بۇرىنعى ءبىلىم ءمينيسترى، قازىرگى دەپۋتات اسحات ايماعامبەتوۆ ەل ازاماتتارى مەن ەكونوميكا ءۇشىن ماڭىزدى ءرول اتقاراتىن، جاڭا سالىق كودەكسىنە ەنگىزگەن كەيبىر ۇسىنىستارعا (قازىرگى تاڭدا ولار جۇمىس توبى دەڭگەيىندە تالقىلانۋدا) قىسقاشا توقتالدى، دەپ جازادى Dalanews.kz.
دەپۋتات بۇل تۋرالى Telegram-داعى ارناسىندا جازدى.
- قۇمار ويىندارعا سالىناتىن سالىقتى كوبەيتۋ.
قۇمار ويىن بيزنەسى، اسىرەسە بۋكمەكەرلىك كەڭسەلەر، ايتارلىقتاي قارجىلىق الەۋەتكە يە. قازىرگى سالىق كودەكسى جوباسىندا سالىق مولشەرى 10% دەڭگەيىندە قاراستىرىلعان. ءيا، بۇل قازىرگى دەڭگەيدەن بىرنەشە ەسە جوعارى، ءبىراق ءبىز ونى ەكى ەسەگە ارتتىرىپ، 20%-عا دەيىن كوتەرۋدى ۇسىندىق. بۇل بيۋدجەتكە قوسىمشا جۇزدەگەن ميلليارد تەڭگە ءتۇسىم اكەلۋى مۇمكىن.
2. بانكتەر ءۇشىن كتس مولشەرلەمەسىن ارتتىرۋ.
ۇكىمەت جوباسىندا بانكتەر ءۇشىن كورپوراتيۆتى تابىس سالىعى (كتس) 25% دەڭگەيىندە بەلگىلەنگەن. ءبىراق ءبىز بۇل مولشەرلەمەنى 30%-عا دەيىن كوتەرۋدى ۇسىندىق. بۇل ءادىل شارا، سەبەبى بانك سەكتورىنىڭ پايداسى وتە جوعارى. اسىرەسە، قارجىلىق قىزمەتتەردىڭ قىمباتتاۋى مەن ديۆيدەندتەردىڭ بىرنەشە ەسە ءوسۋىن ەسكەرسەك. بۇل بيۋدجەتكە قوسىمشا تابىس اكەلەدى.
3. الكوگول جانە ترانسمايلارعا اكسيز ەنگىزۋ.
الكوگول. الكوگولدىك ونىمدەر ءبىرىنشى قاجەتتىلىككە جاتپايتىن تاۋار بولعاندىقتان، وعان اكسيزدەردى ارتتىرۋ قيسىندى دەپ سانايمىز.
ترانسمايلار. ترانسمايلار — ارزان، ءبىراق وتە زياندى، كانسەروگەندىك زاتتار. ولاردى تاماق ونەركاسىبىندە كەڭىنەن قولدانادى. كوپتەگەن ەۋروپا ەلدەرىنىڭ تاجىريبەسىن ەسكەرە وتىرىپ، ءبىز ترانسمايلارعا اكسيز ەنگىزۋدى ۇسىندىق. بۇل ولاردىڭ قولدانىلۋىن ازايتۋعا جانە وندىرۋشىلەردى تابيعي مايلارعا كوشۋگە ىنتالاندىرۋعا مۇمكىندىك بەرەدى. سونداي-اق، بۇل بيۋدجەتكە قوسىمشا تابىس اكەلەدى.
4. دارى-دارمەكتەر مەن مەديسينالىق قىزمەتتەرگە ققس (ندس) ەنگىزۋگە قارسى تۇزەتۋ.
دارى-دارمەكتەر. دارى-دارمەكتەرگە ققس (ندس) ەنگىزۋ دۇرىس ەمەس، سەبەبى بۇل ەڭ وسال توپتارعا — زەينەتكەرلەرگە، بالالارعا جانە مۇمكىندىگى شەكتەۋلى جاندارعا تىكەلەي اسەر ەتەدى. ولاي بولسا، دارى-دارمەكتەر باعاسى ايتارلىقتاي قىمباتتايدى. ءبىز دارى-دارمەكتەردى ققس-تان بوساتۋدى كوزدەيتىن قولدانىستاعى نورمانى ساقتاپ قالۋدى ۇسىندىق.
