ماڭعىستاۋ وبلىسىنىڭ اكىمى نۇرداۋلەت قيلىباي ءىرى مۇناي كومپانيالارىمەن جەرگىلىكتى تاۋار وندىرۋشىلەردى قولداۋ بويىنشا ءوزارا ىنتىماقتاستىق تۋرالى مەموراندۋمعا قول قويدى، – دەپ حابارلايدى Dalanews.kz ماڭعىستاۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
كەلىسىمشارت ماڭعىستاۋدا وندىرىلەتىن مال شارۋاشىلىعى، كوكونىستەر ءوسىرۋ ءىسىن دامىتۋ بويىنشا بەلسەندى جۇمىس جۇرگىزۋدى كوزدەيدى. ماقسات – جەرگىلىكتى تاۋار وندىرۋشىلەردى قولداۋ جانە دايىن اۋىل شارۋاشىلىعى ونىمدەرىن وتكىزۋگە كومەكتەسۋ.
جەرگىلىكتى تاۋار وندىرۋشىلەردى قولداۋعا باعىتتالعان قۇجاتتى ەكىنشى جاقتان «قازمۇنايگاز» ۇك اق باسقارما ءتوراعاسىنىڭ ءبىرىنشى ورىنباسارى، «قازمۇنايگاز» ۇك اق اقتاۋ قالاسىنداعى وكىلدىگىنىڭ ديرەكتورى قۇرمانعازى ورىنعازى ۇلى ەسقازييەۆ، «ماڭعىستاۋمۇنايگاز» اق باس ديرەكتورى مۇرات مۇستافايەۆ جانە «قاراجانباسمۇناي» اق باس ديرەكتورىنىڭ ورىنباسارى رينات قاراجانوۆ بەكىتتى. ءۇش كومپانيادا جۇمىس ىستەيتىن 37 مىڭنان اسا ادام الداعى ۋاقىتتا ماڭعىستاۋدا وندىرىلەتىن مال شارۋاشىلىعى ونىمدەرى مەن كوكونىستەردى جەرگىلىكتى شارۋالاردان ساتىپ الاتىن بولادى.
– ءىرى كومپانيالاردى ءوڭىرىمىزدىڭ دامۋىنا، وركەندەپ، وسۋىنە ىقپال ەتۋگە شاقىرامىن. وتاندىق ءونىمدى ساتىپ الۋ ءۇشىن ەرەجە وزگەرتۋ قاجەت بولسا وزگەرتەيىك. كەلىسىم ەكى جاققا دا ءتيىمدى بولادى دەپ سەنەمىن. ءبىزدىڭ تاۋار وندىرۋشىلەر ءۇشىن تۇراقتى تۇردەي ونىمدەرىن وتكىزىپ وتىرۋ وتە ماڭىزدى، ال كومپانيا قىزمەتكەرلەرىنە ساپالى جەرگىلىكتى ءونىم قولجەتىمدى بولادى، – دەدى وبلىس اكىمى نۇرداۋلەت قيلىباي.
