اينالامىزدان سۋىق تيگەن، تۇماۋ تيگەن ادامداردى ءجيى كورەمىز. ينفەكسيالىق اۋرۋلار كوبەيىپ، ەمدەۋ مەكەمەلەرىنە تۇسۋشىلەر سانى ارتۋدا.
دەرەكتەرگە سۇيەنسەك، 2018 جىلدىڭ قورىتىندىسى بويىنشا استانا قالاسىندا ەرەسەكتەر اراسىندا 1965 ناۋقاس جوعارعى تىنىس جولدارىنىڭ جەدەل قابىنۋى، 690 – قوزدىرعىشتارى بەلگىلى جەدەل تونزيلليت، 81 - قوزدىرعىشتارى بەلگىسىز جەدەل تونزيلليت دياگنوزدارىمەن تىركەلگەن.
بالالار اراسىندا: 6 819 - قوزدىرعىشتارى بەلگىسىز تىنىس جولدارىنىڭ جەدەل ينفەكسياسى، 266 - قوزدىرعىشتارى بەلگىلى جەدەل تونزيلليت، 470 - قوزدىرعىشتارى بەلگىسىز جەدەل تونزيلليت، 32 - جوعارعى تىنىس جولدارى ينفەكسياسى دياگنوزدارىمەن تىركەلگەن.
«2019 جىلى ينفەكسيالىق اۋرۋلاردى ەمدەۋ ءۇشىن قالالىق ينفەكسيالىق اۋرۋحاناعا 827،4 ملن تەڭگە، بالالار ينفەكسيالىق اۋرۋحاناسىنا 1 545،6 ملن تەڭگە ءبولىندى. بۇل، جالپى العاندا، 2،3 ملرد قارجى، وتكەن جىلمەن سالىستىرعاندا 0،3 ملرد سوماعا كوپ»
- دەيدى ءامسق استانا قالاسى بويىنشا فيليالىنىڭ ديرەكتورى نۇرلىبەك قابدىقاپاروۆ.
ينفەكسيالىق اۋرۋلاردىڭ تۇماۋ، جەل شەشەك، قىزىلشا، روتوۆيرۋستى ينفەكسيا، ت.ب. تۇرلەرى وتە كوپ. ءار ينفەكسيالىق اۋرۋدىڭ ءوز ۆيرۋستارى، باكتەريالارى، ت.س.س. قوزدىرعىشتارى بار. ينفەكسيالىق اۋرۋلاردىڭ ەڭ ءقاۋىپتىسى، تولىق ەمدەلمەسە اعزانىڭ باسقا دا اۋرۋلارىن قوزدىرىپ جىبەرەدى. سوندىقتان ينفەكسيالىق اۋرۋلاردان ساقتانۋ جولدارىن بىلگەن ءجون.
قازىرگى ساتتە ماۋسىمدىق احۋالعا بايلانىستى سۋىق تيۋ، تۇماۋ، باسپا، تىنىس جولدارى سىرقاتتارى ءجيى كەزدەسەدى. بەلگىلەرى جاعىنان ۇقسايتىندىقتان بولار، كوپشىلىك سۋىق تيۋ مەن تۇماۋدى شاتاستىرىپ جاتادى. سۋىق تيگەندە ادام اعزاسى ونى ءوزى دە جەڭە الادى. كەيدە ەلەۋلى اسقىنۋلار بولۋى مۇمكىن، ارينە. دەگەنمەن، يممۋندىق جۇيەنى نىعايتۋ جانە سۋىق تيۋ مەن تۇماۋدىڭ العاشقى بەلگىلەرى بىلىنىسىمەن قولدى جۋۋ، تىنىس الۋ جولدارىن (مۇرىن، تاماق) شايۋ، ياعني گيگيەنانى، تازالىق شارالارىن ساقتاي وتىرىپ، ساۋىقتىرۋ شاراسىن جۇرگىزىپ، كەز كەلگەن اسقىنۋلاردى بولدىرماۋعا بولادى.
مەديسينا سالاسى جەتىلگەن، تەحنيكا دامىعان قازىرگى ۋاقىتتا، ارينە، اۋرۋدى ءتۇرلى جولدارمەن ەمدەۋگە بولادى. ءوز كەزەگىندە، الەۋمەتتىك مەديسينالىق ساقتاندىرۋ قورى ەمدەۋ مەكەمەلەرىنىڭ مەديسينالىق قىزمەت كورسەتۋ ساپاسىن ءوز باقىلاۋىنا العان.
دەگەنمەن، اۋرۋدى ەمدەگەننەن الدىن العان دۇرىس.
ەستەرىڭىزگە سالا كەتسەك، مەديسينالىق ساقتاندىرۋ قورى 2018 جىلدان باستاپ تەگىن مەديسينالىق كومەكتىڭ كەپىلدىك بەرىلگەن كولەمى (تمككك) جانە مىندەتتى الەۋمەتتىك مەديسينالىق ساقتاندىرۋ (ءمامس) پاكەتتەرى بويىنشا ۇكىمەت بەلگىلەگەن شەڭبەردە تۇرعىندار ءۇشىن قىزمەتتەردى ساتىپ الۋشى قارجى وپەراتورى بولىپ تابىلادى. ياعني، حالىققا كورسەتىلەتىن مەديسينالىق قىزمەت ساپاسى – قور باقىلاۋىندا.
"الەۋمەتتىك مەديسينالالىق ساقتاندىرۋ قورى" كەاق
استانا قالاسى بويىنشا فيليالىنىڭ باسپا ءسوز قىزمەتى