مەديسينالىق قىزمەتتەر. ققس ەنگىزۋ ازاماتتار ءۇشىن، اسىرەسە زەينەتكەرلەر مەن مۇگەدەكتەر ءۇشىن ەمدەۋ قۇنىن ارتتىرادى. بۇل جاعداي قولجەتىمدىلىگى شەكتەۋلى مەديسينالىق قىزمەتتەردى ودان ءارى قيىنداتادى. سونىمەن قاتار، ءبىز مەديسينالىق قىزمەتتەر ءۇشىن كتس مولشەرلەمەسىن تومەندەتۋدى ۇسىندىق (قولدانىستاعى كودەكستە ولار كتس تولەمەيدى).
5. بانك وپەراسيالارىنا ققس (ندس) ەنگىزۋدى بولدىرماۋ.
ۇكىمەتتىڭ بانكتىك اۋدارىمدار مەن باسقا دا بانك وپەراسيالارىنا ققس ەنگىزۋ ۇسىنىسى اقىلعا قونىمسىز. ءقازىردىڭ وزىندە بانكتەر اراسىنداعى اۋدارىمدار قۇنى، ققس ەنگىزىلەدى دەگەن بولجاممەن، ءوسىپ جاتىر (مىسالى، حالىق بانكتىڭ كارتاسىنان باسقا بانكتەرگە اۋدارىم 150 تەڭگەدەن 200 تەڭگەگە دەيىن قىمباتتادى). ققس قوسىلسا، بۇل بانكتەردىڭ ەمەس، قاراپايىم ازاماتتاردىڭ شىعىندارىن ودان ءارى ارتتىرادى. ءبىز بۇل نورمانى قابىلداماۋدى جانە نەگىزگى قارجىلىق قىزمەتتەردىڭ باعاسىنىڭ وسۋىنە جول بەرمەۋدى ۇسىندىق.
6. ەنداۋمەنت قورلارىنا قاتىستى تۇزەتۋلەر.
ەنداۋمەنت قورلارى الەۋمەتتىك جانە ءبىلىم بەرۋ سالاسىنداعى ۇزاق مەرزىمدى جوبالاردى قارجىلاندىرۋدا ماڭىزدى ءرول اتقارادى. ءبىز قايىرىمدىلىققا جۇمسالعان سومالاردى سالىقتان بوساتۋدى ۇسىندىق. بۇل ازاماتتار مەن كومپانيالاردى قايىرىمدىلىققا قاتىسۋعا ىنتالاندىرادى.
7. B2B مامىلەلەرىنە ارنايى سالىق رەجيمى بويىنشا مولشەرلەمەنى وزگەرتپەۋ.
ءبىز مولشەرلەمەنى 12%-دان 8%-عا دەيىن تومەندەتۋدى ۇسىندىق. بۇل ماسەلە بيزنەستىڭ پىكىرتالاستارىندا، سونىڭ ىشىندە ءماجىلىس جانىنداعى قوعامدىق پالاتانىڭ مۇشەلەرىمەن كەزدەسۋلەردە ءجيى كوتەرىلدى.
شىعىنداردى وڭتايلاندىرۋ.
سالىقتى كوبەيتۋ شىعىندار قۇرىلىمىن قايتا قاراۋسىز مۇمكىن ەمەس. ەگەر بيۋدجەت كىرىسىمەن بايلانىستى پروبلەمالار ايقىن بولسا، باسىمدىققا يە ەمەس شىعىنداردى وڭتايلاندىرۋ لوگيكالىق قادام بولادى. مەملەكەت باسشىسى بۇل تۋرالى بۇعان دەيىن دە تاپسىرما بەرگەن.
مەملەكەتتىك ورگاندارعا اكىمشىلىك عيماراتتار سالۋ، ۇلكەن ستاديوندار مەن كونسەرت زالدارىن تۇرعىزۋ، يميدجدىك شارالار مەن فورۋمدار وتكىزۋ شىعىندارىن قىسقارتۋ قاجەت.
دەپۋتات بۇل وزدەرى ۇسىنعان ۇسىنىستارىنىڭ تەك ءبىر بولىگى عانا ەكەنىن، سالىقتىق جەڭىلدىكتەردى قىسقارتۋ تۋرالى جانە باسقا دا ۇسىنىستارى، بۇل جازبانىڭ جالعاسى بارىن ەسكەرتەدى.
