ماسكەۋدە قازاقستاندىق ستارتاپ يەسى الەكساندر كيم مەن نيكيتا دۋباسقا قاتىستى سوت ۇكىمى شىقتى، دەپ حابارلايدى Dalanews.kz.

بۇل تۋرالى رەسەيلىك ب ا ق-تار مەششانسكيي سوتىنىڭ باسپا ءسوز قىزمەتىنە سىلتەمە جاساپ حابارلايدى.

كيم مەن دۋباس ءبىر توپ ادامدى الدىن الا ءسوز بايلاسۋ ارقىلى جاساعان جانە ابايسىزدا ەكى نەمەسە ودان دا كوپ ادامنىڭ ولىمىنە اكەلىپ سوقتىرعان، تۇتىنۋشىلاردىڭ ءومىرى مەن دەنساۋلىعىنىڭ قاۋىپسىزدىگى تالاپتارىنا سايكەس كەلمەيتىن قىزمەتتەردى كورسەتكەنى ءۇشىن كىنالى دەپ تانىلدى.

"كيمگە جالپى رەجيمدەگى تۇزەۋ كولونياسىندا جازاسىن وتەي وتىرىپ، بەس جىل، التى اي، دۋباسقا  سەگىز جىل، التى اي مەرزىمگە باس بوستاندىعىنان ايىرۋ جازاسى تاعايىندالدى"، دەلىنگەن سوت حابارلاماسىندا.

ال سەگىز ادام قازا تاپقان زاڭسىز ەكسكۋرسياعا ارنالعان تۋر بيلەتتەرىن ساتقان "اۆانگارد" كومپانياسىنىڭ ديرەكتورى الەكساندر لازوۆسكيي مەن Tripster سايتىنىڭ يەسى بوريس پلوتيسا (وسى سايتتا ەكسكۋرسيا جارناماسى ۇسىنىلعان) تەرگەۋ كەزىندە ءىزىن سۋىتىپ، ءالى دە ىزدەۋدە.

ايتا كەتسەك، اتالعان قايعىلى وقيعا 2023 جىلدىڭ 20 تامىزىندا بولعان. گيدتىڭ جەتەكشىلىگىمەن بەس ەرەسەك پەن ءۇش ءجاسوسپىرىم بايىرعى زاماندا نەگليننايا وزەنى اققان ارناعا سالىنعان كوللەكتورعا تۇسكەن. سول كەزدە كەنەتتەن نوسەر جاڭبىر جاۋىپ، جەر استى قۇبىرى سۋعا تولعان. قازا تاپقانداردىڭ دەنەلەرى كرەمل ماڭىندا، تۋريستىك ورىن — اسپالى كوپىر استىندا سۋ بەتىنە شىققان. توتەنشە جاعداي قوعامدا ۇلكەن رەزونانس تۋدىردى. ەكسكۋرسياعا قاتىسۋشىلاردىڭ قازا بولۋىنا بايلانىستى قىلمىستىق ءىس قوزعالدى. تەرگەۋ مالىمەتتەرى بويىنشا، دۋباس "ماسكەۋدىڭ تاريحي ورتالىعىنىڭ كوللەكتورلارىنا زاڭسىز كىرۋ ارقىلى ەكسكۋرسيالار ۇيىمداستىرعان".

مارقۇمدار قازاقستان ازاماتى الەكساندر كيم جاساعان "سپۋتنيك8" ونلاين-اگرەگاتورى ارقىلى وسىنداي ەكسكۋرسيالاردىڭ بىرىنە جازىلعان. ب ا ق مالىمەتىنشە، كيم ءوز كىناسىن مويىنداماعان، ول ءوزىنىڭ تەك تۋر اگرەگاتورىن ازىرلەۋشى ەكەنىن، زاڭسىز ۇيىمداستىرىلعان تۋردىڭ وزىنە ەشقانداي قاتىسى جوق ەكەنىن ايتقان. ءارى قايعىلى جاعداي تۋرالى بىلە سالىسىمەن قازاقستاندىق دەرەۋ قۇقىق قورعاۋ ورگاندارىمەن بايلانىسقا شىعىپ، بارلىق قاجەتتى اقپاراتتى ۇسىنعان.