قازاقستان بيلىگى بۇرىنعى ۇقك ءتوراعاسى كارىم ماسىموۆكە تيەسىلى استاناداعى ءزاۋلىم سارايدى ءالى كۇنگە دەيىن ساتا الماي كەلەدى، دەپ حابارلايدى Dalanews.kz.
اۋماعى 2878 شارشى مەتر بولاتىن ۆيللا ءقازىردىڭ وزىندە 40%-عا ارزانداعانىمەن، ءالى بىردە-بىر ساتىپ الۋشى تابىلماعان. شەتەلدىك باسىلىمدار بۇل سارايدىڭ "ليۋكس" ەرەكشەلىكتەرىن اتاپ ءوتتى: عيماراتتا ديسكو-بار، دجاكۋزيىمەن باسسەين، تەاتر جانە 30 بولمە بار، سونىڭ ىشىندە ءتورت ادامعا ارنالعان ۇلكەن توسەك قويىلعان جاتىن بولمە دە بار.
"باستاپقى باعاسىنان 3 ميلليون دوللارعا تۇسكەنىنە قاراماستان (ياعني 40%)، قازاقستانداعى كەيىنگى تاريحي وقيعالار بۇل سارايدى ساتۋدى وتە قيىن شارۋاعا اينالدىرىپ وتىر. بيىل ءۇشىنشى رەت وتكىزىلگەلى جاتقان اۋكسيون مامىردا تاعى دا وتپەي قالدى. ءقازىر مەملەكەت مەنشىگىنە قايتارىلعان اكتيۆتەردى باسقاراتىن كومپانيا بۇل مۇلىكتى بالانسىنان قالاي شىعارامىز دەپ ويلانىپ وتىر"، - دەپ جازدى Bloomberg.
ۇكىمەت شەتەلدىك ينۆەستورلاردى تارتۋعا قانشا تىرىسسا دا، استانا ءالى كۇنگە دەيىن "ميلليونەرلەر قالاسى" دەگەن بەدەلگە يە بولا العان جوق. ال جەرگىلىكتى بايلار اتى دا، تاريحى دا داۋلى بۇل مۇلىكتى ساتىپ الۋعا اسىعار ەمەس.
بۇعان دەيىنگى جاعداي
ەسكە سالايىق، بۇعان دەيىن ۇلتتىق قاۋىپسىزدىك كوميتەتىنىڭ بۇرىنعى ءتوراعاسى، بۇرىنعى پرەمەر-مينيستر كارىم ءماسىموۆتىڭ استاناداعى ءۇيى الەۋمەتتىك قاجەتتىلىككە بايلانىستى اۋكسيوننان الىنىپ تاستالدى.
ال وعان دەيىن ءتيىستى لوت ە-Qazyna ەلەكترون ساۋدا الاڭىنىڭ سايتىندا جاريالانعان ەدى. جەرتولەسى بار تۇرعىن ءۇي ەلوردانىڭ نۇرا اۋدانىندا ورنالاسقان. جالپى اۋدانى 2877،7 شارشى مەتر بولاتىن ەكى قاباتتى ءۇي.
ۇيگە ءارتۇرلى اۋماقتاعى بىرنەشە جەر ۋچاسكەسى كىرەدى، ولاردىڭ بىرىندە گاراج ورنالاسقان. ءۇي 879 دانا مۇلىكپەن بىرگە ساتىلاتىنى ايتىلدى. ولاردىڭ اراسىندا جيھاز، تۇرمىستىق زاتتار، زەرگەرلىك بۇيىمدار، كوللەكسيالىق مونەتالار، كادەسىي رەتىندەگى قارۋلار بار.
