سپيكەردىڭ ايتۋىنشا، جىل باسىنان بەرى ايماق باسشىسى نۇرلان نوعايەۆ ەلدى-مەكەندەرگە بارعان جۇمىس ساپارىندا اۋىل جاستارىمەن ەركىن فورماتتا كەزدەسىپ، ماسەلەلەرى مەن ۇسىنىستارىن تىڭداپ، جاستار رەسۋرستىق ورتالىقتارىنىڭ قىزمەتىمەن تانىسقان. ناتيجەسىندە، وڭىردەگى جاستار رەسۋرستىق ورتالىقتارىندا قارجىلاندىرۋ كولەمىن ارتتىرۋ تۋرالى تاپسىرما بەرىپ، بيۋدجەتتىڭ كولەمى ارتتى.
بيىل جاستار باسقارماسىمەن ۇكىمەتتىك ەمەس ۇيىمدارعا 5 تاقىرىپ بويىنشا مەملەكەتتىك گرانت ۇسىنىلدى. بۇل ءۇشىن ماڭعىستاۋدىڭ ىنتالى جاستارىن جان-جاقتى دامىتۋ ماقساتىندا بيۋدجەتتەن 75 ميلليون تەڭگە ءبولىندى. مەملەكەتتىك گرانت اياسىندا 200-گە جۋىق ءىس-شارا ۇيىمداستىرىلادى. گرانت يەگەرى اتانعان ۇكىمەتتىك ەمەس ۇيىمدار جاستاردى كاسىپكەرلىككە باۋلۋمەن، ماڭعىستاۋ جاستارىنا ورتاق اقپاراتتىق الاڭ قۇرۋمەن، جۇمىسسىز جاستارمەن جۇمىس جۇرگىزۋمەن، جاستار تەاترىنىڭ جۇمىسىن ۇيلەستىرۋمەن، سونىمەن قاتار، جاستاردىڭ تاجىريبە الماسۋىن ۇيىمداستىرۋمەن اينالىسادى. جاستارمەن جۇمىس جۇرگىزۋ ماڭعىستاۋ وبلىسىنىڭ اكىمدىگىنىڭ نەگىزگى باسىم باعىتى بولىپ وتىر. ايتا كەتۋ كەرەك، بۇنداي قولداۋ - ماڭعىستاۋلىق جاستار ءۇشىن ۇلكەن مۇمكىندىك.
– «بولاشاققا سەنىممەن» جاستار لاگەرىن، اۋىل جاستارىنا ارنالعان «اۋىل كەشى» مادەني جوباسىن، وبلىستىق الەۋمەتتىك يدەيالار بايقاۋىن، وڭىرلىك دەبات ءتۋرنيرىن، وبلىستىق ستارتاپتار بايقاۋىن جانە ءبىرقاتار زياتكەرلىك، اعارتۋشىلىق جانە قوعامدىق-مادەني جوبالاردى جۇزەگە اسىرماق. بۇدان بولەك، جاستاردىڭ باستامالارىنا قولداۋ كورسەتۋ ماقساتىندا 40 شاعىن گرانت بەرىلەدى. سايكەسىنشە، بيىل وڭىردەگى جۇمىسشى جاستار، ستۋدەنتتەر، جاس كوشباسشىلار، جاس تالانتتارعا قولداۋ كورسەتۋ ماقساتىندا اۋقىمدى جوبالار جۇزەگە اسىرىلادى، – دەدى ابىلاي فازىلبەك.
بريفينگ بارىسىندا سپيكەر بيىل ماڭعىستاۋ وبلىسىنىڭ جاستار ساياساتى ماسەلەلەرى جونىندەگى باسقارماسىنىڭ قايتا قۇرىلعانى جونىندە دە اقپارات بەردى.
