ماسىموۆكە قاتىستى تاعى ءبىر ءىس جوعارعى سوتقا تۇسكەنى راس پا؟

كوركەم الدابەرگەنوۆا 27 مام. 2024 10:01 2287

جوعارعى سوت وكىلدەرى كارىم ماسىموۆكە قاتىستى "جاڭا ءىس تۋرالى" قاۋەسەتتەرگە جاۋاپ بەردى، - دەپ حابارلايدى Dalanews.kz.

جوعارعى سوتقا ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆتىڭ ءىسى كاسساسيالىق تارتىپپەن تۇسپەدى جانە وندىرىستە جوق. بۇل تۋرالى جس قازينفورم اگەنتتىگىنىڭ رەسمي ساۋالىنا بەرگەن جاۋابىندا ايتتى. 

ەسكە سالايىق، بۇعان دەيىن بىرنەشە مەديا كارىم ءماسىموۆ ءىسى جوعارعى سوتقا تۇسكەنىن جازعان بولاتىن.

بۇل تۋرالى @witness_kz حابارلاعان. الايدا جوعارعى سوتقا ناقتى قانداي ءىس تۇسكەنى بەلگىسىز. ول جاڭا ءىس بولۋى دا مۇمكىن نەمەسە بۇرىنعى ىسكە قاتىستى شاعىم تۇسىرىلگەن بولۋى مۇمكىن.

«سوت كابينەتىندە ءىس 2024 جىلدىڭ 16 ساۋىرىندە باستالاتىنى عانا جازىلعان. سۋديانىڭ ءاتى-جونى بەلگىسىز جانە ءىس قاراۋعا الىندى ما، جوق پا – ول دا بەلگىسىز. ۇقك بۇرىنعى باسشىسىنىڭ اتى قاتە جازىلسا دا قالعان دەرەكتەر دۇرىس»، - دەلىنگەن جازبادا.

ەسكە سالايىق، 2022 جىلى 6 قاڭتار كۇنى ۇلتتىق قاۋىپسىزدىك كوميتەتى كارىم ماسىموۆكە مەملەكەتكە ساتقىندىق جاسادى دەگەن ايىپ تاعىپ، ق ر قىلمىستىق كودەكسىنىڭ 175-بابىنىڭ 1-بولىگى بويىنشا تەرگەۋگە العان ەدى. سونىمەن قاتار، ونىڭ ورىنباسارلارى دا كۇدىككە ىلىنگەن. سوت پروسەسى «اسا قۇپيا» تۇردە وتكىزىلدى. 

بىلتىر 24 ساۋىردە استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ماسىموۆكە جانە ونىڭ ورىنباسارلارى ا.سادىقۇلوۆقا، د.ەرعوجينگە، م.وسيپوۆكە قاتىستى قىلمىستىق ءىس بويىنشا ۇكىمىن جاريا ەتتى. 

استانا قالالىق سوتىنىڭ رەسمي مالىمەتىنە سايكەس، سوت شەشىمى بويىنشا ق ر ۇقك بۇرىنعى ءتوراعاسى ءماسىموۆ 18 جىلعا سوتتالدى. ال ونىڭ ورىنباسارلارى ا.سادىقۇلوۆ - 16 جىلعا، د.ەرعوجين تاعىلعان ايىپتارعا سايكەس - 15 جىلعا، م.وسيپوۆ بولسا بيلىك پەن لاۋازىمدىق وكىلەتتىگىن اسىرا پايدالانۋ بابىمەن 3 جىلعا باس بوستاندىعىنان ايىرىلدى.

سونداي-اق ولار ءومىر بويى لاۋازىمدى قىزمەت اتقارا المايدى. وعان قوسا، بارلىعى گەنەرال شەندەرىنەن جانە مەملەكەتتىك ناگرادالارىنان ايىرىلدى.


ۇسىنىلعان
سوڭعى جاڭالىقتار