Qazaqstan biligi burynǵy UQK tóraǵasy Kárim Másimovke tiesili Astanadaǵy záýlim saraidy áli kúnge deiin sata almai keledi, dep habarlaidy Dalanews.kz.
Aýmaǵy 2878 sharshy metr bolatyn villa qazirdiń ózinde 40%-ǵa arzandaǵanymen, áli birde-bir satyp alýshy tabylmaǵan. Sheteldik basylymdar bul saraidyń "liýks" erekshelikterin atap ótti: ǵimaratta disko-bar, djakýziimen bassein, teatr jáne 30 bólme bar, sonyń ishinde tórt adamǵa arnalǵan úlken tósek qoiylǵan jatyn bólme de bar.
"Bastapqy baǵasynan 3 million dollarǵa túskenine qaramastan (iaǵni 40%), Qazaqstandaǵy keiingi tarihi oqiǵalar bul saraidy satýdy óte qiyn sharýaǵa ainaldyryp otyr. Biyl úshinshi ret ótkizilgeli jatqan aýktsion mamyrda taǵy da ótpei qaldy. Qazir memleket menshigine qaitarylǵan aktivterdi basqaratyn kompaniia bul múlikti balansynan qalai shyǵaramyz dep oilanyp otyr", - dep jazdy Bloomberg.
Úkimet sheteldik investorlardy tartýǵa qansha tyryssa da, Astana áli kúnge deiin "millionerler qalasy" degen bedelge ie bola alǵan joq. Al jergilikti bailar aty da, tarihy da daýly bul múlikti satyp alýǵa asyǵar emes.
Buǵan deiingi jaǵdai
Eske salaiyq, buǵan deiin Ulttyq qaýipsizdik komitetiniń burynǵy tóraǵasy, burynǵy premer-ministr Kárim Másimovtiń Astanadaǵy úii áleýmettik qajettilikke bailanysty aýktsionnan alynyp tastaldy.
Al oǵan deiin tiisti lot E-Qazyna elektron saýda alańynyń saitynda jariialanǵan edi. Jertólesi bar turǵyn úi elordanyń Nura aýdanynda ornalasqan. Jalpy aýdany 2877,7 sharshy metr bolatyn eki qabatty úi.
Úige ártúrli aýmaqtaǵy birneshe jer ýchaskesi kiredi, olardyń birinde garaj ornalasqan. Úi 879 dana múlikpen birge satylatyny aityldy. Olardyń arasynda jihaz, turmystyq zattar, zergerlik buiymdar, kollektsiialyq monetalar, kádesyi retindegi qarýlar bar.
