ەۋرازيالىق وداق ەكونوميكالىق ارىپتەستىكتىڭ شەكاراسىنان شىقپاۋ كەرەك. بۇل جايىندا قازاقستان پرەمەر-مينيسترى اسقار ءمامين ايتتى دەپ حابارلايدى Dalanews.kz.
الايدا كرەملدىڭ بۇعان قاتىستى كوزقاراسى ءبىزدىڭ ەلمەن ۇندەسە بەرمەيدى.
كۇنى كەشە قازاقستان ماسكەۋدىڭ ەۋرازيالىق وداقتىڭ اياسىن كەڭەيتۋ تۋرالى كەزەكتى ۇسىنىسىنان باس تارتتى.
ءبىرقاتار ساراپشىلار "كرەمل وسىناۋ وداقتى ىرگەدەگى كورشىلەرىن ۋىسىندا ۇستاۋ ءۇشىن قۇردى" دەپ ەسەپتەيدى.
ءپۋتيننىڭ ۇزاق جىلعى ۇزەڭگىلەسى دميتريي مەدۆەديەۆتىڭ ورنىنا كەلگەن رەسەيدىڭ جاڭا پرەمەرى ميحايل ميشۋستين ەۋرازيالىق وداق اياسىنداعى ارىپتەستىكتى كەڭەيتۋگە مۇددەلى.
بۇدان بۇرىن ول سپورت، تۋريزم جانە ەكولوگيا سالالارىن دامىتۋدى وسى وداقتىڭ قۇزىرەتىنە كىرگىزۋ قاجەتتىگى تۋرالى ۇسىنىس ايتقان.
بۇل ۇسىنىستى رەسەي پرەمەرى الماتىدا وتكەن ەۋرازيالىق ۇكىمەتارالىق كەڭەستە تاعى دا قايتالاپ ايتتى. اتالعان شاراعا قازاقستان، رەسەي، ارمەنيا، قىرعىزستان جانە بەلارۋس ۇكىمەتىنىڭ باسشىلارى قاتىستى.
"سپورت، تۋريزم، ەكولوگيا بۇعان قوسا دەنساۋلىق ساقتاۋ جانە ءبىلىم سالاسىن ەۋرازيالىق وداقتىڭ جۇمىس جوسپارىنا ەنگىزگەنىمىز ءجون. ءبىزدىڭ وسىنداي ۇسىنىسىمىز بار. ال وداقتاستار ءبىزدىڭ باستامانى قولدايدى دەگەن ۇمىتتەمىن"، – دەدى ول.
الايدا...
ەلىمىزدىڭ ۇكىمەت باسشىسى اسقار ءمامين ءميشۋستيننىڭ ۇسىنىسىن قولداعان جوق، كەرىسىنشە وداق اياسىنداعى العاشقى ۋاعدالاستىقتى ساقتاۋدىڭ ماڭىزدىلىعىنا توقتالدى.
"ەۋرازيالىق وداقتىڭ اۋەل باستاعى كەلىسىمشارتىندا كورسەتىلگەن مىندەتتەردىڭ شەكاراسىنان شىقپاۋ ماڭىزدى. بۇل وداق تەك ەكونوميكالىق ارىپتەستىك ماقساتىندا قۇرىلعان"، – دەدى ءمامين.
ەكونوميست مۇرات قاستايەۆتىڭ پىكىرىنشە رەسەي بيلىگى وسى وداقتىڭ اياسىن كەڭەيتۋدىڭ جولدارىن ىزدەپ جانتالاسۋدا. ميشۋستين ۇسىنىسى استارىندا ماسكەۋدىڭ وسى وداقتىڭ ەكونوميكالىق اسپەكتىسىن ازسىناتىن استامشىل امبيسيا جاتىر.
"رەسەيلىك شەنەۋنىكتەر ەۋرازيالىق وداق كەڭىستىگىن ەكونوميكالىق ارىپتەستىكپەن شەكتەگەندى قۇپتامايدى، ولار وداقتىڭ قۇلاشىن كەڭەيتىپ ونى ساياسي ۇيىمعا اينالدىرۋدى ارماندايدى.
قازاقستاننىڭ وداققا قاتىستى پوزيسياسى ايقىن. ءبىزدىڭ ەل بۇل ۇيىمعا تەك ەكونوميكالىق وداق رەتىندە قارايدى. ال ماسكەۋدىڭ مازاسى كەتۋدە. ينتەگراسيا ولار كۇتكەندەي ناتيجە بەرمەدى، كەرىسىنشە ءجۇرىسى باياۋلاپ، شابانداپ قالدى. ۇيىمعا قوسىلعان وزگە وداقتاستار دا اسا بەلسەندى ەمەس.
رەسەي تەك ءوزىن، ءوز مۇددەسىن ويلايدى. ءميشۋستيننىڭ ۇسىنىسى سونىڭ دالەلى. كرەمل ەۋرازيالىق وداق اياسىندا رەسەيدىڭ سپورت، تۋريزم جانە ەكولوگيا باعىتىنداعى ماقسات-مۇددەسىن العا جىلجىتۋدى كوزدەپ وتىر.
ءدال ءقازىر ماسكەۋدىڭ تۇعىرى تۇراقتى ەمەس. رەسەي اۋمالى-توكپەلى داۋىرگە اياق باسقالى وتىر. ءپۋتيننىڭ پرەزيدەنتتىك مەرزىمى اياقتالۋعا تاقاۋ"، – دەيدى قاستايەۆ.
