مەملەكەتتىك كىرىستەر كوميتەتى قازاقستاندىقتارعا پاتەر، ءۇي، ساياجاي، گاراج جانە باسقا دا جەر ۋچاسكەلەرى ءۇشىن 2024 جىلعا ەسەپتەلگەن مۇلىك سالىعىن ۋاقىتىندا تولەۋدى ەسكەرتتى. بۇل تولەم بارلىق جىلجىمايتىن مۇلىك يەلەرىنە مىندەتتى، - دەپ حابارلايدى Dalanews.kz.

قالاي حابارلاندى؟

سالىق سوماسى تۋرالى قاعاز تۇرىندەگى حابارلامالار شىلدەدە جىبەرىلگەن. سونىمەن بىرگە، ەكىنشى دەڭگەيلى بانكتەردىڭ ءموبيلدى قوسىمشالارى ارقىلى push-حابارلامالار دا تاراتىلعان.

ۋاقىتىندا تولەمەگەن جاعدايدا:

• 1 قازاننان كەيىن ءار كەشىكتىرىلگەن كۇن ءۇشىن ءوسىمپۇل ەسەپتەلەدى.

• سالىق ورگاندارى بورىشكەرگە قارىز تۋرالى ەسكەرتۋ جىبەرەدى.

• 14 قاراشادان باستاپ 1 اەك-تەن (3 692 تەڭگە) جوعارى بەرەشەك بولسا، ءوندىرىپ الۋ تۋرالى سالىق بۇيرىعى شىعارىلادى.

• ەگەر بۇدان كەيىنگى 5 جۇمىس كۇنى ىشىندە تولەم جاسالماسا، قۇجاتتار جەكە سوت ورىنداۋشىلارىنا بەرىلەدى.

جەكە سوت ورىنداۋشىلارىنىڭ وكىلەتتىكتەرى:

• بورىشكەردىڭ بانك شوتتارى مەن قارجىسىن بۇعاتتاۋ؛

• جىلجىمايتىن مۇلىك پەن وزگە دە مۇلىككە قاتىستى مامىلەلەردى شەكتەۋ؛

• ەگەر قارىز 40 اەك-تەن (147 680 تەڭگە) اسسا، بورىشكەردىڭ ەلدەن شىعۋىنا تىيىم سالۋ.