مەملەكەت باسشىسىنىڭ تاپسىرماسىمەن رەسپۋبليكا بويىنشا «تازا قازاقستان» ەكولوگيالىق اكسياسى قولعا الىندى. ءار اپتانىڭ وزىندىك تاقىرىبىمەن ناقتى ماقساتى بار. اكسيا اياسىندا ءتۇپقاراعان، مۇنايلى اۋداندارىندا ورنالاسقان جەرگىلىكتى سەگىز ەسكەرتكىشتەرگە تازالاۋ جۇمىستارى جۇرگىزىلدى. اكسياعا مادەني وشاقتاردىڭ قىزمەتكەرلەرى بەلسەنە ۇلەس قوستى، دەپ حابارلايدى Dalanews.kz.
وبلىستىق قۋىرشاق تەاترىنىڭ قىزمەتكەرلەرى «ەسمامبەت اتا» كيەلى ەسكەرتكىشىنىڭ ءىشى-سىرتىن تازالاپ، اباتتاندىرۋ جۇمىستارىن رەتكە كەلتىرىلدى.
– پرەزيدەنتىمىز قاسىم-جومارت توقايەۆتىڭ «تازا قازاقستان» اكسياسى بويىنشا تازالاۋ جۇمىستارى جۇرگىزىلىپ جاتىر. ەسكەرتكىشتەردىڭ اينالاسىن تازارتۋ جۇمىستارىنىڭ جۇرگىزىلۋى بەكەر ەمەس. سەبەبى 18 ءساۋىر حالىقارالىق ەسكەرتكىشتەردى قورعاۋ كۇنى. ماڭعىستاۋ ولكەسىنىڭ مادەنيەت سالاسىنىڭ قىزمەتكەرلەرى بىرىگىپ سەنبىلىك جۇرگىزدى. تاريحي-مادەني ەسكەركىشتەردى قورعاپ، ساقتاۋ بارشا قازاقستاندىقتاردىڭ ازاماتتىق بورىشى. ءار ەسكەركىشتىڭ وزىندىك قايتالانباس قاسيەتى بار. وسىنى ساقتاپ، ۇرپاققا ناسيحاتتاي وتىرىپ جەتكىزە ءبىلۋىمىز قاجەت. جولجان قورىمىنىڭ اينالاسى تازا. ءىشى، سىرتىن تازالاۋدا ايتارلىقتاي قوقىس جينالعان جوق. سەبەبى ەلدى مەكەننەن شالعاي ورنالاسقان. ال «قوشقار اتا»، قاليپان قورىمى ەلدى مەكەنگە جاقىن ورنالاسقاندىقتان كوپ قوقىس جينالۋى مۇمكىن، – دەدى مادەنيەت قىزمەتكەرى سەرىك قوسجانوۆ.
ماڭعىستاۋ مەملەكەتتىك تاريحي مادەني قورىعىنىڭ ديرەكتورى نۇرلان قۇلباي بۇل شارانى جىلدا ۇردىسكە اينالدىرۋ كەرەك دەيدى.
«ەلىمىز بويىنشا «تازا قازاقستان» اكسياسى باستالدى. اكسيا بەس اپتاعا سوزىلادى. تاريحي -مادەني قورىقتىڭ ۇجىمى بولىپ ءتۇپقاراعان اۋدانىندا ورنالاسقان «تەمىر كۇمبەز» تامىنا تازالاۋ جۇمىستارىن جۇرگىزدىك. اينالاسىنداعى كۇل-قوقىستارىن تازالاپ، قي-تەزەكتەردى جيناقتاپ، قۇلاعان تاستاردى رەتكە كەلتىردىك. سونىمەن قاتار «جىلقىباي قورىمىندا» دا ءدال وسىنداي جۇمىستار اتقارىلدى.
ماڭعىستاۋ ساۋلەتتى ەسكەرتكىشتەردىڭ شوعىرلانىپ جاتقان جەرى. بۇل اتا-بابالارىمىزدان ساقتالىپ كەلە جاتقان مۇرا. ماڭىزدى مۇرالاردى ۇرپاقتان-ۇرپاققا جەتكىزۋ ءۇشىن كۇتىم جاسالۋ كەرەك. ەسكەرتكىشتىڭ دە كيەسى بولادى. سول كيەنى ساقتاپ، قورعاۋ ماقساتىندا ۇيىمداستىرىلعان شارانى جىلدا ۇردىسكە اينالدىرۋ كەرەك دەپ ويلايمىن. وسىنداي يگى ءىس جاستارعا ۇلگى رەتىندە ۇيىمداستىرىلۋ قاجەت»، دەدى نۇرلان قۇلباي.
مادەنيەت قىزمەتكەرى سالامات بايراموۆ تا حالىقتى تابيعي ورىنداردىڭ كوركىن بۇزباي، ساقتاۋعا شاقىردى.
ەلىمىزدە رەسپۋبليكالىق ەكولوگيالىق «تازا قازاقستان» اكسياسى ءجۇرىپ جاتىر. اتالعان اكسياعا وبلىستىق عىلىمي-ادىستەمەلىك جانە مادەني قىزمەت كورسەتۋ ورتالىعىنىڭ ۇجىمى دا ۇلەسىن قوستى. قىزمەتكەرلەر ەسكەرتكىشتىڭ اۋماعىن اباتتاندىرۋ، اينالاسىن قوقىستان تازالاۋ جۇمىستارىن جۇرگىزدى.
شارانىڭ ماقساتى - تۇرعىندار اراسىندا ۆانداليزمگە قارسى قوعامدىق سانا تاربيەلەۋ، قوعامدىق مادەني دەڭگەيدى ارتتىرۋ ارقىلى رەسپۋبليكالىق دەڭگەيدەگى اكسياعا قولداۋ كورسەتۋ. ءاربىر ەلدىمەكەننىڭ تازالىعى تۇرعىندارعا تىكەلەي بايلانىستى. يگى باستاما اياسىندا ىنتىماق پەن ءوزارا كومەككە ۇيرەتەتىن جاقسى قاسيەتتەردى ناسيحاتتايتىن قايىرىمدى جانە مادەني شارالار جالعاسىن تابا بەرسىن. بولاشاقتا ءتارتىپ پەن تازالىق ساقتاۋ باستى داعدىعا اينالاتىنىنا سەنەمىز، - دەدى ول.
