قازاقستان رەسپۋبليكاسى تاۋەلسىزدىگىنىڭ 27 جىلدىق مەرەكەسىندە ماقتاارال اۋدانىنىڭ اكىمى باقىت اسانوۆ 1991 جىلى تۋىلىپ، قازىرگى تاڭدا ءتۇرلى سالادا قىزمەت ەتىپ جۇرگەن بەلسەندى جاستارمەن «تاۋەلسىزدىك قۇرداستارى» اتتى كەزدەسۋ كەشىن وتكىزدى. جيىن بارىسى ەركىن فورماتتا ءوربىپ، تاۋەلسىزدىگىمىزدىڭ قۇرداستارى اۋدان باسشىسىمەن اشىق-جارقىن سۇحبات قۇردى. 

– قۇرمەتتى جاستار! سىزدەردى ەڭ ۇلى مەرەكەمىز – رەسپۋبليكامىزدىڭ تاۋەلسىزدىگى كۇنىمەن قۇتتىقتايمىن. ءبىز جەرىنىڭ استى بايلىققا، جەرىنىڭ ءۇستى پاراساتتى حالىققا تولى قازاق ەلىنىڭ تاۋەلسىزدىگىنىڭ 27 جىلدىعىن زور قۋانىشپەن قارسى الىپ وتىرمىز. ءار قايسىڭىز ءوز ءومىر جولدارىن تاپقان بىلىكتى مامان، ۇلگىلى وتباسى، اۋدانىمىزدىڭ ماقتانىشىسىزدار. وسىنداي ايتۋلى مەرەكە قارساڭىندا ەگەمەن ەلىمىزدىڭ يگىلىگى جولىنداعى ىستەرىڭىزگە مول تابىس، جانۇيالارىڭىزعا بەرەكە-بىرلىك، دەندەرىڭىزگە ساۋلىق تىلەيمىن. كيەلى ماقتاارال اۋدانىنىڭ دامۋىنا وسىلايشا ءوز ۇلەستەرىڭىزدى قوسىپ جۇرە بەرىڭىزدەر! – دەدى ىزگى تىلەگىن ارناعان باقىت ءناسىرحان ۇلى.

كەزدەسۋگە مەملەكەتتىك قىزمەت، پروكۋراتۋرا، ىشكى ىستەر، كاسىپكەرلىك، دەنساۋلىق، ءبىلىم، اقپارات، ونەر، سپورت سالاسىندا قىزمەت ەتىپ جۇرگەن ەڭ بەلسەندى جاستار قاتىستى. ولار ءوز سالالارىن دامىتۋعا باعىتتالعان ويلارىن اشىق ايتىپ، كەيبىر كەلەلى ماسەلەلەردى شەشۋگە ارنالعان ۇسىنىستارىن اۋدان باسشىسىنا جەتكىزدى.

كەزدەسۋ كەشىندە اۋدان اكىمى ب.اسانوۆ جاستاردى العىس حاتپەن ماراپاتتاپ، ارنايى دايىندالعان سىيلىقتارىن تابىستادى. سونداي-اق، اۋدان جاستارىن تاۋەلسىزدىگىمىزدى نىعايتۋعا شاقىرۋ ءۇشىن ۇندەۋ جاريالانىپ، بەلسەندى جاستار تاراپىنان قولداۋ تاپتى.

 

ماقتاارال اۋدانى اكىمىنىڭ باسپا ءسوز قىزمەتى