مۇنايلى اۋدانىندا حالىق ەمىن جۇرگىزۋ كەزىندە ناۋقاستىڭ ولىمىنە قاتىستى ءىس بويىنشا ۇكىم قايتا قارالدى، دەپ حابارلايدى Dalanews.kz.
Lada.kz مالىمەتىنشە، اپەللياسيالىق سوت القاسى بۇعان دەيىنگى ۇكىمدى تىم قاتاڭ دەپ تانىپ، جازانى جەڭىلدەتكەن.
ءىس ماتەريالدارىنا سايكەس، 19 ناۋرىزدا مۇنايلى اۋداندىق سوتى جەرگىلىكتى تۇرعىن ب.-نى قىلمىستىق كودەكستىڭ 104-بابى 1-بولىگى (ابايسىزدا ادام ولىمىنە اكەپ سوعۋ) بويىنشا كىنالى دەپ تانىعان. 49 جاستاعى ايەل اقتاۋداعى №1 قالالىق ەمحانادا مەدبيكە بولىپ جۇمىس ىستەگەن جانە ارنايى ءبىلىمى مەن ليسەنزياسى بولماعانىنا قاراماستان، ۇيىندە «حالىق ەمى» قىزمەتىن كورسەتكەن.
سوت دەرەگىنشە، 2025 جىلعى 26 قاراشادا كەشكى ۋاقىتتا ول مۇنايلى اۋدانىنداعى ماڭعىستاۋ اۋىلىنداعى ۇيىندە كەلۋشىنى «ەمدەۋ» بارىسىندا ونىڭ موينىن قولىمەن قىسىپ، سالدارىنان ەر ادام وقيعا ورنىندا كوز جۇمعان.
ءبىرىنشى ساتىداعى سوت وعان 1 جىل 6 اي باس بوستاندىعىنان ايىرۋ جازاسىن تاعايىنداعان. الايدا كامەلەتكە تولماعان بالاسى بار ەكەنى ەسكەرىلىپ، جازا وتەۋ كەيىنگە قالدىرىلعان.
ۇكىممەن كەلىسپەگەن قورعاۋشىلار اپەللياسيالىق شاعىم تۇسىرگەن. ولار سوتتالۋشىنىڭ كىناسىن تولىق مويىنداعانىن جانە جابىرلەنۋشى تاراپتىڭ كەشىرىم بەرگەنىن العا تارتىپ، جازانى جەڭىلدەتۋدى سۇراعان.
ماڭعىستاۋ وبلىستىق سوتىنىڭ قىلمىستىق ىستەر جونىندەگى القاسى ءىستى قاراپ، جەڭىلدەتەتىن ءمان-جايلار تولىق ەسكەرىلمەگەن دەگەن قورىتىندىعا كەلگەن. سونىمەن قاتار بۇل قىلمىس اۋىر ەمەس ساناتقا جاتاتىنى جانە باپ سانكسياسى بالاما جازالاردى قاراستىراتىنى اتاپ ءوتىلدى.
ناتيجەسىندە اپەللياسيالىق ينستانسيا ۇكىمدى وزگەرتىپ، ايەلگە 1 جىل 6 اي مەرزىمگە باس بوستاندىعىن شەكتەۋ جازاسىن تاعايىندادى. وعان پروباسيالىق باقىلاۋ بەلگىلەنىپ، تۇرعىلىقتى جەرى مەن جۇمىسىن رۇقساتسىز وزگەرتۋگە، ويىن-ساۋىق ورىندارىنا بارۋعا، الكوگول قولدانىلاتىن جەرلەردە بولۋعا جانە تۇنگى ۋاقىتتا (22:00-دەن 06:00-گە دەيىن) ۇيدەن شىعۋعا تىيىم سالىندى.
سونداي-اق سوت وعان ەمشىلىكپەن اينالىسۋعا تىيىم سالدى.
