زاڭگەرلىك ءبىلىم اركەز بەدەلدى، ءارى ابىرويلى ماماندىقتاردىڭ ءبىرى بولىپ سانالادى. سول سەبەپتى، جاستار اراسىندا زاڭگەر ماماندىعىنا دەگەن قىزىعۋشىلىق بارلىق كەزدە جوعارى بولىپ قالا بەرمەك. سولاي بولا تۇرعانمەن، زاڭگەر ماماندىعىنىڭ ناقتى قىر-سىرىن اركىم جەتە بىلە بەرمەيدى، ءتىپتى تالاپكەرلەردىڭ وزدەرى زاڭگەر ماماندىعىن تاڭداي وتىرىپ ونىڭ كەيبىر باسىم تۇستارى مەن وزىنە ءتان ەرەكشەلىكتەرى جايلى حاباردار بولماۋى مۇمكىن.

جالپى زاڭگەر ماماندىعىن ەڭ امبەباپ ماماندىقتاردىڭ قاتارىنا جاتقىزۋعا بولادى دەپ سانايمىن.

زاڭگەر مامانى- زامان تالابىنا ساي سۇرانىستاعى ماماندىق بولعاندىقتان، وركەنيەتتى مەملەكەتتە زاڭگەردىڭ ماڭىزدى الەۋمەتتىك ءرولى وعان جوعارى كاسىبي جانە مورالدىق-ەتيكالىق تالاپتار قويادى. وسى جوعارى تالاپتارعا جاۋاپ بەرۋ ءۇشىن، زاڭ سالاسىندا قىزمەت اتقاراتىن ءاربىر ادام ءوزىنىڭ جالپى مادەني جانە كاسىبي دەڭگەيىن ۇنەمى ارتتىرۋى ءتيىس.

     بىلىكتى زاڭگەر بولۋ ءۇشىن كوپ ءبىلۋ كەرەك، كەڭ ءبىلىمى مەن قۇقىقتىق جۇمىس تاجىريبەسى بولۋى كەرەك. دەگەنمەن،كاسىبي قىزمەتىنىڭ سيپاتىنا بايلانىستى زاڭگەر زاڭ ءبىلىمى عانا ەمەس، سونىمەن قاتار جوعارى قۇقىقتىق مادەنيەتكە، كاسىبي ەتيكا مەن ەستەتيكانى  ۇستانۋى شارت.ءار ماماندىقتا ءوزىنىڭ ادامگەرشىلىك ماسەلەلەرى بار.

ادامگەرشىلىك مادەنيەتى-ەڭ الدىمەن ادامدارمەن تۇراقتى نەمەسە ءتىپتى ۇزدىكسىز قارىم-قاتىناستا بولاتىن ماماندىقتاردا ساقتالۋى كەرەك.زاڭ سالاسىندا قىزمەت اتقاراتىن ماماننىڭ  سويلەۋ مادەنيەتىنىڭ جوعارى دارەجەدە بولۋى دا كاسىبي تالاپ.زاڭگەردىڭ ءبىلىم دەڭگەيى عانا ەمەس،سويلەۋ مادەنيەتى  دە ماڭىزدى ءرول اتقارادى.زاڭگەر تاراپىنان سوزدىك نورمالاردى بۇزۋ،كاسىبي ەتيكا مەن مادەنيەتتى ساقتاماۋ تىڭداۋشىلار اراسىندا ونىڭ كاسىبي دەڭگەيىنە سەنىمسىزدىك تۋدىرادى.

زاڭگەر ماماندىعى – بۇكىل ءومىرىڭدى ارناپ جانە ءوز تاڭداۋىڭدى ماقتان ەتەرلىك، قيىن ءارى كۇردەلى، الايدا وتە قىزىقتى جانە مارتەبەلى ماماندىق. زاڭگەر جۇمىسى – قۇقىق ءۇشىن كۇرەس، ول كۇرەس زاڭگەرلەرگە ۇلكەن رۋحاني ءلاززات سىيلايدى. زاڭگەر ماماندىعىنىڭ تاعى ءبىر جاقسى جەرى – الىنعان ءبىلىمدى مەملەكەتتىك باسقارۋدىڭ ءار سالاسىندا: عىلىمدا، ەكونوميكادا، مادەنيەتتە، سپورتتا جانە جۋرناليستيكادا پايدالانۋعا بولادى. جوعارى بىلىكتى زاڭگەر – كاسىبي قىزمەتتە ءارۋاقىت قاجەت. زاڭگەر ماماندىعىن ءتامامداعان شىنايى بىلىكتى ماماندار جوعارى ينتەللەكتۋالدى ءارى ۇيىمداستىرۋشىلىق قابىلەتكە يە بولادى.بولاشاق زاڭ مامانىن دايىنداۋدا قارا شاڭىراق قازۇۋ-عا تەڭ كەلەرى جوق. سەبەبى،زاڭ سالاسى ادام ومىرىنە جاۋاپتى بولار ماماندىقتىڭ ءبىرى ءارى بىرەگەيى. شىنايى جانە ادىلەتتى شەشىمدەر قابىلداۋعا،ءتارتىپ ورناتۋعا،ادام ءومىرىنىڭ قاۋىپسىزدىگىنە تىكەلەي جاۋاپتى تۇلعامىز، اتا زاڭىمىز الدىندا جاۋاپكەرشىلىكتى سەزىنەمىز.

بيسەنوۆا م.ق

ءال-فارابي اتىنداعى قازاق ۇلتتىق ۋنيۆەرسيتەتىنىڭ زاڭ فاكۋلتەتى  قىلمىستىق قۇقىق،قىلمىستىق ءىس جۇرگىزۋ جانە كريميناليستيكا كافەدراسىنىڭ وقىتۋشىسى

ابدىكەن قۇرالاي

زاڭ فاكۋلتەتىنىڭ ماگيسترانتى