قاڭتاردىڭ سۋىعى مەن جاۋىن-شاشىنىنا قاراماستان ەگىستىك القابىندا جۇمىس ىستەپ جاتقان قوجالىقتاردىڭ ءبىرى – "اللاجار" شارۋا قوجالىعى. اللاجار ءابدىراحمانوۆتىڭ باسشىلىعىنداعى قوجالىقتىڭ ەنشىسىندە 7،2 گەكتار جەر بار بولسا، سونىڭ 4،2 گەكتارىنا ەرتە پىسەتىن قىرىققابات داقىلى ەگىلىپ جاتىر.
قازىرگى تاڭدا 60 ادامنان قۇرالعان بريگادا ەگىستىك القابىندا تىنباي جۇمىس ىستەۋدە.
– جۇمىسشىلارعا كۇنىنە 5000 تەڭگەدەن ەڭبەكاقىسىن تولەۋدەمىز. قىرىققاباتتىڭ «گاليكان ف-1» جانە «ريندا» اتتى سورتتارىن ەگىپ جاتىرمىز.
نەگىزىنەن 2 ايدىڭ كولەمىندە ەككەن ەگىنىمىز ءپىسىپ جەتىلەدى. ەگىلگەن كوشەتتىڭ ءۇستىن جاپقىشپەن جاۋىپ، جاۋىن-شاشىننان قورعايمىز. ەڭ باستىسى – كۇتىپ-باپتاۋعا ۇلكەن ءمان بەرىلۋى كەرەك، – دەدى ا.ءابدىراحمانوۆ.
![](/uploads/images/20240127140748093.jpg)
جالپى بيىل 500 گەكتارعا جۋىق جەرگە ەرتە ەگىلەتىن كوكونىستەر ەگۋ جوسپارلانىپ وتىر. قىرىققابات ەرتە پىسەتىندىكتەن، ماقتاارالدىق ديقاندار ونىڭ سوڭىنان قاۋىن-قاربىز، ماقتا سياقتى وزگە دە داقىلداردى ەگۋگە كىرىسەدى. وسىلايشا، شارۋالار 1 جىلدا ەكى رەت، ءتىپتى ءۇش رەت ءونىم الادى.
ايتا كەتەيىك، وتكەن جىلى ماقتاارالدىق شارۋالار 20 مىڭ تونناعا جۋىق كوكونىس ءوندىرىپ، ونىڭ 80%-نا جۋىعىن تمد، بالتىق جاعالاۋى ەلدەرىنە، تۇركيا، گەرمانيا، گرەكيا مەملەكەتتەرىنە ەكسپورتاعان.