Dalanews-ke pikir bildirgen sarapshy Dáýren Ábenniń aıtýynsha Kremldiń kórshileri Batystyń sanksıasyna ushyraǵandy qalamaıdy.
"Máskeýde ótip jatqan UQSHU samıti aldyn ala josparlanǵan shara. Uıymnyń negizin qalaǵan Tashkent shartyna qol qoıylýdyń 30-jyldyǵyna arnalǵan samıt Reseı Ýkraınaǵa soǵys ashpasa da ótýshi edi.
Sondyqtan Toqaevtyń saparyn erekshe bir jaǵdaı retinde qarastyrmaǵan jón. Árıne Ýkraınada bolyp jatqan soǵys bul samıtte qaralatyn máselelerdiń tiziminde eń joǵary turatyny sózsiz", – deıdi sarapshy.
Onyń pikirine Reseıdiń óz odaqtastaryna yqpal jasaıtyn saıası jáne ekonomıkalyq quraldary jetkilikti, al Qazaqstannyń bul turǵydan alǵanda osal tustary kóp. Onyń biri - Reseı arqyly ótip jatqan munaı eksporty.
"Biraq, meniń oıymsha, Máskeý májbúrlegen kúnniń ózinde, odaqtas elderdiń Reseıge tikeleı áskerı nemese áskerı tehnıkalyq kómek kórsetýi ekitalaı.
Olaı isteıtin bolsa, agresor eldiń satellıti retinde tanylyp AQSH nemese Eýropalyq Odaq tarapynan sanksıalarǵa ushyraýy múmkin.
Sondyqtan, samıtke qatysýshy elder, ary ketse, Reseıdiń is-áreketine túsinistikpen qaraıtynyn málimdep, tezirek beıbit kelissózderdi jalǵastyrýǵa shaqyratyn úndeý qabyldaıdy.
Al Reseı basshylyǵy úshin óz halqyna qazirgi tańda álemdik deńgeıde ızolásıaǵa ushyrap otyrǵan eldiń áli de bolsa odaqtastary baryn kórsetý óte mańyzdy", – deıdi Dáýren Áben.
...
Buǵan deıin Aqordanyń resmı saıtynda Qazaqstan Prezıdentiniń UQSHU-nyń Máskeýde ótken mereıtoılyq samıtine qatysqany habarlanǵan.
"Qasym-Jomart Toqaev Ujymdyq qaýipsizdik týraly shartqa qol qoıylǵanyna 30 jyl jáne Uıymnyń qurylǵanyna 20 jyl tolýyna oraı ótken UQSHU-ǵa múshe memleketterdiń Ujymdyq qaýipsizdik keńesiniń mereıtoılyq sesıasyna qatysty.
Qazaqstan Prezıdenti UQSHU-nyń 30 jyl ishinde odan ári damý úshin zor áleýeti bar kópjaqty yntymaqtastyqtyń naqty mehanızmi retinde qalyptasqanyn atap ótti.
Qasym-Jomart Toqaev beıbitshilik pen turaqtylyqty, halyqaralyq jáne aımaqtyq qaýipsizdikti saqtaý, múshe memleketterdiń aýmaqtyq tutastyǵy men egemendigin qorǵaý UQSHU-nyń basty mindeti ekenin aıtty.
Memleket basshysy sóılegen sózinde halyqaralyq terorızm men ekstremızmge, zańsyz esirtki jáne qarý-jaraq aınalymyna, kóshi-qonǵa, sonyń ishinde Aýǵanstandaǵy ahýaldyń órshýine qarsy is-qımyl máselelerine erekshe nazar aýdardy.
– Aýǵanstandaǵy jaǵdaı, sondaı-aq osy eldiń aýmaǵyndaǵy qarýly toptardyń belsendi áreketi memleketterimizdiń qaýipsizdigi men turaqtylyǵyna qater tóndirip otyr. UQSHU barlyq yqtımal qaýip-qaterlerdi eskerip, Ortalyq Azıanyń ońtústik shekaralarynyń qaýipsizdigin qamtamasyz etýge kóbirek kóńil bólýi kerek dep esepteımin, – dedi Qazaqstan Prezıdenti.
Qasym-Jomart Toqaev UQSHU bitimgershilik kúshteriniń áleýetin nyǵaıtý Uıym qyzmetiniń taǵy bir ózekti mindeti ekenin aıtty.
– Bizdiń oıymyzsha, qazirdiń ózinde UQSHU-ny BUU-nyń bitimgershilik qyzmetimen baılanystyrý mindetin kún tártibine qoıý qajet. Bul qadam Ujymdyq qaýipsizdik sharty uıymynyń sýbekt retindegi quqyǵyn nyǵaıtady. Sondaı-aq Uıymnyń beıbitshilikti saqtaý jónindegi halyqaralyq bitimgershilik operasıalarǵa qatysý tájirıbesin qamtamasyz etedi, – dedi Memleket basshysy.
Kezdesý qorytyndysy boıynsha UQSHU-ǵa múshe memleketterdiń basshylary Ujymdyq qaýipsizdik keńesiniń mereıtoılyq málimdemesin qabyldady", – delingen aqparatta.
