22 ناۋرىزدا بەلگىسىز بىرەۋلەر ماسكەۋدەگى كروكۋس سيتي حولل كونسەرت زالىندا ادامدارعا وق جاۋدىردى. كەيىن كونسەرت زالىندا ءورت شىقتى. سەبەبى وق اتقاندار گراناتا جارعانى بەلگىلى بولدى. ءقازىر نەگىزگى ءتورت كۇدىكتى دە ۇستالدى.
ال سەناتتىڭ جالپى وتىرىسىنان سوڭ ىشكى ىستەر ءمينيسترىنىڭ ورىنباسارى يگور لەپەحا قازاقستان بۇل جاعدايدان كەيىن قالاي ارەكەت ەتەتىنىن ايتتى، - دەپ حابارلايدى Dalanews.kz.
ىشكى ىستەر ءمينيسترىنىڭ ورىنباسارى يگور لەپەحا جاقىندا كورشىلەس رەسەيدە بولعان قاندى شابۋىلدان كەيىن ەلدە دە تەكسەرىستەر باستالعانىن ايتتى.
"حالىق كوپ جينالاتىن بارلىق نىساندى قوسىمشا تەكسەرۋ ءۇشىن جۇمىس ىستەپ جاتىرمىز. بۇرىن تەكسەرگەن نىساندارعا دا باقىلاۋ ءۇشىن تەكسەرىستەر جۇرگىزەمىز. تەكسەرىلمەگەن نىساندار بولسا، تەكسەرەمىز. بارىپ يەلەرىمەن سويلەسەمىز، تەحنيكالىق نىعايتۋ ماسەلەلەرىن قاراستىرامىز جانە ۇسىنىستار ايتامىز. بۇل تۇرعىدا جۇمىس ىستەپ جاتىرمىز"، - دەدى لەپەحا.
ايتا كەتەيىك، اتىس "پيكنيك" روك-توبىنىڭ كونسەرتىنە بىرنەشە مينۋت قالعاندا باستالعان بولاتىن.
"زالدا جۇرگەن ادامدار اتىستان قورعانۋ ءۇشىن بىردەن جەرگە جاتىپ قورعاندى. كەمىندە 15-20 مينۋت جەردە جاتىپ، اقىرىنداپ سىرتقا شىعا باستادى. كوبى قاشىپ ۇلگەردى"، - دەپ جازدى سول كەزدە رەسەيلىك ارنالار.
ال بۇعان دەيىن ماسكەۋ قالاسىنىڭ اۋداندىق سوتىنا كروكۋس-ەكسپو ساۋدا ويىن-ساۋىق ورتالىعىندا اۋقىمدى تەرروريستىك اكت جاسادى دەگەن كۇدىكتىلەر اكەلىنگەن بولاتىن. كەيىنىرەك باسمان اۋداندىق سوتى تەرروريستەر توبىنا قاتىستى الدىن الا تەرگەۋ ورگاندارىنىڭ بۇلتارتپاۋ شاراسىن تاڭداۋ تۋرالى ءوتىنىشىن قاراۋعا كىرىستى.
ارتىنشا سوت ۇستالعان كۇدىكتىلەرگە 1 اي 28 تاۋلىك مەرزىمگە، ياعني 2024 جىلعى 22 مامىرعا دەيىن قاماۋعا الۋ تۇرىندەگى بۇلتارتپاۋ شاراسىن تاڭدادى.
