جوبانى جۇزەگە اسىرۋ ماقساتىندا تارتىلعان ينۆەستيسيانىڭ جالپى قۇنى 300 ملن. تەڭگەنى قۇرايدى. كاسىپورىن گرەسيالىق «Soldatos» جشس-گى مەن «تۇركىستان» اكك» اق-نىڭ فيليالى — «TURKISTAN INVEST» ينۆەستيسيالىق كومپانياسىنىڭ بىرلەسىپ اتقارعان جۇمىستارى ناتيجەسىندە ىسكە قوسىلدى.
زاۋىت ماقتاارال اۋدانىنداعى يندۋستريالدىق ايماقتىڭ 3 گەكتار جەر اۋماعىندا سالىنعان. ءونىم قازاقستان بويىنشا ساتىلاتىن بولادى. جوبانىڭ جوسپارلانعان جىلدىق قۋاتتىلىعى — 20 مىڭ توننا. ءوندىرىس باسىندا 30 ادام تۇراقتى تۇردە جۇمىس ىستەيدى.
بۇدان بۇرىن اسفالت-بەتون ءوندىرۋ جوباسىنىڭ ينۆەستورى گرەسيالىق NIOVI S.A كومپانياسى قۇرىلتايشىسى بولىپ كەلەتىن «Soldatos» ءجشس-نىڭ باس ديرەكتورى ا.شىنتايەۆتى وبلىس اكىمى ج.تۇيمەبايەۆ ارنايى قابىلداپ الداعى جۇمىسىنا ساتتىلىك تىلەگەن ەدى.
«ايماق - ورتا ازيا، تاياۋ شىعىس پەن ەۋروپا ەلدەرىن بايلانىستىراتىن جولداردىڭ قيىلىسىندا ورنالاسقاندىقتان بىزدە شەكارالىق ساۋدا-ساتتىق پەن ەكسپورتتىق ءوندىرىس دامىپ كەلەدى. سونداي-اق، وبلىستا 11 يندۋستريالدى ايماق پەن جەڭىل ونەركاسىپ باعىتىنداعى ءبىر ارنايى ەكونوميكالىق ايماق بار. وبلىستا ينۆەستيسيا تارتۋ جانە ينۆەستورلارعا ءبىر تەرەزە قاعيداسى بويىنشا قىزمەت كورسەتەتىن ايماقتىق دامۋ ينستيتۋتتارى جۇمىس جاسايدى. ينستيتۋتتار كاسىپكەرلەرگە كەڭەس بەرەدى جانە قارجىلىق پەن ينفراقۇرىلىمدىق كومەك كورسەتەدى»، - دەگەن ەدى ءوز سوزىندە ءوڭىر باسشىسى.
ءوز كەزەگىندە ءسوز العان كومپانيا باسشىسى بۇعان دەيىن اۋداندا ءموبيلدى اسفالت زاۋىتىن ىسكە قوسىپ، قىزىلقۇم اۋىلدىق وكرۋگىندە ورنالاسقان ينسپەكتورلىق جولدارعا اسفالت بەرىپ كەلگەنىن جەتكىزگەن.
سونىمەن بىرگە ول ەكىنشى جەلىسىن كەلەر جىلدىڭ جاز ايىندا اياقتاۋدى جوسپارلاپ وتىرعانىن اتاپ وتكەن.
«Soldatos» ءجشس-نىڭ ينۆەستورلارى ماقتاارال اۋدانىنداعى جوبادان بولەك، سارىاعاشتا ساعاتىنا 150 توننا، ال تۇركىستان قالاسىندا ساعاتىنا 200 توننا اسفالت-بەتون شىعاراتىن زاۋىت سالۋدى جوسپارلاپ وتىر.
جالپى ايتا كەتەيىك، الداعى ۋاقىتتارى اۋداندا سىرتقى ينۆەستيسيادان بولەك، ىشكى ينۆەستيسيانىڭ ەسەبىنەن وڭدەۋ زاۋىتى، گيگيەنالىق زاتتار مەن پوليەتيلەن شىعاراتىن ءوندىرىس زاۋىتتارىنىڭ جوبالارى دا جۇزەگە اسپاق. 38 گەكتار جەردى الىپ جاتقان اۋداننىڭ يندۋستريالدى ايماعىندا جۇمىس ىستەپ تۇرعان «بەرەكە» ماقتا زاۋىتىنان باسقا، مۇندا كەلەر جىلى 4 جوبا ىسكە اسىرىلادى دەپ جوسپارلانۋدا
