجاتى ەسەبىنەن جۇمىسكەر ءۇشىن ونىڭ تابىسىنىڭ 1،5% مولشەرىندە، 2020 جىلدان باستاپ 2% مولشەرىندە (+جۇمىسكەر قاراجاتى ەسەبىنەن ونىڭ تابىسىنىڭ 1% مولشەرىندە) جارنا اۋدارادى.
جەكە كاسىپكەرلەر ءوزى ءۇشىن 2020 جىلدان باستاپ، ءتيىستى قارجىلىق جىلداعى ەڭ تومەنگى جالاقىنىڭ 1،4 ەسە مولشەرىنەن 5% جارنا تولەيدى.
مەملەكەت ەسەبىنەن 2020 جىلدان باستاپ حالىقتىڭ 13 ساناتى ءۇشىن جارنا اۋدارىلادى. ولار: بالالار، زەينەتكەرلەر، ونىڭ ىشىندە ۇلى وتان سوعىسىنىڭ قاتىسۋشىلارى مەن مۇگەدەكتەرى، كوپ بالالى انالار، جۇمىس ىستەمەيتىن جۇكتى ايەلدەر، بالا كۇتىمىنە بايلانىستى دەمالىستاعى انالار، مۇگەدەكتەر جانە مۇگەدەك بالالارعا كۇتىم جاسايتىن ادامدار، تىركەلگەن جۇمىسسىزدار، جۇمىس ىستەمەيتىن ورالماندار، ستۋدەنتتەر، ينتەرنات تاربيەلەنۋشىلەرى، تەرگەۋ يزولياتورلارىنداعىلار مەن تۇرمەدە جازاسىن وتەۋشىلەر.
مەديسينالىق ساقتاندىرۋ قورىنا كەلىپ تۇسكەن قارجى، ءوز كەزەگىندە استانا قالاسىنداعى ەمدەۋ مەكەمەلەرى كورسەتكەن مەديسينالىق قىزمەتتەر اقىسىن تولەۋگە جۇمسالادى. ال حالىققا كورسەتىلەتىن مەديسينالىق قىزمەت ساپاسى قور باقىلاۋىندا بولادى.
"الەۋمەتتىك مەديسينالالىق ساقتاندىرۋ قورى" كەاق
استانا قالاسى بويىنشا فيليالىنىڭ باسپا ءسوز قىزمەتى
