دەپۋتاتقا قاتىستى ءىس سوتقا ءتۇستى. قالالىق ءماسليحات حاتشىسى ەكى اپتا وتسە دە زاڭ بۇزعان ارىپتەستەرىنە قاتىستى ەشقانداي شارا قولدانباي وتىر.
اقتوبە قالالىق ءماسليحاتىنىڭ دەپۋتاتى، «امانات» پارتياسىنىڭ مۇشەسى ءسانيا مۇراتوۆا پوليسياعا ۇستالدى. جول ەرەجەسىن بۇزعان «Lexus» اۆتوكولىگىن توقتاتقان پوليسيا قىزمەتكەرى جۇرگىزۋشىدەن ىشىمدىك ءيىسى شىعىپ تۇرعانىن بايقايدى. ساراپتاما قورىتىندىسى 53 جاستاعى دەپۋتاتتىڭ ىشىمدىك ىشكەنىن راستادى. وقيعا ەكى اپتا بۇرىن 5 قىركۇيەك كۇنى تىركەلگەن. دەپۋتاتقا قاتىستى اكىمشىلىك كودەكستىڭ ەكى بىردەي بابىمەن حاتتاما تولتىرىلعان.
«س.بايىشيەۆ كوشەسىندە جول قوزعالىسى ەرەجەلەرىن بۇزعانى ءۇشىن 53 جاستاعى ايەلدىڭ باسقارۋىنداعى «Lexus» اۆتوكولىگى توقتاتىلدى. قۇجاتتارىن تەكسەرۋ كەزىندە جۇرگىزۋشىدەن الكوگولدىڭ ءيىسى شىعىپ تۇرعانى بايقالدى. جۇرگىزىلگەن ساراپتاما ناتيجەسى ونىڭ ماس ەكەنىن كورسەتتى.
جۇرگىزۋشىگە ق ر اقبتك-نىڭ 596-بابىنىڭ 3-بولىگى (كولiك قۇرالىن جولدىڭ ءجۇرۋ ءبولiگiندە ورنالاستىرۋ، قارسى ءجۇرiپ ءوتۋ نەمەسە باسىپ وزۋ ەرەجەلەرىن بۇزۋ) جانە اقبتك-نىڭ 608-بابىنىڭ 1-بولىگى (كولىك قۇرالىن ماس كۇيىندە جۇرگىزۋ) بويىنشا حاتتاما تولتىرىلىپ، ماتەريال جينالدى جانە زاڭدى شەشىم قابىلداۋ ءۇشىن اكىمشىلىك سوتقا جىبەرىلەتىن بولادى»،- دەپ حابارلادى وبلىستىق ءپد-نىڭ باسپا ءسوز قىزمەتى.
اكىمشىلىك كودەكستىڭ اتالمىش باپتارىنا سۇيەنسەك، كولىك قۇرالىن ماس كۇيىندە باسقارعانى ءۇشىن 15 تاۋلىككە اكىمشىلىك قاماققا الۋ جانە كولىك قۇرالىن باسقارۋ قۇقىعىنان 7 جىل مەرزىمگە ايىرۋ كوزدەلگەن.
بۇل جاعدايعا قاتىستى قالالىق ءماسليحات ەشقانداي شارا قابىلداماعان بولىپ شىقتى. «ەستىدىم، پوليسيادان رەسمي اقپارات المادىم. ەتيكا بويىنشا كوميسسيادا قاراۋ ءۇشىن رەسمي قۇجات كەرەك»،- دەدى قالالىق ءماسليحات حاتشىسى انار دارجانوۆا.
ال بۇل ۋاقىتتا سوت كوبينەتىندە مۇراتوۆا ءسانيا بۇلقايىرقىزىنا قاتىستى ءىستىڭ سوتقا تۇسكەنى انىق كورسەتىلگەن.
ءسانيا مۇراتوۆا 2021 جىلدان باستاپ اقتوبە قالالىق ءماسليحاتىنىڭ دەپۋتاتى جانە «Life Style» – فيتنەس-سەنترىنىڭ ديرەكتورى. اشىق دەرەك كوزدەرىندە دەپۋتاتتىڭ ەكى بالاسى، بەس نەمەرەسى بارى جازىلعان. ول ءارتۇرلى جىلدارى اقتوبە قالاسى اكىمدىگىنەن، «Nur Otan» پارتياسى اتىنان جانە ن.ءا.نازاربايەۆ العىس حاتىن العان.
