"Qol-aiaǵymdy bailap, basymnan urdy": Atyraýda 90 jastaǵy qariia týǵan ulyn jazalaýdy talap etti

"Qol-aiaǵymdy bailap, basymnan urdy": Atyraýda 90 jastaǵy qariia týǵan ulyn jazalaýdy talap etti
videodan skrinshot

Atyraý oblysynda 90 jasqa taiaǵan qariia ózin uryp-soqty dep aiyptaǵan týǵan ulynyń zań aldynda jaýap berýin talap etip otyr. Ádilhan Sisenov sot otyrysyna ózi kelip, kenje balasynyń áreketinen keiin densaýlyǵy nasharlap, insýlt alǵanyn málimdedi, dep habarlaidy dalanews.kz.

KTK telearnasynyń málimetinshe, Qyzylqoǵa aýdanyna qarasty Saǵyz aýylynyń turǵyny Ádilhan Sisenov sot otyrysyna qatysý úshin kórshiles Jylyoi aýdanyna arnaiy barǵan. Qariia óziniń 47 jastaǵy kenje ulyna qatysty qylmystyq istiń ádil qaralýyn talap etip otyr.

Jábirlenýshiniń aitýynsha, balasy ony úige qamap, qol-aiaǵyn skotchpen bailaǵan. Keiin birneshe ret basynan uryp, kúsh kórsetken. Qariia osy jaǵdaidan keiin densaýlyǵy kúrt nasharlaǵanyn jáne insýlt alǵanyn aitty.

"Tórt aidan beri nege qamamaidy? Meni qamaǵany, qol-aiaǵymdy bailaǵany, tas tóbemnen ura berdi. Sol urǵannyń zardabynan insýlt aldym. Basymda ura bergenniń zardaby jinaldy. Uryp, jyǵyp, bárin alǵan da, kiim-keshegimdi bermei qoidy. Qazir balalardyń kiimin kiip júrmin", – dedi Ádilhan Sisenov.

Jábirlenýshiniń sózinshe, oqiǵa 2026 jyldyń maýsym aiynda bolǵan. Ádilhan Sisenov buǵan deiin de kenje balasynyń birneshe ret kúsh kórsetkenin, alaida quqyq qorǵaý organdarynan tiisti kómek ala almaǵanyn málimdedi.

Aýylda máselesiniń sheshimin taba almaǵan qariia keiin qalaǵa baryp, jýrnalisterge suhbat bergen. Onyń oqiǵasy buqaralyq aqparat quraldarynda jariialanǵannan keiin qoǵamda qyzý talqylanyp, quqyq qorǵaý organdarynyń nazaryna ilikken. Keiin qart adamǵa kúsh qoldaný deregi boiynsha onyń kenje ulyna qatysty qylmystyq is qozǵalǵan. Alaida aiyptalýshy qamaýǵa alynbaǵan.

Is boiynsha aiyptalýshy – Ádilhan Sisenovtiń 47 jastaǵy kenje uly. Ol ákesiniń qara shańyraǵynda turǵan. Sot otyrysynda er adam ózine taǵylǵan aiypty moiyndamaǵan. Al qariianyń jaqyndary sotqa qatysyp, jábirlenýshiniń quqyǵy qorǵalýyn jáne istiń ádil qaralýyn talap etti.

Týystarynyń aitýynsha, bul – atalǵan qylmystyq iske qatysty úshinshi sot otyrysy. Olar qariianyń densaýlyǵy birtindep jaqsaryp kele jatqanyn jetkizdi.

"Saǵyz stansasynan kelip turmyz. Osymen úshinshi ret. Týǵan aǵamyz úshin kelip otyrmyz ǵoi. Qolymen istegendi moinymen kótersin. Aǵaiynnyń bárimen qazir araz boldyq, osy balanyń qylyǵynan. Aýyryp qalyp edi, qazir jaqsy, esi ornyna kelip jatyr. Ótkende mikroinsýlt aldy ǵoi", – dedi jábirlenýshiniń qaryndasy Kenjetai Sisenova.

Ádilhan Sisenov buǵan deiin quqyq qorǵaý organdaryna aryzdanǵanymen, tiisti shara qoldanylmaǵanyna shaǵymdanǵan. Qariia kenje ulynyń buryn ishki ister salasynda qyzmet etkenin de aityp, osy jaǵdaidyń istiń ádil qaralýyna áser etýi múmkin ekenine alańdaýshylyq bildirgen. Onyń aitýynsha, birneshe ai ótse de ulynyń qamaýǵa alynbaýy ózine túsiniksiz. Sondyqtan jábirlenýshi sotqa ózi kelip, balasynyń áreketine zań aiasynda baǵa berilýin talap etip otyr. Al týystary qariianyń densaýlyǵyna kelgen ziiandy eskerip, istiń ádil sheshilgenin qalaidy.