ەرعازى مەڭدىبايەۆتىڭ ايتۋىنشا، ول باستاپقىدا ينتەرنەتتە ولاردىڭ سۋرەتتەرى كورسەتىلگەن ازىلگە اسا نازار اۋدارماعان.
«دوسىم ماعان سايتتاردىڭ بىرىندە جاريالانعان جۇبايىمىز ەكەۋىمىز تۇسكەن سۋرەتتىڭ سكرينشوتىن جىبەردى. سودان ءبارىمىز ءبىر كۇلىپ الدىق. ءبىراق بىرنەشە كۇننەن سوڭ سۋرەتىمىزدىڭ تاعى بىرنەشە ينتەرنەت-رەسۋرستاردا جاريالانعانى تۋرالى سكرينشوتتاردىڭ سانى وننان استى. بۇل مۇلدە كۇلكىلى بولعان جوق. ايەلىم ءتىپتى رەنجىپ قالدى. اسىرەسە، سۋرەتكە جازىلعان پىكىرلەردى كوڭىلگە الىپ قالاسىڭ. وندا ادامدار جاعدايدىڭ ءمان-جايىن بىلمەي جازىپ جاتتى. جاعىمسىز پىكىرلەر قالدىرىپ، ءتىل تيگىزگەندەر بولدى»، — دەيدى ەرعازى مەڭدىبايەۆ.
باسىلىمنىڭ مالىمەتىنشە، ەرعازى مەن دينارا 2016 جىلى ۇيلەنگەن. ول كەزدە كۇيەۋى — 21 جاستا، ال ايەلى 20 جاستا بولعان. Cونداي-اق، ولار جاڭاوزەندە ەمەس، اقتاۋدا تۇرادى ەكەن.
«بىزگە بۇرىندارى دا كامەلەتكە تولعانىمىزعا ەشكىم سەنبەيتىن.ۇنەمى جەكە كۋالىكتى كورسەتىپ ءجۇرۋ كەرەك بولاتىن»، — دەيدى ەرلى-زايىپتى. ەرعازىنىڭ ايتۋىنشا، قازىرگى ۋاقىتتا ونى قوعامدىق كولىكتەگى ادامدار تانىپ جاتىر. تۇرعىندار وعان جاقىنداپ، راسىندا دا جۇبايى ەكەۋىنىڭ جاسى 14-تە مە، جوق پا — سونى سۇراپ جاتادى ەكەن. «مەن ءبىزدى ءازىل ەتكەن ادامدى تاۋىپ، ودان مۇنى نە ءۇشىن ىستەگەنىن سۇراعىم كەلەدى»، — دەيدى ەرعازى.
ەسكە سالا كەتەيىك، وسىعان دەيىن ماڭعىستاۋدا 14 جاستاعى جۇپتىڭ وتاۋ قۇرعانى تۋرالى مالىمەتتىڭ راستالماعانى جايلى حابارلانعان بولاتىن. «زاڭ بويىنشا ءبىز تەك احاج-دا تىركەلگەن جۇپتىڭ نەكەسىن قيا الامىز. ولاردىڭ جاس مولشەرى 16-دان اسۋى كەرەك. سول سەبەپتى مۇنداي جاعدايدىڭ مەشىتتە بولماعانىن سەنىممەن ايتا الامىن. مەنىڭ بىلەتىنىم، وسى سۋرەتتەگى جىگىتتىڭ جاسى شامامەن جيىرمادا. ماعان مۇنى مەشىتكە كەلۋشىلەردىڭ ءبىرى ايتتى»، — دەگەن ەدى يمام.
