Dalanews-كە پىكىر بىلدىرگەن ساراپشى داۋرەن ابەننىڭ ايتۋىنشا كرەملدىڭ كورشىلەرى باتىستىڭ سانكسياسىنا ۇشىراعاندى قالامايدى.
"ماسكەۋدە ءوتىپ جاتقان ۇقشۇ ءسامميتى الدىن الا جوسپارلانعان شارا. ۇيىمنىڭ نەگىزىن قالاعان تاشكەنت شارتىنا قول قويىلۋدىڭ 30-جىلدىعىنا ارنالعان سامميت رەسەي ۋكرايناعا سوعىس اشپاسا دا ءوتۋشى ەدى.
سوندىقتان توقايەۆتىڭ ساپارىن ەرەكشە ءبىر جاعداي رەتىندە قاراستىرماعان ءجون. ارينە ۋكراينادا بولىپ جاتقان سوعىس بۇل سامميتتە قارالاتىن ماسەلەلەردىڭ تىزىمىندە ەڭ جوعارى تۇراتىنى ءسوزسىز"، – دەيدى ساراپشى.
ونىڭ پىكىرىنە رەسەيدىڭ ءوز وداقتاستارىنا ىقپال جاسايتىن ساياسي جانە ەكونوميكالىق قۇرالدارى جەتكىلىكتى، ال قازاقستاننىڭ بۇل تۇرعىدان العاندا وسال تۇستارى كوپ. ونىڭ ءبىرى - رەسەي ارقىلى ءوتىپ جاتقان مۇناي ەكسپورتى.
"ءبىراق، مەنىڭ ويىمشا، ماسكەۋ ماجبۇرلەگەن كۇننىڭ وزىندە، وداقتاس ەلدەردىڭ رەسەيگە تىكەلەي اسكەري نەمەسە اسكەري تەحنيكالىق كومەك كورسەتۋى ەكىتالاي.
ولاي ىستەيتىن بولسا، اگرەسسور ەلدىڭ ساتەلليتى رەتىندە تانىلىپ اقش نەمەسە ەۋروپالىق وداق تاراپىنان سانكسيالارعا ۇشىراۋى مۇمكىن.
سوندىقتان، سامميتكە قاتىسۋشى ەلدەر، ارى كەتسە، رەسەيدىڭ ىس-ارەكەتىنە تۇسىنىستىكپەن قارايتىنىن مالىمدەپ، تەزىرەك بەيبىت كەلىسسوزدەردى جالعاستىرۋعا شاقىراتىن ۇندەۋ قابىلدايدى.
ال رەسەي باسشىلىعى ءۇشىن ءوز حالقىنا قازىرگى تاڭدا الەمدىك دەڭگەيدە يزولياسياعا ۇشىراپ وتىرعان ەلدىڭ ءالى دە بولسا وداقتاستارى بارىن كورسەتۋ وتە ماڭىزدى"، – دەيدى داۋرەن ابەن.
...
بۇعان دەيىن اقوردانىڭ رەسمي سايتىندا قازاقستان پرەزيدەنتىنىڭ ۇقشۇ-نىڭ ماسكەۋدە وتكەن مەرەيتويلىق سامميتىنە قاتىسقانى حابارلانعان.
"قاسىم-جومارت توقايەۆ ۇجىمدىق قاۋىپسىزدىك تۋرالى شارتقا قول قويىلعانىنا 30 جىل جانە ۇيىمنىڭ قۇرىلعانىنا 20 جىل تولۋىنا وراي وتكەن ۇقشۇ-عا مۇشە مەملەكەتتەردىڭ ۇجىمدىق قاۋىپسىزدىك كەڭەسىنىڭ مەرەيتويلىق سەسسياسىنا قاتىستى.
قازاقستان پرەزيدەنتى ۇقشۇ-نىڭ 30 جىل ىشىندە ودان ءارى دامۋ ءۇشىن زور الەۋەتى بار كوپجاقتى ىنتىماقتاستىقتىڭ ناقتى مەحانيزمى رەتىندە قالىپتاسقانىن اتاپ ءوتتى.
قاسىم-جومارت توقايەۆ بەيبىتشىلىك پەن تۇراقتىلىقتى، حالىقارالىق جانە ايماقتىق قاۋىپسىزدىكتى ساقتاۋ، مۇشە مەملەكەتتەردىڭ اۋماقتىق تۇتاستىعى مەن ەگەمەندىگىن قورعاۋ ۇقشۇ-نىڭ باستى مىندەتى ەكەنىن ايتتى.
مەملەكەت باسشىسى سويلەگەن سوزىندە حالىقارالىق تەرروريزم مەن ەكسترەميزمگە، زاڭسىز ەسىرتكى جانە قارۋ-جاراق اينالىمىنا، كوشى-قونعا، سونىڭ ىشىندە اۋعانستانداعى احۋالدىڭ ورشۋىنە قارسى ءىس-قيمىل ماسەلەلەرىنە ەرەكشە نازار اۋداردى.
– اۋعانستانداعى جاعداي، سونداي-اق وسى ەلدىڭ اۋماعىنداعى قارۋلى توپتاردىڭ بەلسەندى ارەكەتى مەملەكەتتەرىمىزدىڭ قاۋىپسىزدىگى مەن تۇراقتىلىعىنا قاتەر ءتوندىرىپ وتىر. ۇقشۇ بارلىق ىقتيمال قاۋىپ-قاتەرلەردى ەسكەرىپ، ورتالىق ازيانىڭ وڭتۇستىك شەكارالارىنىڭ قاۋىپسىزدىگىن قامتاماسىز ەتۋگە كوبىرەك كوڭىل ءبولۋى كەرەك دەپ ەسەپتەيمىن، – دەدى قازاقستان پرەزيدەنتى.
قاسىم-جومارت توقايەۆ ۇقشۇ بىتىمگەرشىلىك كۇشتەرىنىڭ الەۋەتىن نىعايتۋ ۇيىم قىزمەتىنىڭ تاعى ءبىر وزەكتى مىندەتى ەكەنىن ايتتى.
– ءبىزدىڭ ويىمىزشا، ءقازىردىڭ وزىندە ۇقشۇ-نى بۇۇ-نىڭ بىتىمگەرشىلىك قىزمەتىمەن بايلانىستىرۋ مىندەتىن كۇن تارتىبىنە قويۋ قاجەت. بۇل قادام ۇجىمدىق قاۋىپسىزدىك شارتى ۇيىمىنىڭ سۋبەكت رەتىندەگى قۇقىعىن نىعايتادى. سونداي-اق ۇيىمنىڭ بەيبىتشىلىكتى ساقتاۋ جونىندەگى حالىقارالىق بىتىمگەرشىلىك وپەراسيالارعا قاتىسۋ تاجىريبەسىن قامتاماسىز ەتەدى، – دەدى مەملەكەت باسشىسى.
كەزدەسۋ قورىتىندىسى بويىنشا ۇقشۇ-عا مۇشە مەملەكەتتەردىڭ باسشىلارى ۇجىمدىق قاۋىپسىزدىك كەڭەسىنىڭ مەرەيتويلىق مالىمدەمەسىن قابىلدادى"، – دەلىنگەن اقپاراتتا.
