وتكەن جىلى اۋدانداعى ماقتاشىلار ماقتا زيانكەستەرىنەن قاتتى جاپا شەككەنى ەسىمىزدە. بيىل ەرتە دابىل قاعىلىپ، ەڭبەكقور شارۋالارىمىز ءتيىمدى ارەكەت جاساعاندىقتان، زيانكەستەرمەن كۇرەس ءساتتى ءجۇرىپ، بىلتىرعىعا قاراعاندا ماقتا شىعىمدىلىعى ءبىرشاما ءتاۋىر بولدى.
بيىل ورتاشا ەسەپپەن گەكتارىنان 22،4 سەنتنەردەن ءونىم الىندى. ماقتا تەرىم ناۋقانىنا 347 تەرىمشىلەر بريگاداسى، 113 كومباين جۇمىلدىرىلدى. اۋداندا ماقتا وڭدەيتىن 5 زاۋىت، ماقتا قابىلدايتىن 69 بەكەت بار. تمد-دا تەڭدەسى جوق «مىرزاكەنت» ماقتا وڭدەۋ زاۋىتى 120 ادامدى تۇراقتى جۇمىسپەن قامتىپ وتىر.
بيىل ماقتاارالدىڭ ديقاندار 12 546،1 گەكتار جەرگە باقشا داقىلدارىن ەكسە، ونىڭ ىشىندە 10 878،9 گەكتارى – قاۋىن. سونداي-اق، 1 667،2 گەكتار جەرگە قاربىز ەگىلگەن.
وتكەن جىلى تۇركىستان وبلىسىندا 1 ميلليون 300 مىڭ توننا باقشا ونىمدەرى وندىرىلسە، سونىڭ 600 مىڭ تونناسى ماقتاارال اۋدانىنىڭ ديقاندارىنىڭ ەنشىسىنە ءتيىپ، ونىڭ باسىم بولىگى ەكسپورتقا شىعارىلدى. قازىرگى تاڭدا «ءمىرزاشول» قاۋىندارى رەسەيدە، ءتىپتى شىعىس ەۋروپانىڭ بىرنەشە مەملەكەتتەرىندە تانىلىپ ۇلگەردى.
باقشا ونىمدەرى جەرگىلىكتى ديقاندار ءۇشىن ءتيىمدى بيزنەس كوزىنە اينالدى. وسى رەتتە قازاق ماقتا شارۋاشىلىعى عىلىمي-زەرتتەۋ ينستيتۋتى «ءمىرزاشول» قاۋىنىنىڭ ەكسپورتقا جارامدى سورتتارىن شىعارىپ، ديقانداردىڭ تابىستى ەڭبەك ەتۋىنە ۇلكەن ۇلەس قوسقانىن ايتا كەتۋىمىز كەرەك.
Dalanews.kz
