Erǵazy Meńdibaevtyń aıtýynsha, ol bastapqyda Internette olardyń sýretteri kórsetilgen ázilge asa nazar aýdarmaǵan.
«Dosym maǵan saıttardyń birinde jarıalanǵan jubaıymyz ekeýimiz túsken sýrettiń skrınshotyn jiberdi. Sodan bárimiz bir kúlip aldyq. Biraq birneshe kúnnen soń sýretimizdiń taǵy birneshe ınternet-resýrstarda jarıalanǵany týraly skrınshottardyń sany onnan asty. Bul múlde kúlkili bolǵan joq. Áıelim tipti renjip qaldy. Ásirese, sýretke jazylǵan pikirlerdi kóńilge alyp qalasyń. Onda adamdar jaǵdaıdyń mán-jaıyn bilmeı jazyp jatty. Jaǵymsyz pikirler qaldyryp, til tıgizgender boldy», — deıdi Erǵazy Meńdibaev.
Basylymnyń málimetinshe, Erǵazy men Dınara 2016 jyly úılengen. Ol kezde kúıeýi — 21 jasta, al áıeli 20 jasta bolǵan. Condaı-aq, olar Jańaózende emes, Aqtaýda turady eken.
«Bizge buryndary da kámeletke tolǵanymyzǵa eshkim senbeıtin.Únemi jeke kýálikti kórsetip júrý kerek bolatyn», — deıdi erli-zaıypty. Erǵazynyń aıtýynsha, qazirgi ýaqytta ony qoǵamdyq kóliktegi adamdar tanyp jatyr. Turǵyndar oǵan jaqyndap, rasynda da jubaıy ekeýiniń jasy 14-te me, joq pa — sony surap jatady eken. «Men bizdi ázil etken adamdy taýyp, odan muny ne úshin istegenin suraǵym keledi», — deıdi Erǵazy.
Eske sala keteıik, osyǵan deıin Mańǵystaýda 14 jastaǵy juptyń otaý qurǵany týraly málimettiń rastalmaǵany jaıly habarlanǵan bolatyn. «Zań boıynsha biz tek AHAJ-da tirkelgen juptyń nekesin qıa alamyz. Olardyń jas mólsheri 16-dan asýy kerek. Sol sebepti mundaı jaǵdaıdyń meshitte bolmaǵanyn senimmen aıta alamyn. Meniń biletinim, osy sýrettegi jigittiń jasy shamamen jıyrmada. Maǵan muny meshitke kelýshilerdiń biri aıtty», — degen edi ımam.
