– لوندونداعى پروسەسكە كەلسەك، بۇل قاراجات قازاقستان يەلىگىندە قالا بەرەدى. قاراجات تاۋەلسىز يممۋنيتەتپەن قورعالعان. بۇعاتتالدى دەگەن ماسەلە الداعى ۋاقىتتا بۇل اكتيۆتى بىرەۋلەردىڭ قولىنا وتكىزۋ مۇمكىن ەمەستىگىندە. ۇلتتىق قوردى باسقاراتىن ۇلتتىق بانك سالماقتى ساياساتتى ۇستانادى، تۇراقتى اكتيۆتەر قۇيىلدى، بۇل قاراجات يەلىگىمىزدە قالىپ، تابىس تۇسىرەدى. قاتەر شاعىمنىڭ شەكتەۋلى سوماسىنا قاتىستى - بۇل شامامەن 500 ميلليون دوللار. 22 ميللياردتى ەشكىم ەشقاشان الا المايدى، – دەپ مالىمدەدى مينيستر ۇكىمەت وتىرىسىنىڭ ۇزىلىسىندە.
بەكەتايەۆتىڭ ايتۋىنشا، قازاقستان بارلىق قۇجات پەن دالەلدى بيىلعى ماۋسىمدا اعىلشىن سوتىندا ۇسىنعان، اعىلشىن سوتى الاياقتىق دەرەكتەرىنىڭ بارىن راستاعان.
– بۇل ءىس لوندونداعى سوتتا قارالادى. الاياقتىق بويىنشا سوت تىڭداۋى 2018 جىلدىڭ قازانىنا بەلگىلەنگەن. ءبىز ءتىپتى شاعىم سوماسىن بەرگىمىز كەلمەيدى، سەبەبى اربيتراجدىق شەشىم الاياقتىق جولمەن جاسالعان، – دەيدى بەكەتايەۆ.
ۇلتتىق بانك ءتوراعاسى دانيار اقىشيەۆ ءوز كەزەگىندە قارجى رەتتەۋشىسىنىڭ ۇلتتىق قوردى باسقارا وتىرىپ قاراجاتتى سىرتقى باسقارۋشىلار اراسىندا ۇلەستىرىلەتىنىن ءتۇسىندىردى. الايدا باسقارۋ قۇرىلىمى مىناداي – بۇل قاراجات بىرنەشە كاستودياندا – بارلىق قارجى قۇرالىن ەسەپكە الىپ، ساقتاۋ بويىنشا مامانداندىرىلعان فۋنكسياسىن جۇزەگە اسىراتىن بانكتەردە بولادى، بۇل قارجى قۇرالدارىنا ۇلتتىق قور ينۆەستيسيا قۇيىپ، سول قاراجات بويىنشا ەسەپ جۇرگىزەدى. بۇل دەگەنىىڭىز مۇنداي كاستوديانداردىڭ بىرنەشە ەكەنىن بىلدىرەدى، قازاقستان ۇلتتىق قورى بويىنشا بىرنەشەسى بار.
– بەلگيادا ورنالاسقان كاستوديان "نيۋ-يورك مەلون" بانكى، وندا قازىرگى ۋاقىتتا شاعىم اياسىندا بۇعاتتالعان 22 ميلليارد دوللار بار. ۇكىمەت تە، زاڭ كەڭەسشىلەرىمىز دە بۇعان دەيىن دە تالاي مارتە جاريا ەتكەن شاعىم سوماسى قازىرگى ۋاقىتتا بۇعاتتالعان قاراجات دەڭگەيىمەن سالىستىرۋعا كەلمەيتىنى انىق، – دەپ ەسەپتەيدى اقىشيەۆ.
ۇلتتىق بانك باسشىسى قازاقستاننىڭ بۇل شەشىمنىڭ زاڭدىلىعىنا نارازىلىق ءبىلدىردى. "بۇل شەشىمگە شاعىم ءتۇسىرۋ مۇمكىندىگى بار. ءقازىر ءبىز جۇمىس ىستەپ جاتىرمىز، سەبەبى كاستوديان-بانك شاعىم سوماسى سايكەس كەلمەيتىنىن بىلە تۇرا اكتيۆتەردى بۇعاتتاپ، ءبىزدىڭ ويىمىزشا، زاڭسىز ارەكەتكە كوشتى. ەكىنشىدەن، بۇل ماسەلە ولاردىڭ قۇزىرىندا ەمەس دەپ ەسەپتەيمىز"، – دەدى دانيار اقىشيەۆ.
ول قازاقستاننىڭ وسى ماسەلەنى شەشۋ ءۇشىن بەلسەندى جۇمىس ىستەپ جاتقانىن ايتتى. ايتۋىنشا، ادىلەت مينيسترلىگى بۇل جاعدايدا ۇكىمەتتىڭ مۇددەسىن قورعايتىن نەگىزگى ورگان بولىپ وتىر.
– ۇلتتىق بانك بارلىق قاجەتتى قولداۋدى ءبىلدىرىپ وتىر، ونىڭ ىشىندە زاڭ كەڭەسشىلەرىن جالداپ وتىر. مۇندا ماسەلە قاتەرلى دەڭگەيدە نەمەسە اكتيۆتەردى جوعالتۋ تۋرالى ءسوز بولىپ وتىر دەپ ويلامايمىن. ءيا، شىن مانىندە قۇقىقتىق داۋ بار. قورىتىندىسىندا بۇل داۋ ءوز شەشىمىن تابادى دەپ ەسەپتەيمىن. ءبىز جەتكىلىكتى ءارى ايتارلىقتاي ماماندانعانبىز جانە ءبىزدىڭ كەڭەسشىلەر ءتيىستى دەڭگەيدە جۇمىس ىستەپ، ۇلتتىق قور قاراجاتىن قازىرگىدەي جاعدايدا تولىقتاي يگەرە الامىز دەپ ويلايمىن، – دەدى اقىشيەۆ.
ەسكە سالايىق، تاياۋدا Bank of New York Mellon قازاقستان ۇلتتىق قورىنىڭ 22 ميلليارد دوللارىن بۇعاتتاعان بولاتىن. "ۇلتتىق بانك تا قازاقستان رەسپۋبليكاسى دا قازىرگى ۋاقىتتا سوتتىڭ بۇل شەشىمىنە شاعىم ءبىلدىرۋ مۇمكىندىگىن قاراستىرۋدا. سونىمەن بىرگە، بۇل شەشىم ۇلتتىق بانكتىڭ جانە قازاقستان رەسپۋبليكاسىنىڭ باسقا شەتەلدىك يۋريسديكسيالارداعى پوزيسياسىنا دا، ستاتي ورىنداۋعا تالپىنىس جاساپ وتىرعان تورەلىك شەشىم الاياقتىق جولىمەن الىندى دەگەن قازاقستان رەسپۋبليكاسىنىڭ دالەلىنە دە ەش اسەر ەتپەيدى"، – دەلىنگەن ادىلەت مينيسترلىگىنىڭ سايتىندا جاريالانعان حابارلامادا.
