ماڭعىستاۋ وبلىستىق دەنساۋلىق ساقتاۋ باسقارماسىنىڭ مالىمەتىنشە، ۆاكسينا الاتىن ادامداردىڭ ءتىزىمى جاسالىپ، ۆاكسينالاۋ ءۇشىن ەمحانالاردا ارنايى ەگۋ بولمەلەرى دايىندالعان.
– بۇگىن پەداگوگتارعا ەكپە سالىپ باستاپ كەتتىك. ۇستازدار قاۋىمى ەكپەىن ءوز ەرىك-قالاۋلارىمەن الىپ جاتىر. الدىمەن دارىگەردىڭ تەكسەرۋىنەن ءوتىپ، جاعدايلارىن انىقتاعاننان كەيىن ەكپەگە رۇقسات بەرىلەدى. سودان سوڭ، ەگۋ كابينەتىنە بارىپ، ۆاكسينا الادى. ەكپە العاندار ارنايى تىنىعۋ بولمەسىندە 30 مينۋتتاي بولادى. ول جەردە ارنايى ماماندار كەڭەس بەرىپ، باقىلايدى. قازىرگى ۋاقىتتا 11 ادام ۆاكسينا الدى. كەرى اسەرى بولعان جوق. جاعدايلارى جاقسى، – دەدى «نەيرون» ەمحاناسىنىڭ باس دارىگەرى نينا ساماليكوۆا.
مامانداردىڭ ايتۋىنشا، بۇگىن ۆاكسينا العاندار 21 كۇننەن سوڭ ەكىنشى كومپونەنتىن الا باستايدى. ياعني، ءاربىر ەكپە الاتىن قىزمەتكەرگە سمس حابارلاما كەلىپ تۇسەدى.
– بۇگىن مىنە ەكپە الۋعا ەمحاناعا كەلىپ وتىرمىن. مەديسينا ماماندارى ءوز قىزمەتتەرىن جاساپ، كۇتىپ الدى. الدىمەن تىركەگەننەن سوڭ، ەگۋ كابينەتىنە جىبەردى. ەگۋ بولمەسىندە ءبىزدىڭ كوزىمىزشە امپۋلادان دارىلەردى الىپ، ۋكول سالدى. ءقازىر مىنە، تىنىعۋ بولمەسىنە كەلىپ وتىرمىز. 20 مينۋتتاي بولدى. ەشتەڭە سەزىنىپ وتىرعان جوقپىن. قالىپتى جاعداي. بۇدان قورقۋدىڭ ەش قاجەتتى جوق. ءاربىر سانالى ازامات ءوزىنىڭ بولاشاعى ءۇشىن، اينالاسىنداعى جانداردىڭ اماندىعى ءۇشىن ەكەپە الۋ كەرەك دەپ ويلايمىن، – دەدى اقتاۋ قالاسىنداعى 8-مەكتەپتىڭ حيميا ءپانىنىڭ ءمۇعالىمى گۇلشات ۋالييەۆا.
