ماڭعىستاۋ وبلىسى اكىمى باسشىسى نۇرلان نوعايەۆ ماڭعىستاۋ اۋدانىنا بارعان جۇمىس ساپارىندا جەر قاتىناستارى ماسەلەلەرى بويىنشا كوشپەلى  كەڭەس وتكىزدى، – دەپ حابارلايدى ماڭعىستاۋ وبلىسى اكىمىنىڭ باسپا ءسوز قىزمەتى.

جيىندا ماڭعىستاۋ وبلىستىق جەر قاتىناستارى باسقارماسىنىڭ باسشىسى ەسەمۇرات دۇزماعامبەتوۆ يگەرىلمەي جاتقان جەرلەردى مەملەكەت مەنشىگىنە قايتارۋ، جەر قويناۋىن ءتيىمدى پايدالانۋ، جەكە تۇرعىن ءۇي سالۋ ءۇشىن كەزەكتە تۇرعان تۇرعىندار،  سونداي-اق جايىلىمدىق جەرلەردى انىقتاۋ ماسەلەلەرىنە توقتالدى.

بۇگىنگى تاڭدا وبلىستاعى جالپى جەر كولەمى 16 ميلليون 564 مىڭ گەكتاردى قۇرايدى. ونىڭ 12 ميلليون 639 مىڭ گەكتارى جايىلىمدىق جەرلەر. سوڭعى ەكى جىلدا يگەرىلمەي جاتقان اۋىل شارۋاشىلىعى ماقساتىنداعى جالپى كولەمى 2 ميلليون 406 مىڭ 441 گەكتار جەر مەملەكەت مەنشىگىنە قايتارىلدى.

قازاقستان رەسپۋبليكاسىنىڭ جەر قاتىناستارى سالسىنداعى زاڭدارىنا، مەملەكت باسشىسىنىڭ تاپسىرمالارىنا سايكەس يگەرىلمەي جاتقان جەرلەردى مەملەكەت مەنشىگىنە قايتارىپ، قايتادان اينالىمعا ەنگىزۋ تالابى بار. وسى باعىتتا 2021 جىلى شارۋالارعا 145 مىڭ 74 گەكتار جەر بەرىلدى.

– قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ پايدالانىلماي جاتقان اۋىل شارۋاشىلىعى جەرلەرىن قايتارۋ جۇمىستارىن كۇشەيتۋ قاجەتتىگىن بىرنەشە رەت اتاپ ءوتتى. بارلىق ۋاكىلەتتى ورگاندار بۇل ماسەلەنى تۇراقتى باقىلاۋدا ۇستاۋى كەرەك. اۋىل شارۋاشىلىعى ماقساتىنداعى بوس جەرلەردى ءتيىمدى پايدالانۋ مەحانيزمىن ەنگىزۋ ماڭىزدى. تالاپتار بارلىعىنا بىردەي. جەر قاتىناستارىنا قاتىستى ماسەلەلەر تەك قولدانىستاعى زاڭناما اياسىندا شەشىلۋى ءتيىس، – دەدى نۇرلان نوعايەۆ.

ايتا كەتۋ كەرەك، بۇگىنگى تاڭدا وبلىستا پايدالى قازبالارعا باي كەن ورىندارىن يگەرۋ ماقساتىندا 258 كەلىسىمشارت تىركەلگەن.

جيىن قورىتىندىسى بويىنشا وبلىس اكىمى جاۋاپتى تۇلعالارعا ءبىرقاتار ناقتى تاپسىرمالار بەردى.