– جاستار باسقارماسىنىڭ الدىندا وڭىردەگى جاستار اراسىنداعى ماسەلەلەردى ەگجەيلى-تەگجەيلى زەرتتەۋ، جاستار قاجەتتىلىگىن انىقتاۋ، جاستار رەسۋرستىق ورتالىقتارى قىزمەتىنىڭ تيىمدىلىگىن ارتتىرۋ جانە ءوڭىر جاستارىنىڭ الەۋەتىن كوتەرۋ مىندەتى قويىلدى. اتالعان مىندەتتەردى ورىنداۋ ماقساتىندا ماڭعىستاۋ وبلىسىنداعى جاستار ساياساتىن دامىتۋدىڭ 2022-2023 جىلعا ارنالعان كەشەندى جۇمىس جوسپارى جاساقتالۋدا، – دەدى ابىلاي فازىلبەك.
ال جاستار رەسۋرستىق ورتالىعى باسشىسىنىڭ ورىنباسارى مۇقاش ورالباي جوبالارعا توقتالىپ ءوتتى.
– جاسوسپىرىمدەردىڭ جازعى دەمالىسىن ءتيىمدى ۇيىمداستىرۋ ماقساتىندا وبلىس كولەمىندە «جاسىل ەل» ەڭبەك جاساعى ءوز جۇمىسىن باستادى. وبلىس بويىنشا 1500-گە جۋىق جاس قامتىلادى. جوباعا قاتىسۋشىلاردىڭ باسىم بولىگىن الەۋمەتتىك جاعىنان از قامتىلعان جاسوسپىرىمدەر قۇرايدى. جىل باسىندا العاش رەت اقتاۋ قالاسىنداعى سونداي-اق، قالانىڭ كەز كەلگەن جاسى كەشكى ۋاقىتتا ورتالىقتا باس قوسۋعا ارنالعان «كەشكى شاي» جوباسى جۇزەگە اسىرىلا باستادى. 400-گە جۋىق جاس قاتىسقان جوبا توقسان سايىن ۇيىمداستىرىلادى. ءداستۇرلى تۇردە ناۋرىز ايىندا ورتالىقتىڭ «Mangystau Nauryz Fest – 2022» جاستار فەستيۆالى ءوتىپ، فەستيۆال اياسىندا 50-گە جۋىق مەرگەن قاتىسقان ساداق اتۋدان وبلىستىق اشىق تۋرنير ۇيىمداستىرىلدى. «Jastar Books» جوباسى قالا تۇرعىندارى مەن قوناقتارىن، كىتاپسۇيەر وقىرمانداردىڭ باسىن بىرىكتىرگەن شارا. مۇندا كىتاپ جارمەڭكەسى، زياتكەرلىك ويىندار مەن جاس ونەرپازداردىڭ كەشى ۇيىمداستىرىلدى، – دەدى مۇقاش ورالباي.
بيىل وڭىردەگى جاستار ۇيىمدارىنىڭ قىزمەتىن جەتىلدىرۋ، NEET ساناتىنداعى جاستارمەن كەشەندى جۇمىس جۇرگىزۋ جانە جاستاردىڭ باستامالارىنا جان-جاقتى قولداۋ كورسەتۋ بويىنشا جۇمىستارعا دا باسىمدىق بەرىلمەك.
– وسى ماقساتتا وبلىستاعى NEET ساناتىنا جاتاتىن جاستاردىڭ ناقتى سانىن انىقتاۋ جۇرگىزىلۋدە جانە ءبىرىڭعاي دەرەكقورى جاساقتالۋدا. قازىرگى تاڭدا قولدا بار مالىمەتكە سايكەس، NEET ساناتىنا جاتاتىن 10000-عا جۋىق جاس بار. سونىمەن قاتار، ولارعا ارنالعان قوعامدىق-مادەني، سپورتتىق، اعارتۋشىلىق باعىتىنداعى ءىس-شارالاردى ۇيىمداستىرۋ جوسپارلانعان. ءىس-شارالاردىڭ باعىتىنا سايكەس توپتىق نەمەسە ادرەستىك جۇمىس جۇرگىزىلەدى، – دەدى ابىلاي فازىلبەك.
