قازاقستاندا مەديسينالىق قىزمەت ساپاسىنا قاتىستى شاعىم بەرۋ ءتارتىبى وزگەردى. ەندى مۇنداي وتىنىشتەر 1414 ءبىرىڭعاي بايلانىس ورتالىعى ارقىلى قابىلدانبايدى. بۇل تۋرالى «الەۋمەتتىك مەديسينالىق ساقتاندىرۋ قورى» كەاق مالىمدەدى، دەپ حابارلايدى Dalanews.kz.
قوردىڭ مالىمەتىنشە، وزگەرىستەر دەنساۋلىق ساقتاۋ مينيسترلىگىنىڭ 2020 جىلعى 8 قازانداعى №648 بۇيرىعىنا ەنگىزىلگەن تۇزەتۋلەرگە سايكەس جۇزەگە اسىرىلعان. اتالعان قۇجات ءبىرىڭعاي مەديسينالىق اقپاراتتىق call-ورتالىقتىڭ قىزمەتىن رەتتەيدى.
جاڭا ەرەجەگە ساي، 1414 بايلانىس ورتالىعى ارقىلى مەديسينالىق قىزمەت ساپاسىنا قاتىستى شاعىمداردى قابىلداۋ فۋنكسياسى الىپ تاستالدى. قور بۇل شەشىم ازاماتتاردىڭ جەكە دەرەكتەرىن قورعاۋدى كۇشەيتۋ جانە دارىگەرلىك قۇپيانىڭ ساقتالۋىن قامتاماسىز ەتۋ ماقساتىندا قابىلدانعانىن ءتۇسىندىردى.
ەندى تۇرعىندارعا مۇنداي ماسەلەلەر بويىنشا رەسمي سيفرلىق سەرۆيستەرگە جۇگىنۋ ۇسىنىلادى. اتاپ ايتقاندا، وتىنىشتەردى «الەۋمەتتىك مەديسينالىق ساقتاندىرۋ قورىنىڭ» رەسمي سايتى – msqory.kz نەمەسە Qoldau 24/7 ءموبيلدى قوسىمشاسى ارقىلى جولداۋعا بولادى.
سونىمەن قاتار تەگىن مەديسينالىق كومەكتىڭ كەپىلدىك بەرىلگەن كولەمى (تمككك) مەن مىندەتتى الەۋمەتتىك مەديسينالىق ساقتاندىرۋ (ءمامس) جۇيەسىنە قاتىستى كەڭەس بەرۋ قىزمەتى 1414 بايلانىس ورتالىعى ارقىلى بۇرىنعىداي جالعاسا بەرەدى.
