بۇل جايىندا كتك ارناسى حابارلادى.
ەكى جىل بۇرىن عانا وزگەرىس ەنگىزىلىپ، قايتا قابىلدانعان قىلمىستىق كودەكستىڭ شيكىلىگى شىعا باستاعان. ەڭ سوراقىسى، زاڭنىڭ كەمشىلىگىنەن ەلدە ۇرلىق-قارلىقتىڭ سانى ارتىپ، كودەكستىڭ ولقىلىعىنان قىلمىستى بيزنەسكە اينالدىرىپ العاندار كوبەيىپتى. سوندىقتان بۇگىن ەلىمىزدەگى قىلمىستىق ىستەردى تەرگەپ، تەكسەرۋگە تىكەلەي جاۋاپتى پروكۋرور، پوليسەيلەر مەن ادۆوكاتتار ماجىلىسكە تۇگەل جينالدى. ءوز كەزەگىندە ءماجىلىس ءتوراعاسى نۇرلان نىعماتۋلين:
– ءقازىر ۇرى 1 ميلليوننان اسپايتىن اقشانى قولدى قىلسا، ول جابىرلەنۋشىدەن كەشىرىم سۇراپ، بىتىمگەرشىلىككە كەلۋگە رۇقسات بەرىلگەن. جازالانباعان سوڭ ۇرى جۇرتتى قايتا-قايتا توناي بەرەدى. قىلمىسكەرلەر زاڭنىڭ ءدال وسى تۇسىن پايدالانىپ كەتەدى، – دەگەن ن.نىعماتۋلين ەندى ەكىنشى رەت ۇرلىقپەن ۇستالعاندارعا كەشىرىممەن قاراۋدىڭ قاجەتى جوق العا تارتتى. قولدانىستاعى قىلمىستىق كودەكسكە پروكۋرورلار دا نارازى. جاقىپ اسانوۆ زاڭنىڭ بەس كەمشىلىگىن ءتىزىپ كەلىپتى.
– 4 اي بۇرىن ءبىزدىڭ قىزمەتكەرلەر 9 مىڭنان استام ەكونوميكالىق قىلمىستىق ءىستى تەكسەردى. جارتىسى زاڭسىز قوزعالعان. ءالى دە تەرگەۋگە كوڭىلى تولمايتىندار كوپ. بىرنەشە ادام باسشىسىن جاقسى جاعىنان سيپاتتاسا بولدى، جازادان قۇتىلىپ كەتەدى. ۇكىم شىعارۋ ءۇشىن وسىنداي دالەلدەر جەتكىلىكتى مە؟ – دەيدى ق ر باس پروكۋرورى جاقىپ اسانوۆ
باس پروكۋرور جانۇيالىق جانجالدان سوڭ تاياق جەگەن كەلىنشەكتەردىڭ دە ماسەلەسىن قوزعادى. قازىرگى زاڭ بويىنشا، ايەلدەر كۇيەۋىنىڭ ساباپ تاستاعانىن سوت الدىندا ءوزى دالەلدەپ، كۋاگەر رەتىندە كورشىلەردى شاقىرۋ كەرەك. پوليسەيلەر تۇرمىستىق زورلىق-زومبىلىق كورگەندەردىڭ ىسىنە ارالاسپايدى. ايەلىنە قول كوتەرگەندەردى ءۇش ساعاتتان ارتىق ۇساتۋعا دا قۇقىعى جوق. ال اشۋى ءالى باسىلماعان ەر-ازاماتتار ۇيىنە جەتكەن سوڭ ادام ولتىرۋگە دەيىن بارادى ەكەن. قاسىموۆ قىلمىستىق كودەكستىڭ مۇنداي ولقىلىقتارىنا باس پروكۋراتۋرانى كىنالادى.
– باس پروكۋراتۋرا قىلمىستىق ىستەرگە قاتىستى زاڭداردى شەتەلدەردەن تىكەلەي كوشىرگەن. زاڭدارىمىز كوبىنە گەرمانيادان الىنعان. ءقازىر ءبىر توپ مامان تاعى دا وسى ەلگە اتتانباق. ال گەرمانياداعى قۇقىققورعاۋ ورگاندارىنىڭ جۇمىسى مۇلدەم باسقا عوي. بۇلاي بىرەۋدىڭ ءتارتىبىن تۇگەل كوشىرىپ الۋعا بولمايدى، – دەپ ق ر ىشكى ىستەر ءمينيسترى قالمۇحانبەت قاسىموۆ ءوز ءۋاجىن ايتتى.
ءبىراق قاسىموۆتىڭ قاراماعىنداعىلارعا ادۆوكاتتار رەنجۋلى. تەرگەۋشىلەر قورعاۋشىلاردىڭ دالەلىن ەلەمەيدى دە، ءتىپتى قىلمىستىق ءىستىڭ ماتەريالدارىن تۇگەل كورسەتپەيدى ەكەن.
ىشكى ىستەر ءمينيسترى باعىنىشتىلارىن ادۆوكاتتاردان دا اراشالاپ الدى. قاسىموۆتىڭ ايتۋىنشا، ونداعان توم ءىستى تەگىس قاعازعا باسىپ، شىعارىپ بەرۋگە قارجى جوق ەكەن. بۇگىنگى دەپۋتاتتار مەن پروكۋرور، پوليسەيلەر اراسىنداعى قىلمىستىق كودەكس توڭىرەگىندەگى ۇزاق ايتىس-تارتىستان سوڭ، ەكى جىل بۇرىن عانا قابىلدانعان جاڭا زاڭ قايتا قارالماقشى. ال باس پروكۋرور مەن ىشكى ىستەر ءمينيسترى بۇگىن اشىق تايتالاسقا تۇسپەگەنىمەن، ءبىر-بىرىنىڭ قىزمەتىنە كوڭىلدەرىنىڭ تولمايتىنىن انىق بايقاتتى.
ءجاۋدىر ورازحان
