ونىڭ ايتۋىنشا سۋعا شومىلۋ ماۋسىمى كەزىندە ادامداردىڭ قاۋىپسىزدىگىن ساقتاۋ ماقساتىندا سۋعا تۇسۋگە تىيىم سالىنعان جانە شومىلۋعا رۇقسات ەتىلگەن جەرلەرگە قاتىستى نورماتيۆتىك قۇجاتتار قابىلداندى. ياعني «ماڭعىستاۋ وبلىسىندا ورتاق سۋ پايدالانۋ قاعيدالارى تۋرالى» شەشىمىمەن وبلىس اۋماعىنداعى 6 ورىندا سۋعا تۇسۋگە تىيىم سالىنعان.
– ولار اقتاۋ قالاسى بويىنشا 4 شاعىن اۋدانداعى «Caspian Rivera Grand Palace» قوناق ۇيىنەن 5 ش/ا م. وسكىنبايەۆ اتىنداعى وبلىستىق فيلارمونياعا دەيىن جانە «شورا» سۋ كانالى. ءتۇپقاراعان اۋدانى بويىنشا «كوگىلدىر ايلاق» 64 شاقىرىم، 43 شاقىرىم، «ساۋرا» 86 شاقىرىم، «تامشالى» فورت-شيەۆچەنكو قالاسىنان تاۋشىق اۋىلىنا قاراي 30 شاقىرىم، «سارىتاس» فورت-شيەۆچەنكو قالاسىنان تاۋشىق اۋىلىنا دەيىنگى ارالىققا سۋعا تۇسۋگە تىيىم سالىنادى. جابدىقتالماعان جانە رۇقسات ەتىلمەگەن جەرلەردە شومىلۋعا، سۋعا ماس كۇيىندە تۇسۋگە، سونداي-اق اتا-انالاردىڭ بالالاردى قاراۋسىز قالدىرۋىنا بولمايدى. سول سەبەپتى سۋعا شومىلۋ كەزىندەگى قاۋىپسىزدىك شاراسىن ءار ادام وزىنەن باستاۋ قاجەت، – دەدى ماڭعىستاۋ وبلىستىق توتەنشە جاعدايلار دەپارتامەنتىنىڭ باسشىسى مۇرات مۇحانوۆ.
سۋعا شومىلۋ ماۋسىمى كەزەڭىندە وبلىس حالقىنىڭ قاۋىپسىزدىگىن قامتاماسىز ەتۋ بويىنشا ۇيىمداستىرۋ، الدىن الۋ جانە پراكتيكالىق ءىس-شارالار كەشەنى قاراستىرىلدى. مو توتەنشە جاعدايلار دەپارتامەنتى ءوڭىر تۇرعىندارىنا، ونىڭ ىشىندە بالالارعا پروفيلاكتيكالىق، ۇگىت-ناسيحات جۇمىستارى مەن رەيدتىك شارالارىن كارانتين تالاپتارىن ساقتاي وتىرىپ تۇراقتى تۇردە جۇرگىزىپ جاتىر.
سونىمەن قاتار باسپا ءسوز كونفەرەنسياسىنا قاتىسقان دەپارتامەنت باسشىسى مۇرات مۇحانوۆ جىل باسىنان بەرى انىقتالعان ءورت جاعدايىنا توقتالدى.
– «101» جانە «112» تەلەفون نومىرىنە تۇسكەن شاقىرتۋلار ناتيجەسىندە دەپارتامەنت ماماندارى 700-گە جۋىق اۆاريالىق-قۇتقارۋ جۇمىستارىن جۇرگىزدى. سونداي-اق دەپارتامەنت قىزمەتكەرلەرى 3 ورمان قورى مەن قورىقتى بەلگىلەنگەن ءتارتىپ بويىنشا تەكسەردى. وندا 20 ءورت قاۋىپسىزدىگى ەرەجەسىنىڭ بۇزىلعاندىعى انىقتالدى. 3 زاڭدى تۇلعا اكىمشىلىك جاۋاپكەرشىلىككە تارتىلدى. ازاماتتىق قورعاۋ كۇشتەرى، جەرگىلىكتى پوليسيا قىزمەتى، ورمان مەكەمەلەرىمەن بىرلەسىپ 5 ءموبيلدى توپ قۇرىلدى، – دەدى مۇرات مۇحانوۆ.
