Depýtatqa qatysty is sotqa tústi. Qalalyq máslihat hatshysy eki apta ótse de zań buzǵan áriptesterine qatysty eshqandai shara qoldanbai otyr.
Aqtóbe qalalyq máslihatynyń depýtaty, «Amanat» partiiasynyń múshesi Sániia Muratova politsiiaǵa ustaldy. Jol erejesin buzǵan «Lexus» avtokóligin toqtatqan politsiia qyzmetkeri júrgizýshiden ishimdik iisi shyǵyp turǵanyn baiqaidy. Saraptama qorytyndysy 53 jastaǵy depýtattyń ishimdik ishkenin rastady. Oqiǵa eki apta buryn 5 qyrkúiek kúni tirkelgen. Depýtatqa qatysty Ákimshilik Kodekstiń eki birdei babymen hattama toltyrylǵan.
«S.Báiishev kóshesinde jol qozǵalysy erejelerin buzǵany úshin 53 jastaǵy áieldiń basqarýyndaǵy «Lexus» avtokóligi toqtatyldy. Qujattaryn tekserý kezinde júrgizýshiden alkogoldiń iisi shyǵyp turǵany baiqaldy. Júrgizilgen saraptama nátijesi onyń mas ekenin kórsetti.
Júrgizýshige QR ÁQBtK-niń 596-babynyń 3-bóligi (Kólik quralyn joldyń júrý bóliginde ornalastyrý, qarsy júrip ótý nemese basyp ozý erejelerin buzý) jáne ÁQBtK-niń 608-babynyń 1-bóligi (kólik quralyn mas kúiinde júrgizý) boiynsha hattama toltyrylyp, material jinaldy jáne zańdy sheshim qabyldaý úshin ákimshilik sotqa jiberiletin bolady»,- dep habarlady oblystyq PD-niń baspasóz qyzmeti.
Ákimshilik Kodekstiń atalmysh baptaryna súiensek, kólik quralyn mas kúiinde basqarǵany úshin 15 táýlikke ákimshilik qamaqqa alý jáne kólik quralyn basqarý quqyǵynan 7 jyl merzimge aiyrý kózdelgen.
Bul jaǵdaiǵa qatysty qalalyq máslihat eshqandai shara qabyldamaǵan bolyp shyqty. «Estidim, politsiiadan resmi aqparat almadym. Etika boiynsha komissiiada qaraý úshin resmi qujat kerek»,- dedi qalalyq máslihat hatshysy Anar Darjanova.
Al bul ýaqytta sot kobinetinde Muratova Sániia Bulqaiyrqyzyna qatysty istiń sotqa túskeni anyq kórsetilgen.
Sániia Muratova 2021 jyldan bastap Aqtóbe qalalyq máslihatynyń depýtaty jáne «Life Style» – fitnes-tsentriniń direktory. Ashyq derek kózderinde depýtattyń eki balasy, bes nemeresi bary jazylǵan. Ol ártúrli jyldary Aqtóbe qalasy ákimdiginen, «Nur Otan» partiiasy atynan jáne N.Á.Nazarbaev Alǵys hatyn alǵan.
