Másimovke qatysty taǵy bir is Joǵarǵy sotqa túskeni ras pa?

Kórkem Aldabergenova 27 mam. 2024 10:01 2292

Joǵarǵy sot ókilderi Kárim Másimovke qatysty "jańa is týraly" qaýesetterge jaýap berdi, - dep habarlaıdy Dalanews.kz.

Joǵarǵy sotqa Ulttyq qaýipsizdik komıtetiniń burynǵy tóraǵasy Kárim Másimovtiń isi kasasıalyq tártippen túspedi jáne óndiriste joq. Bul týraly JS Qazınform agenttiginiń resmı saýalyna bergen jaýabynda aıtty. 

Eske salaıyq, buǵan deıin birneshe medıa Kárim Másimov isi Joǵarǵy sotqa túskenin jazǵan bolatyn.

Bul týraly @witness_kz habarlaǵan. Alaıda Joǵarǵy sotqa naqty qandaı is túskeni belgisiz. Ol jańa is bolýy da múmkin nemese burynǵy iske qatysty shaǵym túsirilgen bolýy múmkin.

«Sot kabınetinde is 2024 jyldyń 16 sáýirinde bastalatyny ǵana jazylǵan. Sýdıanyń aty-jóni belgisiz jáne is qaraýǵa alyndy ma, joq pa – ol da belgisiz. UQK burynǵy basshysynyń aty qate jazylsa da qalǵan derekter durys», - delingen jazbada.

Eske salaıyq, 2022 jyly 6 qańtar kúni Ulttyq qaýipsizdik komıteti Kárim Másimovke memleketke satqyndyq jasady degen aıyp taǵyp, QR Qylmystyq kodeksiniń 175-babynyń 1-bóligi boıynsha tergeýge alǵan edi. Sonymen qatar, onyń orynbasarlary da kúdikke ilingen. Sot prosesi «asa qupıa» túrde ótkizildi. 

Byltyr 24 sáýirde Astana qalasynyń qylmystyq ister jónindegi mamandandyrylǵan aýdanaralyq soty Ulttyq qaýipsizdik komıtetiniń burynǵy tóraǵasy Kárim Másimovke jáne onyń orynbasarlary A.Sadyqulovqa, D.Erǵojınge, M.Osıpovke qatysty qylmystyq is boıynsha úkimin jarıa etti. 

Astana qalalyq sotynyń resmı málimetine sáıkes, Sot sheshimi boıynsha QR UQK burynǵy tóraǵasy Másimov 18 jylǵa sottaldy. Al onyń orynbasarlary A.Sadyqulov - 16 jylǵa, D.Erǵojın taǵylǵan aıyptarǵa sáıkes - 15 jylǵa, M.Osıpov bolsa bılik pen laýazymdyq ókilettigin asyra paıdalaný babymen 3 jylǵa bas bostandyǵynan aıyryldy.

Sondaı-aq olar ómir boıy laýazymdy qyzmet atqara almaıdy. Oǵan qosa, barlyǵy general shenderinen jáne memlekettik nagradalarynan aıyryldy.


Usynylǵan
Sońǵy jańalyqtar