گۇلنار باجىكەنوۆانىڭ «وتۆەت باجكەنوۆوي» كانالىنا سۇحبات بەرگەن ەرمۇحامەت ەرتىسبايەۆ كارىم ءماسىموۆتىڭ ساياسي بولىمىسىنا از-كەم باعا بەرىپتى. سونىمەن قاتار ول «20 مىڭ تەرروريست كىردى» دەگەن اقپاراتتى توقايەۆقا سول كەزدەگى ۇقك باسشىسى بەرگەنىن دە ايتىپتى. وسى رەتتە Nege.kz سايتى ەرتىسبايەۆتىڭ سۇحباتىندا ايتىلعان تۇشىمدى ويلارىن ىقشامداپ جاريالاۋدى، – دەپ حابارلايدى Dalanews.kz.

كارىم ءماسىموۆتىڭ نە ويلاعانىنىڭ ءقازىر ماڭىزى جوق. ويتكەنى، نازاربايەۆ بيلىكتى تولىق ۋىسىنان شىعارىپ الدى. ءماسىموۆتىڭ تۇتقىندالۋىنا كەلسەك، ۇقك – ساياسي بارلاۋ. ولار ەلدە تولقۋ بولاتىنىن بىلە تۇرا «ەسىنەپ» وتىردى. ەشقانداي ەسكەرتۋ بەرمەدى.

ەكىنشى سەبەبى – ارانداتۋشىلىق. شەرۋگە شىققانداردىڭ 95 پايىزى – ساياسي نارازىلار. 5 پايىزى – ادەتتەگىدەي توناۋشىلار، سودىرلار، تەررورشىلار، تىكەلەي كلانعا قاتىسى بار كۇشتىك قۇرىلىمدار بولدى. ولاردىڭ ماقساتى – ريەۆوليۋسيا يدەياسىن ءبۇلدىرۋ ەدى.

5 قاڭتارداعى توقايەۆتىڭ جاعدايى ەسىڭىزدە مە؟ وعان «پرەزيدەنت قىزمەتىن تاستا» دەگەن قاتتى قىسىم بولدى. «20 مىڭ تەرروريست» دەگەن اقپاراتتى توقايەۆقا سول كەزدەگى ۇقك باسشىسى بەرگەن. ونى قورقىتپاق بولعان. «نارازىلىقتىڭ كولەمى سۇمدىق، بيلىك قۇلاۋعا شاق تۇر. ءيا، استانادان كەتۋ كەرەك» دەپ، قاتتى قىسىم كورسەتىلدى.

كارىم ءماسىموۆ – وتە ينتەلليگەنت ادام. قۋ، شەبەر «پاتشا سارايشىسى». جاقسى ماعىناسىندا ايتىپ وتىرمىن. 2009-2013 جىلدار اراسىنداعى ءابىلازوۆتىڭ سۇحباتىن قاراپ شىعىڭىزدارشى. ءابليازوۆ: «ءماسىموۆ نازاربايەۆتىڭ سەنىمىنە كىرىپ قانا قويماي، بيلىككە ءوزى كەلۋ ءۇشىن ىرگەتاس قالاي باستايدى» دەۋدەن تانباي كەلدى. توقايەۆ استىرتىن ءسوز بايلاسقاندار تۋرالى دا ايتىپ قالدى. بۇل وقيعالار كەزىندە ءماسىموۆ، ءسوز جوق، شەشۋلى ءرول اتقاردى. نازاربايەۆ پەن توقايەۆ ءۇشىن ءبارى كۇتپەگەن جاعداي بولدى...

سوڭعى ەكى جىلدا ماسىموۆتەن ءبارى قورقا باستادى. شەكسىز بيلىگى بولدى...