ايتا كەتەلىك ءپۋتيننىڭ پرەزيدەنتتىك مەرزىمى 2024 جىلى مارەسىنە جەتپەك.
ال ساياساتتانۋشى دوس كوشىمنىڭ ايتۋىنشا ماسكەۋ ەشقاشان ەۋرازيالىق وداققا ەكونوميكالىق ارىپتەستىكتى دامىتاتىن قۇرىلىم رەتىندە قاراعان ەمەس.
"كرەملدىڭ جوسپارى اۋەل باستان ايقىن. ءپۋتيننىڭ پيعىلى قانداي ەكەنىن كوزى اشىق، كوكىرەگى وياۋ ادام جاقسى بىلەدى. ەۋرازيالىق وداق كەلمەسكە كەتكەن قىزىل يمپەريانى قايتا ءتىرىلتۋدىڭ الەگى عانا".
ونىڭ پىكىرىنشە ءميشۋستيننىڭ ۇسىنىسى استارىندا اككى ساياسات جاتىر. بۇدان بۇرىن بۇكىلالەمدىك انتيدوپينگ اگەنتتىگى رەسەي اتلەتتەرىنىڭ 2020 جىلعى جازعى وليمپيادا ويىندارىنا قاتىسۋىنا، 2022 جىلعى فۋتبولدان الەم چەمپيوناتىنا جانە ءدال سول جىلى وتەتىن قىسقى وليمپيادا ويىندارىنا قاتىسۋىنا تىيىم سالعان.
"رەسەيگە ەكونوميكالىق ينتەگراسيا ازدىق ەتىپ وتىر. وداقتاستارى تولىققاندى وزىنە باعىنعاندى قالايدى. وداقتاس ەلدەردىڭ ەكونوميكادان بولەك سپورت، تۋريزم، الەۋمەت سالاسى جانە ەڭ سوڭىنان ساياسي باعىت-باعدارىن اشسا الاقانىندا، جۇمسا جۇدىرىعىندا ۇستاعىسى كەلەدى. ميشۋستين الماتىداعى وتىرىسقا ءپۋتيننىڭ تاپسىرماسىن ورىنداۋ ءۇشىن كەلدى، ولار ينتەگراسيانى تەرەڭدەتپەي تىنشىمايدى"، – دەيدى كوشىم.
ساياساتتانۋشىنىڭ ايتۋىنشا قازاقستاننىڭ قازىرگى پرەزيدەنتى قاسىم-جومارت توقايەۆتىڭ ساياسي بەتالىسى ماسكەۋگە ۇناپ وتىرعان جوق.
"دەموكراتيالىق وزگەرىستەر بايقالا باستاعان قازاقستاننىڭ ۇستانىمى ءبىزدىڭ ەلدى وسىناۋ وداقتان الشاقتاتا تۇسەدى، – دەيدى ول.
ەڭ قىمبات قۇندىلىق
ورتا ازيادا رەسەيدىڭ دەگەنىنە كونبەي وتىرعان، حالقىنىڭ سانى كوپ، ءتىلىن تۇعىرعا قوندىرعان جانە ءوزىنىڭ ساياسي ۇستانىمى بار ەل – وزبەكستان.
"وزبەكستان ەۋرازيالىق وداققا قوسىلمايدى". وزبەك باسشىسى شاۆكات ميرزيايەۆ تۇنەۋكۇنى وسىنداي مالىمدەمە جاسادى. وزبەكستان وسىناۋ وداقتا باقىلاۋشى ەسەبىندە عانا بولماق.
– ءبىزدىڭ كوپتەگەن ازاماتتارىمىز قازاقستەن مەن رەسەيگە بارىپ جۇمىس ىستەيدى. ارينە، بۇعان بەي-جاي قاراي المايتىنىمىز انىق. ءبىراق مەن ءبىر جايتتى اشىپ ايتايىن، حالىقتىڭ كوكەيىندە كۇمان-كۇدىك بولماسىن. ءبىزدى ەشقانداي ەل ەشقاشان تاۋەلسىزدىكتى ايىرا المايدى. تاۋەلسىزدىك حالىق سەنىم ارتقان پرەزيدەنتتىڭ قولىندا. ءبىز ەۋرازيالىق ەكونوميكالىق وداققا مۇشە بولمايمىز، – دەگەن بولاتىن شاۆكات ميرزيايەۆ.
[perfectpullquote align="full" bordertop="false" cite="" link="" color="" class="" size=""]
ەكونوميست مۇرات قاستايەۆتىڭ پىكىرىنشە قازاقستان سىرتقى ساياساتتا دەربەس ارەكەت ەتۋى قاجەت. الايدا ازىرگى كۇنى ءبىزدىڭ ەلدىڭ اۋزى بۋۋلى، سىرتقى ساياساتتا كرەملدىڭ قاباعىنا قاراپ سويلەيمىز.
[/perfectpullquote]
"ەۋرازيالىق وداق باسەكەگە قابىلەتى جوق، اتى دا، زاتى دا كۇدىكتى قۇرىلىم. كۇندەردىڭ كۇنى قازاقستان بۇل وداقتان شىعادى"، – دەيدى قاستايەۆ.
